Pokos diyas kedaron para la seremoniya de djura del presidente elijido Donald Trump en Washington. Komo siempre en un dia yelado de invierno en medyo de la kaye este sinyor tan eskuchado por el mundo entero despues de prometer de servir la nasyon Amerikana de los Estados Unidos (USA) ampesara su lavoro de dirijente no solo de su payis ma del mundo entero, espesialamente del oksidente.
Mizmo antes de ampesar su misyon, en estos dalkavos diyas iso deklarasyones sovre las kualas para la sovguardia de su payis el propoza a la Danimarka de merkarle la mas grande isla del mundo, el Groeland. Ademas akuzando los dirijentes Panameyanos de permitir a los Chinezos de kontrolar el Kanal entre los 2 okyanuses, de meter mano sovre el en afirmando ke el fue fraguado por el USA al empesijo del siglo pasado. Koza ke no koresponde a la verdad, visto ke los Chinezos posedan imensyos depos en este payis onde stokan sus produktos para ser vendidos en los merkados de las Amerikas. Ez normal para los vapores chinezos de pasar por el kanal.
Donald Trump no eskapa de deskrivir sus intisyones, dize ke se siente kontente de ver el presidente Trudeau del Kanada de demisyonar de su posto, visto ke el lo trato no de prezidente ma de governador del Kanada porke este imensyo payis kon muy poka povlasyon un dia en su avenir devra ser el 51en payis federado del USA.
Vinyendo a la Evropa Unida del oksidente, Trump menasa a sus 29 miembros de no protejarlos mas del perikolo Ruso si eyos al seno del Nato no partisipan de manera aktiva komo el lo dezeya, para tener armadas fuertes de defensya. La prezensya militar del USA en Evropa no va ser mas el eskudo ke fue mentenido fin oy en dia kontra el rejim komunisto, amenas ke los gastes de esta fuersa sean echos en grande partida por los evropeyos mizmo. La presidente del Banko Santral Evropeo, la sinyora Christine Lagarde proposa a ke los miembros de la Evropa Unida merken sus armamientos, el gaz likiefiado ke nesesitan i mas produktos de konsomasyon del USA, para azer un jesto i kalmar las intisyones izolasyonistas de Donald Trump.
Del espanto ke el presidente Trump puede meterse en sekreto, de akordo kon el presidente Putin de la Rusia a arestar la gerra ke kontinua entre su payis la Ukranya i la Rusia Volodymyr Zelensky ampeso a propozar rezolusyones pasifistas, koza ke avia refuzado a la administrasyon Biden. Se ve ke la gerra ke kosta miliardas de dolares al kontribuavle amerikano ke mira de protejar la Evropa libera, devra eskaparse malgrado ke la Rusia guadrada una partida de la Ukranya Rusa.
De otra parte, en el Medyo Oriente Donald Trump mostra poko entereso a topar remedyo al konflikto Israelo-Palestiniano. Para el lo mas importante es ke la normalizasyon de las relasyones entre Israel i todos los payizes arabos i muzulmanos sean echos durante su mandato. Durante su primera kadensya el rekonosyo Yerushalayim komo kapitala de Israel i su soveneredad en el Golan. Es probavle ke en los diyas vinideros el rekonoska la soveneredad de Israel sovre Yehuda i Shomron i ke sigue la politika de Binyamin Natanyahu de empidir el Iran de poeder fabrikar la bomba atomika en atakando sus instalasyones. Ademas es probavle ke la defensya de entrada de sujetos de siertos payizes arabos al USA sea de muevo establisida, despues ke la administrasyon Biden la avia anulada.
Eske todas estas menasas verbalas de Trump se trokaran en viendo al ke siertas de eyas no se pueden realizar, una ves ke el ampesara a okupar su posto? Es posivle, ma la mayoriya de los dirijentes mondiales son septikos a este sujeto visto ke Trump deklara sin arestarse ke el USA será grande de muevo, lo ke kere dizir fuerte i si se puede ajustar ‘imperial’. La porta boz de Trump en pasadas deklaro en diziendo: Los payizes etrajeros devran pensar dos vezes antes de no tomarmos al seryo, pensamos ke la Amerika será respektada i esto ayudara a ke el mundo seya mas seguro.
Otros manaderos politikos pretenden ke para Trump el prinsipal adversaryo del USA es la China i por esta razón su langage es agresivo kontra el. No se save ke manera de prekosyones tomara kontra este grande payis en kestyones de ekonomiya, de enerjiya i de komersyo. Este komporto da en mizmo tiempo espanto a los aliados tal el Kanada, el Danimarka, el Panama por ke la personalidad de Trump no es stavle.
No solo la China es mostrada kon el dedo, los payizes aziendo partida del BRICS tal la China, la Rusia, la India, el Brazil i la Afrika del Sud esgolman la mizma akuzasyon de kerer remplasar el dólar kon una otro valor komersial. Si esto será el kavzo el USA aplikara 100% de taksas a las importasyones de todo modo de produkto viniendo de estos payizes. El Ayifto, el Iran, la Etyopia i Los Emirates ke keren azer partida del BRICS devran pensar seriozamente antes de tomar sus dechizyones.
En konkluzyon se deve entender ke Donald Trump ovra komo un buldozer a trokar munchos prinsipyos en las relasyones internasyonalas los kualos pueden paralizar el orden mundial si son aplikados. Eske se topa un antidote a esto? ¡No lo se dirlo!
Por el Dr. Selim Salti
Commentaires