(Teksto-Audio)
(Yazarı sesli dinlemek için tıklayınız)
El yelo popular en Israel i en los Estados Unidos Ben & Jerry’s se ampeso a azerse chavdo después ke la direksyon de esta sosieta amerikana dechizyo de anular fin 2022 la lisensya de fabrikasyon de sus produktos echos en muestro payis i de no permeter a ke eyos sean vendidos en Yehuda i Shomron. La razon siendo, ke Yehuda i Shomron son konsideradas komo tyerras okupadas i ke no azen partida de Israel. Estrano de ver komo una sosieta ke apartyene al grupo internasyonal Unilever toma una semejante dechizyon sovre la presyon del BDS asosyasyon palestiniana ke mira de impedir el negosyo kon Israel.
Koza kuryoza la semana pasada solo el anonsyo de esta dechizyon maloroza abasto a sozlevantar a Israel entero, al governo, a la prensa i mizmo a las institusyones djudias amerikanas, ke kada uno de su parte, decharon de lado las kestyones politikas mas urjentes para okuparse del evenimiento. Visto el bruyido jeneral en las medyas mondialas la direksyon jenerala de la multinasyonala Unilever sintyendo el demenester de sovreguardarse de una reaksyon negativa de la parte del mundo libero se deklaro ke eya kontinuara a lavorar en Israel i ke la sosieta de yelo todo siendo inkorporada en su seno ovra independientemente en su politika de vendida. Para mi esta deklarasyon es komo se dizia en Estambol ‘ una kantika’ ke no se si se deve ser tomada en seryo.
Ben & Jerry’s fue kreada en 1970 por dos djudyos amerikanos, Ben Cohen i Jerry Greenfield en Burlington i kuando la sosiedad se izo muy popular en el mundo kon sus produktos fue vendida a Unilever. Dunke no kedo dingun atadijo entre los fondadores i la direksyon aktuala porke estos sinyores no son mas reprezentados en el konsilyo de la sosiedad, ke al pareser es bastante antisemita en achetando las demandas del BDS a boykotar Israel. Ademas el aforizmo ‘ ke todo jinero de reklamas son buenas reklamas’ krea a traverso todos los payizes onde se vende este yelado una propaganda ke parese ke ayudara las vendidas i de ke no el BDS. Ansi esta organizasyon inimiga de la nasyon djudia mira grasyas al nombre semboliko de la firma de influensar la medya mondiala en deklarando ke mizmo los djudyos amerikanos están de akordo ke Israel es un payis anti- apartid. Es ke esta rumor en el tino de los goyes de la siedra inimiga ke no konosen la verdad del Medyo Oriente dechara una mala figura de Israel? Probablamente dizere ‘si’ . Por modo de esto devemos kada uno de mozotros en Israel kombatirla kon el ayudo de los djudyos amerikanos i kon los milyones de evanjikalos muestros amigos sinseros.
A la fin de este evenimiento vamos aver, komo siempre, ke el mas grande danyo va ser para la firma Ben & Jerry’s visto ke el boykot de su yelado le trayera un manko de ganar en los Estados Unidos i en Israel. Komo se save kada epizodo virtual negativo traye kon si sus konsekuensas danyozas. El solo prejudisyo va ser para los 2000 personas djudyos komo arabos ke lavoran aktualmente en la fabrika israeliana i en su kadena de distribusyon. Kon tiempo i a esto se topara remedyo komo fue en kavzos en el pasado.
La razón prinsipal de semejantes akonsentimientos dezde 2005 es achakes la organizasyon palestiniana kon su ramo internasyonal ke mira komo su sigla BDS mos ambeza ke Israel deve ser boykotado, dezmudado i penalizado. Para arivar a su buto sus dirijentes gastan un mabul de dinero kuando los palestinianos de los teritoryos i de Gaza se topan en situasyon ekonomika mas ke estrecha. El BDS akuza Israel de ser kolonyalisto, de okupar tyerras palestinianas, de refuzar a los refujiados ke son sovre sus estimasyones de oy mas de 7 milyones a retornar a sus tyerras por la sola razón de no ser djudyos, de maltretar los arabos israelianos considerados komo sivdadinos de segunda zona, en pokas palavras de no tener el derecho de egzistir. Eyos kopyaron en adaptando el muvemento Sud Afrikano anti-apartid i lo aplikan tali kual en sus luchas kontra Israel. Miran de impedir las relasyones sportivas, kulturalas i akademikas en los payizes en los kualos fueron achetados. Demandan kon el ayudo se sus sempatizanos a ke seygan boykotadas todas las institusyones siviles de Israel i mizmo las institusyones de otros payizes ke kolavoran kon eyas. Se meten en raporto kon las eglizyas, las bankas nasyonalas, los fondos de pansyon, las universitades i mas afin de konverserlos a no tener trato kon sus ekivalentes israelianos. Ademas menasan a todo modo de institusyon ke no acheta sus demandas i ke sostiene Israel de ser boykotada a su torno.
Otro buto del BDS es de mirar a traverso las organizasyones internasyonalas de azer presyon sovre el establisimiento israeliano a forsarlo a ke se trave de Yehuda i Shomron i del este de Yerushalayim, i de no permetirle a ke las kolonias djudias podan azer komerso libero kon el libel ‘Made in Israel’. Enfin mirar a ke se anule la prezensya de Israel en las institusyones internasyonalas komo Las Nasyones Unidas, Las Olimpiyadas i la Fifa. Los dirijentes del BDS sin verguenza se deklaran ke no son antisemitos i ke miran solo de azer presyon sovre Israel sin ser violentes. Enkreivle todas estas echas ke no danyan muncho a Israel, por ke de 2005 a oy la ekonomiya del payis pujo 200 por sien en investimyentos i en eksportasyones. Malgrado el BDS las kompaniyas israelianas komo las etranjeras ke izyeron komerso kon Israel, no sufyeron del todo del boykot. Solo en 2020 Israel resivyo serka de 25 miliardas de dólares de envestimiento i mas de 400 sosietades internasyonalas se establisieron en su territorio en los dalkavos 20 anyos.
Para konkluir, dire ke el yelo Ben & Jerry’s peryo su savor i ke sin duvda kontinuaremos muestra lucha kontra la inimista de Israel i del djudaizmo komo lo disho Meir Ariel ke kompleti :” Mizmo de paro mos salvimos del BDS no mos vamos a salvar.”
Comments