Si, lo repeto, esta organizasyon de la Nasyones Unidas (UN) es el sentro de la grande inimista de Israel dezde de su fundasyon i del puevlo djudyo, ke pretende ser una organizasyon non politika para los refujiados, ma ke en realita eya sostene la terror. Eya fue fundada en 1948 despues de la kreasyon del estado djudyo onde kaji 700000 arabos biviendo en la Palestina debasho del Mandat Inglez se egzilaron a diferentes payizes arabos onde loskualos no keryendo darles dingun ayudo de establesimiento, el UN tomo la dechizion sovre la demanda de los payizes arabos de establisirla.
El buto era de dar asistensya a estos arabos en los kampos, tal, la edukasyon, la sanedad i remedyos de establisirsen en los kampos ke les fueron rezervados. Dezde de akel tiempo fin oy en dia dingun derecho de sivdadino no les fue akordado por los payizes ke los resivieron komo la Jordaniya, el Libano, la Siria, la Administarsyon Palestiniana en Yehuda i Shomron i bien entendido en Gazza. Por kontra Israel embolvyo kaji un milyon de djudyos ekspulzados de los payizes arabos los kualos kon el tiempo se asimilaron a la vida del payis i ke forman en muestro tiempo una grande partida de la povlasyon israeliana.
Israel establisyo kon provas la kolaborasyon ke tuvieron los empyegados de esta organizasyon del UN durante las grandes atrosidades komitidas el 7 Oktobre en Israel, ansi sus komplisidad para detener los arevatados en Gazza. Ademas en sus lugares stokaron grande kantidad de armas i ayudaron a transferarlas a los del Hamas. Anyos se vido, sin ser kastigados i kon granda libertad la propaganda mala ke se izo en las eskolas del UNRWA kontra Israel i los djudyos. Dezde las maestras fin las universidades a jenerasyones enteras les fue ensenyado ke murir en azyendo la gerra kontra Israel es un akto relijiozo i eroiko. Ser shahit para destruyir Israel i konkestar del riyo fina la mar la tyerra de la Palestina es un akto sakro i nasyonalisto i mas i mas. Imajinavos ke mas de 3000 profesores de la UNRWA eskrivieron mesajes de alegría sovre los masakros del 7 Octobre en el internet.
Israel anyos miro de dar a konoser esta verdad istorika al mundo libero i a sus aliados oksidentales en vano, fina ke la intelijiensa amerikana provo ke 12 responsables de esta organizasyon son miembros del Hamas ke partisiparon a atakos del 7 Obtobre. En realitad 1200 miembros de eyos apartienen al Hamas lo ke representa kaji el 10 % del personal ke la organizasyon tiene en Gazza. En totalidad 30 mil personas lavoran para la UNRWA en los kampos de los refujiados donde 13 mil en Gazza. En Gazza despues del Hamas la UNRWA es la segunda grande institusyon ke da lavoro a los otoktones. Todos estos siendo arabos palestinianos son pagados kon los donos echos por los payizes donatores desde 74 anyos. Solo los Estados Unidos dieron el anyo pasado mas de 300 milyones de dólares todo en savyendo la realitad egizstente en Gazza. Imajinar ke mas de 1.2 miliarda de dólares budjetado por esta Institusyon fueron gastados kada anyo en grande partida a enfuerteser el Hamas i a ayudar a kostruzir sienes de kilómetros de túneles debasho la zona de Gazza. Dunke ya vino el tiempo de arrestar este ayudo a los terroristas arabos en eliminando la UNRWA i establisiendo un muevo sistem para ayudar a los del Gazza.
Finalamente en partida los payizes de la Union Evropeya se ajuntaron kon los Estados Unidos i otros payizes en el mundo a arrestar sus donasyones a la UNRWA a saver, la Britanya, la Fransya, la Italya, la Austria, la Mueva Zealanda, La Alemanya, el Japon, La Ollanda, el Kanada i mas. Bien entendido los payizes arabos i la Espanya deklararon ke van a kontinuar a mandar dinero. Seve ansi ken es amigo i el ke no es de Israel. El ayudo material del Iran, del Katar, komo el de la Turkiya se va direktamente al Hamas por medyos ke no se poden kontrolar. Mizmo la Banka Leumi de Israel bloko los kuentos de la UNRWA al 75 % lo ke justifikara ke en serka eya no podera mas fonksyonar komo en el pasado.
Se korija ansi una injustisya istorika ke arrestera el Hamas de rovar todo el ayudo sanitaryo, alimentaryo i el neft ke ariva a la banda de Gazza. Mientres el statuto de refujiado ke paso de jenerasyon en jenerasyon tomara fin i los payizes arabos devran okuparse seryozamente a absorbar los palestinianos komo sitadinos en los payizes en los kualos se topan i dar fin a una anormalidad ineksplikave de este statuto de refujiado. Ademas pensando positivamente, kreo ke ya vino el tiempo a ke los palestinianos toman en sus propyas manos sus destinos i no kontinuan a ser sedakeros del mundo. Kualo se aspera despues de la destrukyon de la fuersa armada del Hamas no se save, kada dia se formula un muevo statuto para los de Gazza i los de Yehuda i Shomron sin en todo kavzo mirar de trokar la mentalidad araba positivamente en verso de Israel. Esto es la kestyon primordiala ke devemos todos okuparmos dia por dia.
Comments