(Teksto-Odio)
(Yazarı sesli dinlemek için tıklayınız)
Aze un anyo ke la pandemiya de la Covid-19 ampeso i apenas si los governos en el oksidente se rendieron kuento ke kale topar remedyo a este virus el kual entremientes ya mato miles de djentambre. En primera faza se dechizyo de topar la ashlama(vaksin) kontra eya, i se pode dizir ke en un tiempo rekor 2 siantifikos almandos, marido i mujer de orijin turka, entre otros, fueron kapaches de formularlo i de vender la patenta a la firma Pfizer de los Estados Unidos. Pfizer dirijada por un djudyo sefarad de Saloniki el Dr. Burla se metyo de akordo de dar a Israel kon preferensia, sovre la demanda del primer ministro israeliano Netanyahu, la ashlama grasias a la kuala la meatad de la povlasyon israeliana fue vaksinada fin oy en dia, koza ke mos da kontentes de poder salvarmos de este mal ke malgrado todo mato mas de 5000 almas en Israel.
Bien entendido el governo israeliano komo es de uzo, siempre ke se siente atakado kon adelantamyento, tomo sus prekosyones i kuando los dirijentes mondiales, a la eksepsyon de los chinezos, ke no supieron la seryedad de la situasyon, el izo trayer las ashlamas menesterozas para protejar su puevlo en justo tiempo. La umanidad entera se enkanta de ver ke durante los primeros mezes de este anyo a la eksepsyon de los pokos refrakteres(ke no keren, ke son kontra) serán vaksinados en totalita. Ansi se aspera ke la vida , mizmo en partida, de antes tornara a la normal i poderamos en Israel pasear en los sentros komersiales, ir al bodre de mar sin peura, a las salas de jimnastik i mas. Finalmente mizmo kon personas limitadas se poderan azer bodas, enkontros sosyales i kulturales i se aspera kon grande alegría la aviertura de las eskolas, las universidades, los stadyomes. Pode ser mizmo de viajar al estranjero!
Bravo a los dirijinetes de la sanedad i a Tsahal(armada de defensia israeliana) por la organizasyon perfekta de la infrastuktura de distribusyon de la ashlama. Ma aktualmente munchos spesialistos se demandan si el grande esforso ke se izo fin oy en dia mos guadrara de este virus por siempre o si en kambyando de forma mos podera atakar por de muevo? Ademas komo avrir las frontieras sin ver ke los lavorantes palestinianos resivieron las 2 ashlamas? Israel en prensipyo los devra vaksinar a la entrada del payis,onde la dechizyon politika fue tomada, amenos ke entremientes las otoridades sanetarias palestinianas no lo izieron. Israel devra ayudar el establisemiento palestiniano de Yehuda i Shomron a este prechizo sujeto, malgrado la inimista egzistente. Munchas bozes se oyen en los sentros antesemites oksidentales de ver Israel ser líder en este kampo i kon un selo eksesivo ovligarlo a ayudar a la otoridad palestiniana i a los de Gaza en esta tema, por ke pretenden ke eyos están debasho la okupasyon de muestro payis, koza ke no es verda. Israel es el solo payis en esta jeografia ke da ayudo a su inimigo, kuryozo no!!!
De otro lado muestro aeroporto Ben Gurion kontinua a ser serrado. Poka djente viene al payis estos días. Munchos ke tienen la doble nasyonalita ke keraran retornar a Israel están blokados en diferentes sivdades en el mundo. La sola manera de poder vinir de Evropa es de tomar el volo de Israer una vez al dia de Frankoforte. Uno ke kerara vinir por echemplo de Paris deve estar en kamino a lo manko 24 oras si no es mas por manko de atadijo korespondiente i ansi pasar una noche en Frankoforte. Munchos preguntan deke solo de Frankoforte se pode retornar a Israel? De ke no de Paris o de otra sivdad evropea? Munchos refuzan de ir en Alemanya por mo del rekordo de la Shoa , otros por razones de dinero. La ministra del transporto no fue kapache de topar remedyo a esta situasyon ke dura dezde muncho tiempo .
Agora ampesa en Israel la segunda faza de la lucha kontra Covid-19 , topar en lavorando dia i noche sin arestarse la melizina justa para kurar los hazinos nombrozos en el mundo i mizmo en muestro payis, sovre todo los aedados. Esto depende primo de la konosensia siantifika ke pensó es bastante avansada, segundo de la asistensya del governo enkavesado por las oras por Netanyahu ke devra apoyar los sentros de envestigasyon de medikeria i finalmente del dinero ke solo la sosieta kapitalista israeliana pode trayer sin difikulta. Ajustare a esto ke las kashas de seguridad sanitaryas kon una entrada de 15 miliardas de shekeles al anyo i kon un nombre alto de empyegados siantifikos devran estar prontas a dar sus apoyos, en demostrando la efikasidad del sistem sanitaryo sosyalisto kreado por Berl Katzenelson uno de los padres fondadores de Israel .
Para konkluir dire ke dainda estamos en el empesijo de la fin de la pandemia. Si keremos la viktorya kontra eya, eya será muestra. Israel dezde su establisimiento gano todas sus gerras i porke esta no?
Comments