El diya de Santo Valentino empeso en la epoka del İmperio Romano. Debasho del governo del Emperor Klaudio II, uvo munchas gerras i matansinas. Klaudio el Kruelo tuvo munchas difikultades para unir los soldados y enbiarlos a las gerras. Klaudio se penso ke los ombres no se kerian ir a gerreyar porke eyos no keríyan espartirsen de sus mujeres o de sus namoradas. Komo resultado, Klaudio kito una ley mueva diziendo ke no va aver mas dingun kazamiento o espozoryo en Roma.
En la mizma epoka, aviya un papaz en Roma ke se yamava Santo Valentino. Santo Valentino estava kazando los mansevos en sekreto. Ma malorozamente, su sekreto fue deskuvrido i Santo Valentino fue matado. El diya ke Santo Valentino fue asasinado era el 14 Febrero del anyo 270.
El mezmo diya, antes de ir a la muerte, Santo Valentino desho una letra a la ija del gardian ke lo aviya ayudado en la prizion. En esta nota Valentino la remersio por su ayudo i por su amisdad, i debasho de la letra eskrivyo una nota ‘’El amor de tu Valentino’’.
Esta nota empeso el kostumbre de embiyar mesajes de amor en el diya del Santo Valentino. Kada anyo en este diya, todos ke se akodran de este evenemento se embiyan mesajes de amor, poemas o regalos de parte i de otra. Este evenemento amostro ke ‘’el amor nunka pode ser vensido’’.
Tu B’Av, el kinze del mez de Julyo, es ’el diya del amor’ en İsrael. Este diya es un diya de fiesta antiko i moderno. En la epoka del Segundo Templo, Tu B’Av era nombrado komo un diya de alegriya, i en akel diya, las mansevas se vistiyan fostanes blankos, i baylavan en las vinyas para topar novyos. Este diya se empeso a fiestar de muevo en el estado moderno de İsrael, en los dalkavos anyos.
En la Mishna, Rabban Shimon ben Gamliel size: ‘No ay mijor diyas por el puevlo de İsrael ke el kinze del Av i el diya de Kippur’’.
Tu B’Av, komo las otras fiestas djudias, empesa la noche del kinze del mez, ke es la noche de luna yena, en el kalendario lunar. En las kulturas antikas, la noche de la luna yena se viya komo una noche konveniente para la romansa, el amor i la fertilidad..
En los dalkavos anyo, en esta noche se aparejan en Israel festivales de kantes i bayles. Los mansevos i las mansevas se visten de blanko, i la fiestan kon alegriya. Ma, este diya no es un diya de konje; es un diya de lavoro. Esta fiesta no es una fiesta relijioza komo las otras fiestas.
Tu B’Av es solo una kostumbre kedada de las kulturas antikas, ke se selebra kon alegriya i kon amor en el estado de İsrael.
Comments