Vitali Hakko empeso a lavorar a la edad de katorze anyos, komo aprendiz en Mahmutpasha, el vyejo sentro de merkanseriya en Estambol. Hakko dediko su vida a la etiketa “Vakko” ke es una marka de kalidad en la moda Turka.
Duspues de su muerte, Hakko fue komemorado kon tres seremoniyas. Duspues de la seremoniya relejioza en la Sinagoga Neve Shalom, fue enterrado en el primer simeteryo judiyo en Ulus.
Vitali Hakko kreyo la primera marka Turka, “Vakko”, rekonosida en el mundo entero komo un sembol de kalidad i de buen dizayn. Hakko fue un pionero en el komersyo de ropa de la Turkiya. Vitali Hakko teniya 94 anyos kuando muryo. Nasido en Estambol en el anyo 1913, Hakko se engrandesyo en la epoka trista de la Primera Gerra Mondial. Estos anyos eran tambyen los anyos de la Gerra de la Liberasyon en la Turkiya .
Hakko empeso el komerso kon un empesijo modesto ma lavoro tanto mucho ke reusho a establisir un emperyo en el komersyo de ropa. Avriyo su primer magazen “Şen Şapka” en el anyo 1934 i empeso a vender chapeyos. En estos anyos, aviya salido “La Ley de Chapeyos” i los ombres eran ovligados a vistir chapeyos del stilo oksidantal.
Hakko no se kontento solo kon un magazen de chapeyos. El keriya empesar otros echos. Duspues ke vendyo chapeyos por un syerto tyempo, Hakko se desido de pasar al mundo de la “moda”. Ma, por pueder reushir, kaliya tener paras. Oy, dainda ay djente ke se akodran komo Hakko vendiya fulares i gravatas en un koshe de mano. Vitali Hakko reusho a ganar tanto bueno en este echo ke, mas duspues avriyo un magazen muevo en İstiklal Caddesi, ke era la mas emportante kaleja de Beyoğlu, en el anyo1962. En este magazen, Hakko empeso a vender aksesuares de ombres i de mujeres. Akeyos diyas, aksesuares aviyan empesado a ser moda.
El magazen ke Hakko avriyo era el solo “department store” de Estambol akeyos diyas. Istiklal Caddesi era la mas selebre kaleja de moda en la sivdad. La djente rika de la sivdad uzavan a kaminar a lo largo de esta kaleja, ande rankontravan sus amigos. Esta djente teniyan el uzo de entrar a Vakko, ande puediyan topar prodaktos de buena kalidad. La kalidad de las materyales utilizada fueron una grande atraksion por la djente rika i los vistidos dezinyados por Vitali Hakko fueron una novedad por la Turkiya. Akeyos diyas, Vakko era el solo magazen ke vendiya vistidos prontos i el solo magazen ke akseptava kredit kartas etranjeras komo American Express. Akel tiempo, las mujeres uzavan a merkar ropas i kuzir fostanes en kaza. Por esta razon, el magazen “Vakko” ke era el bebe de Hakko, se aviya echo muy selebre en Estambol; tan selebre ke Hakko no se lo imajinava en su vida.
En los anyos 1980, la Turkiya empeso a enrikeserse. La televizyon estava amostrando muevas posibilidades. Los rikos empesaron a viyajar mas muncho al etranjero i empesaron a tener mas munchas ekspektasyones.
Vitali Hakko era mas kapache de sus kompetitores. La vitrina de Vakko fue la primera a meter mankenes femininas i maskulenes kon vistidos elegantes; lo mas, mankenes de ombres de negosyo kon vistidos elegantes i una gazeta etranjera debasho del kovdo. Akeyos diyas, la etiketa “Vakko” sinyifikava ke esta persona es rika i tyene muncho gusto. Los “Espesial” klientes de Vakko teniyan kartas de reduksion.
Mezmo ke Hakko era judyo, no se travo de propozar a la munisipalidad de azer reduksyones en los diyas de Noel i del anyo muevo. En poko tiempo, todos los magazenes de Beyoğlu empesaron a adaptar este uzo. Hakko reusho a konvenser la munisipalidad a illuminar la kaleja entera, en estos diyas espesyales.
Ma malorozamente, İstiklal Caddesi ke era la kaleja prinsipala de los rikos de Estambol, empeso a ir abasho. Personas ke estavan emigrando a Estambol de los vilajyos de Anatolya, empesaron a akumularsen en Beyoğlu. Un grupo de ombres de negosyo, (kon Hakko siendo sus lider), penaron a rekuperar la kaleja İstiklal Caddesi i el distrikto Beyoğlu. Porke la kaleja tenga de muevo la splendor ke teniya anyos antes, la munisipalidad la serro al trafiko, solo el tramvay puediya pasar de la kaleja.Los edifisyos vyejos a la larga de la kaleja fueron restorados i las galeriyas de djugo fueron serradas. Ma los eforsos de Hakko no fueron sufizantes. La kliantela de Vakko empesaron a ir a morar en los distriktos mas leshos.A la fin, el magazen Vakko de Beyoğlu se serro por entero. La famiya Hakko avyeron un magazen muevo en Kanyon, (uno de los mas muevos sentros komeryales de Estambol).
Tredje anyos antes, la Turkiya peryo el fondador de la primera marka Turka selebre en el mundo. La Turkiya peryo una leyanda kon el nombre Vitali Hakko, ma la marka “Vakko” va kontinuar a bivir en el mundo entero.
Comments