El program Lebensborn era un proyekto de los Nazis para enrikeser la populasion aria. Los Nazis utilizaron munchos metodes inumanos. Mezmo fuyeron kreaturas de paizes okupados por los nazis, komo Polonya, Rusia i Yugoslavia. El tipo aria ideal teniya ojos blus i kaveyos blondos. Los eskandinavos uydeyavan perfektamente a este norm. El program Lebensborn forso los soldados Alemanes a tener relasiones kon mujeres de estos paizes. Solo en Norvejia nasieron mas de 12.000 kreaturas de estas relasiones. Despues ke la Alemanya pedrio la Segunda Gerra Mondial, estas kreaturas i mujeres fueron ekskluidas de las komunidades. Las mujeres fueron yamadas "putanas Alemanas". Las kreaturas fueron yamadas "Bastadro SS", "raton" o "kreatura Nazi". Estas kreaturas fueron abuzadas, emprizonadas en enstitusiones mentales, i el governo norvejio aksepto a deportarlas a Australia. Munchas de estas kreaturas de Lebensborn fueron eksperimantadas kon drogas.
Anni-Frid Lyngstad, una de la kantadera del grupo muzikal ABBA, nasio de una madre norvejia Synni Lyngstad i un soldado aleman Alfred Haase en el 15 de noviembre de 1945, unos kuantos mezes despues ke la Alemanya piedra la gerra. Synni Lyngstad tomo a su bebe Anni-Frid i se fuyeron de Norvejia. Emigraron a Suesia, ke tolerava las kreaturas de Lebensborn. En 1947, la madre de Anni-Frid murio kuando el bebe teniya dos anyos i su nona la engrandesio. Konosidas komo los Tyskerbarnas, estas kreaturas eran desendientes de madres norvejias i padres soldados alemanes. 12.000 de estas kreaturas agora tienen mas de sesenta anyos. Este grupo esta aziendo planos para luchar por una kompensasion en el Tribunal Evropeo de Derechos Umanos.
La kreatura lo konosio a su padre trenta anyos duspues. Se toparon en la villa de Anni-Frid en Suezia, kon la ayuda de Benny Anderson, uno de los fondadores de Abba i el marido de Anni-Frid. La kantadera disho sovre el rankontro kon su padre: 'Es difísil... iva ser diferente si yo era dainda una kreatura. No puedo konektarme kon el i kererlo bien komo si estava prezente kuando me engrandesi’. Mas duspues Anni-Fruid sufrio de una depresion. Los amigos atribuyaron esta depresion al rankontro retardado kon su padre. Anni-Frid, se retiro de todo durante anyos.
"Anni-Frid reusho a azer munchas kozas en Suezia, ke nunka puediya azer si dainda estava en Norvejia i iva ser estampada komo ‘idiot’" disho Tor Brandacher, de 63 anyos, el mesajero de la organizasion ke los esta reprezantando en el Tribunal Evropeo de Derechos Umanos.
Fondado en 1999, el grupo, Krigsbarnforbundet Lebensborn, o Fuente de Vida, tomo su nombre del plano dirijado por Heinrich Himmler, el lider de los SS’s de Hitler, para krear una raza maestra. El governo norvejio en tiempos de gerra, fue komplis de este plano de los nazis. El plano agora se esta indo al Korte Suprema del paiz. Las viktimas i sus famiyas se estan aparejando a yevar el plano a la Korte Evropea de Derechos Umanos. Munchas de las viktimas tuvieron problemes para relasionarsen kon el mundo real, pasaron los anyos de formasion yamados "idiot aleman" o "bastadro inutil" ke no merese bivir.
Si Alemanya aviya ganado la gerra, ivan a ser eros. Ma Alemanya piedro, i las madres norvejianas piedreron su estatus i sus ijos fueron klasifikados komo 'ratones' por los fonksionarios del governo. El odio de la postgerra a los ijos de los soldados alemanes fue tan grande ke los psikologos del governo enkargados de enformar sovre las kreaturas i sus madres konkluyeron ke las mujeres ke se izieron amigas de los alemanes tenian "talentos limitados i se izieron psikopatas asosiales, i eran severamente atrazadas".
Dora NİYEGO
Opmerkingen