Era un diya de invyerno en el anyo 1940. No mos aviya kedado lenya de kemar en el getto ande estavamos bivyendo en Polonya. Oras i oras asperi en la kola para merkar un poko de lenya, ma komo kada vez, torni a kaza las manos vaziyas. En el kamino, me estuve delantre un monasteryo. De asperar en el friyo, me se aviyan echo las pachas duras komo pyedra. Pensi, si ento aryento del monasteryo, puede ser me puedo kayntar un poko. Soni la soneriya, un papaz me avriyo la puerta, i me demando si esto ambyerto. Ya aviya unos kuantos diyas ke no aviya metido nada en la boka, mezmo ni un pedasiko de pan. El papaz ya entendyo ke estava ambyerto, me yevo a una baraka ande estavan bivyendo los puerkos, i me disho de asperarlo aya.
Akel diya, por la primera vez me enseli de los puerkos. No teniyan espanto de los soldados almanes. Porke el Dio no me izo naser un puerko?
Alevanti la kara, el papaz me estava mirando kon ojos tristes. Teniya en la mano un chini de supa de patatas. Eskapi la supa en un punto, no me aviya artado, ma no saviya komo dizirselo al papaz. Lo remersi, i le demandi si me puediya topar un echo en el monasteryo. ’Si akseptas de echarte kon los puerkos, toma esta eskova, i empesa a alimpyar esta baraka’ me disho el papaz.
I ansina empesi a lavorar en el monasteryo. Kada diya, los estava konosyendo a los puerkos mas bueno. Pensi ke los puerkos son mas kerensyozos i mas buenos de las personas .
De vez en kuando, el papaz me estava yamando a la klisiya para ramplasar un ijiko. Este echo me estava plazyendo porke me estavan dando onor. Ma, i de otra parte, estava pensando ke lo ke estava azyendo era ipokrisiya.
No es djusto por un judyo de deneter el portre de Santa Mariya en los brasos. Por esta razon, entre los mushos estava repetando los byervos de la Tora finke la orasyon en klisiya se eskapava.
Estavamos en el mez de Desembre. Empesi a sintirme muy dezrepozado. No estava puedyendo olvidarme las noches de Hanuka ke pasavamos en la kaza de mi nono. Noche i diya, la melodiya i los byervos de la orasyon de Hanuka me estavan pasando por el meyoyo. ‘…bizmoshe Hanuka abayim le David…’. Me se aviya echo una idea fiksa i no estava puedyendo olvidar. Si puediya asender solo una kandela en dizyendo la orasyon, puede ser ke iva repozar.
Una noche, en serrando las puertas de la klisiya, sin ke veygan dingunos, me meti una kandela en la aldikera. Ma, ande la iva asender esta kandela?
Akeya noche de pensar no puide durmir oras i oras. En mi esuenyo, mi padre me estava yamando: ‘Tu sos el chiko de la famiya, ven asyende esta kandela’. Enduna me esperti. Vyendo los puerkos, empesi a yorar. Esto no puediya kontinuar ansina. Me alevanti, i empesi a bushkar un lugar para asender la kandela.
En el etaj ariva de la klisiya, aviya una eskalera ke se suviya para alimpyar la chimeneya. Pensi si suvo esta eskalera, dingunos no me pueden ver. Suvi la eskalera, kiti la kandela de la aldikera, i la asendi. Empesi a dizir la orasyon de Hanuka. Todos los suvenires me estavan pasando por los ojos. Akel punto, el geto, el friyo, la ambyertura, todo se disparesyo de mis ojos.
Enduna, una mano en el ombro me izo espertar de mi esuenyo. Era la mano de Peter. Peter era un myembro de la klisiya. Pensi, Peter me apanyo asendyendo la kandela, no me puedo fuyir mas muncho. Abolti la kavesa i le dishe a Peter: ‘Si, yo so judyo, aki me eskondi, i komi de tu komida. Agora vate i yama un soldado alman, mas nada no tyene emportansa por mi’.
Las lagrimas empesaron a koryer de los ojos de Peter. Unos kuantos puntos estuvimos kayados, yo kon kuryozita, Peter yorando. Duspues me disho: ‘Ven asenderemos la kandela endjuntos’.
Los dos endjuntos empesimos a dizir la orasyon de Hanuka. Akel punto, las dos solombras en la pared se izyeron una grande solombra.
Comments