(Teksto-Audio)
A la okazyon de la komemorasyon del 50en aniversario de la gerra de Yom Kipur este anyo se izo moda, todos los ke sufrieron de este maldicho akaramyento ke el buto era de destruyir Israel, de kontar los momentos difisiles ke tuvieron sea komo soldados sea komo paryentes. Mi mujer i yo somos de los ke fueron markados por la vida, komo paryentes ke pedyeron un ermano el primer dia del konflikto en el Golan. En akel tiempo moravamos en Estambol, i Hayim Taragano ermano de mi mujer bivia en el norte de Israel en el kibutz Neot Mordehay, rezin kazado el era un miembro muy aktivo del kibutz. El avia servido en el Sinay i en el Kanal de Suez durante todo su servisyo militar despues de la guerra de 6 dias. Visto su kapachidad el fue nomado shef serjente i fue yamado a azer su meluim (servisyo de reserva) kada anyo.
Malorozamente sin ser aparejados komo se devia el koryo al Golan, el dia mizmo de yom kipur, ke era serka del lugar onde bivia i tomo en mano sus soldados sovre 2 ‘halftrack’kes (karro armado) i se hueron al lugar ke devian defender. El primer karro fue tokado por una bomba. Hayim poko minutos mas tadre koryo verso el karro a mirar si algunos dainda eran bivos i ansi fue matado por una segunda bomba ke le kayo enriva.
Mozotros el dia de kipur resivimos la nuvela de la gerra por muestro vizino turko ke avia vinido a informarmos del atako de los ejipstyanos i de los sirianos, koza ke no asperavamos i ke mos areboltoneo la sangre. Presto mirimos de telefonar al kibutz ma fue sin resultado el dia entero. Sovre esto mos metimos a oyir la radyo ke no se arestava de dar informasyones ke los arabos ganavan tyerras en el Sinay i en la Galile. Imposivle de poder durmir i a la demanyana del treser dia el tiyo Lazar de mi mujer mos yamo para dizirmos ke Hayim kayo i ya no esta mas.
El momento fue muy brutal mi mujer ke estava al lado de mi i ke avia oyido ka konversasyon ampeso a echar gritos de dezespero i de asentarse en basho en el koridor en el kual mos topavamos en yorando sin arestarse. No savia kualo azer tanto el shok me avia tomado la kavesa. No me alvidare nunka de esta shena ke duro serka una ora i ke fue gravada en mi memoria, de la kuala me akodro kon tristesa dainda oy en diya. Orozamento ke resivimos una mueva yamada telefonika de mi ijo Hayim, ke se topava en muestro apartamente de Ramat Aviv ke kon koraje mos demando de rogar por la alma de su tiyo ke se sakrifyo por la patria. Alomanko sintiendo la boz de su ijo Mimi mi mujer se kalmo i es ansi ke podimos demandar de una prima serkana de mi eshuegra de ir a informar mis eshuegros. Difisilmente dias despues podimos avlar kon Anat mi kunyada ke avia kedado bivda a la edad de 21 anyos. Dias enteros la kaza se incho de miembros de la famiya, de amigos i de konosidos ke no mos decharon un solo momento solos.
6 diyas despues en mi kaza onde aviamos alikodado muestros paryentes resivimos la vijita de un diplomato israeliano ke prezanto a la famiya Taragano las kondoleensyas de la armada israeliana(Tsahal). A la fin del konflikto mos fuimos 2 vezes a Israel para los funarales durante los kualos mi kunyadiko fue enterrado en la segunda ves en su kibutz. Dezde de akel tiempo no mankamos kada anyo, toda la famiya de toparmos Yom ha Zikaron (dia de komemorasyon) kon todos los miembros del kibutz para vijitar su tomba, ke se topa allado de otros miembros ke kayeron en las gerras kontra los arabos.
En demandándome kualas fueron las konsikuensas de esta gerra ke kosto la muerte de 2600 almas djudiyas me konvensi ke el governo de Golda Meir i la entelijinsya en jeneral inkluindo el Mossad se yerraron de no tomar las prekosyones demenesterozas para ser prontos kontra los atakos de los arabos. Esto fue una buena lisyon para Tsahal ke se ambezo de ser siempre pronto mizmo oy en dia. La lucha para sovreguardar el uniko payis djudyo no se eskapo, dunke devemos estar prontos dia por dia, ora por ora para defenderlo.
Ademas el resultado de esta gerra mos trucho la pas kon el Ayifto visto ke Anuar Sadat se rendyo kuento ke mizmo kon surpreza atakar Israel no servyo a nada i ke Arik Sharon verso la fin del konflikto estava pronto a entrar al Kairo en rendyedo su tresera armada prizonyera. Por kontra en vijitando Yerushalayim el rekupero el Sinay i abolto su jaketa en abandonando la Rusia Komunista en azyendose amigo de Los Estados Unidos. Pas ke dura dezde 45 anyos i malgrado la yelor de sus abitantes el Ayifto se izo un buen kliente de Israel donde la ekonomiya entre los dos payis puja de dia en dia.
Yom Kipur sono la kampana de la disparisyon de la Rusia Komunista. Su armamiento i sus jenerales ke formaron las armadas arabas fueron vensidos por los jenerales israelianos i por el armamiento amerikano ke Isralel avia resivido. Regan kontente de la viktorya israeliana i de ver la superyoridad de su armamiento avia deklaro la fin serkana del komunizmo i ke la Rusia komunista i su bloko estava pronto para despareser en serka. Es ansi ke la Rusia ke deteniva 2 milyones de djudyos en prenda podyeron emigrar en partida a Israel i al oksidente.
Los trokamientos al interno de Israel fueron munchos, ma el grande kambyo fue la disparisyon de la lira israeliana ke fue remplasada por el shekel despues de 2 anyos de una grande inflasyon i el trokamiento de la vida i del sistem en los kibutzes ke en mayoría se privatizaron despues de la krizas ekonimikas onde estavan serka la falita. Ansi la nechama i el esprito sosyalisto disparesyo del tablo politiko-sosyal en Israel.
留言