(Teksto-Audio)
(Yazarı sesli dinlemek için tıklayınız)
Atras kaji diez o kinze anyos, unas kuantas dammas tomavamos lisyones de tora en el 6.en etaj del edifisyo del Hahambashilik. Tanto mos pasava ermozo el tiempo, ke empesimos a travar kon kuedra los diyas de martes despues de medio diya.
Sin konosermos antes, las ke viniamos a tomar lisyon mos izimos amigas i a la salida de eya, mos ivamos a pye fin a Taksim, komiyamos profiterol de la İnci Pastanesi (patiseria) ke malorozamente se serro, tornavamos a kaza alergres i kontentes diskutyendo de lo ke mos ambezimos.
Kada semana a su torno vinia un rabino a aklararmos i darmos a entender lo ke no saviyamos.
Un martes, era el torno de su eminensya, el Rav İzak Haleva. Akel tyempo dainda no era hahambashi. En un entervalo de lisyon mos demando una demanda muy muy enteresante… la ke era:
“İjas (mos yamava ijas) ande se aroga al D., ande se orasyona de alma i de korason?”
Siguramente, mozotras todas dimos la mezma repuesta. La orasyon de alma i de korason se aze en el kal, kuando se avre el ehal akodeş, en shabat i en kipur.
“Es djusto mos respondyo su eminensya… ma la orasyon la mas de alma i de korason se aze en una ventana de ospital”
La verdad dizir es ke akeas oras kedi enkantada i no entendi muncho lo ke kijo dizir.
Atras 12 anyos mi marido kayo hazino. Una hazinura maldicha. Una demanyana fuimos ovligados de yevarlo al ospital. Kuando lo tomaron para mirarlo i azerle las analizas, mis ijos i yo estavamos bien tristes. Despues ke lo yevaron, me fui a la ventana, miri a los sielos i me meti a arogar ke torne sano i rezyo, sin sar i sin mal.
Un dia en mirando a los sielos me vino delantre de los ojos mi vida entera komo una kordela de filmo…. Los makaris ke… (keşkeler)… miles de djente konosi, amigas, amigos, paryentes… ize yerros ??? Por siguro ke ize…. Rompi korasones ??? Puedeser sin kererlo…. İze buendades ??? Si ya ize… el ijo no gano el kolej, fin del mundo, el chiko tomo nota mala de la lisyon, fin del mundo, la mosa se fuyo, fin del mundo, el kalsado ke me plazyo se vendyo, fin del mundo i komo estas, por miles de bavajadas mos atristimos, mos inyervimos. Es ke valyo la pena?…. Portanto agora esto frente kon frente kon la verdad de la vida. El avenir? Ke va azer? Komo va bivir? Agora so ovligada de tomar desizyones byen seryozas, todo estava komplikado, muy komplikado… para enterder la verdad de la vida kaliya ke dyera a la tyerra a mi marido de 45 anyos???
Una demanyana, en la ventana del ospital en arogando a ke mi marido tope la melezina, en akea ora me vino al tino lo ke mos avia dicho el sinyor Rav Haleva i me kayo las lagrimas. Tenia muncha razon… Esta orasyon no paresiya ni a las orasyones ke azemos en el kal ni a otras.. Esta orasyon era veramente de alma i de korason.
Ma deve de ser ke el todo poderozo lo kijo mas muncho bien de mi. En el meldado del 12 en anyo arogi ke su alma repoze en ganeden.
Vos oguro una enveranada alegre kon sanedad i prosperidad i siempre ke arogesh para bueno.
Comments