TRISTE KOMEMORASYON
- Dr.Selim SALTİ
- 1 Nis
- 4 dakikada okunur
Este anyo no uvo una komemorasyon ofisiala del akordo de Camp David entre el Ayifto i Israel sinyado ay 46 anyos. Dingun dirijente politiko sea israelyano komo ejipsyano no toparon un momento libero de telefonarsa para akodrar este akordo i felisitarsen de su mantenimiento entre los dos payizes los kualos son los 2 mas importantes aktores en la politika del Medyo Oriente. El fue echo el primer entre un payiz arabo i Israel.
Kuryozo de no sintir una deklararasyon de las 2 partes a este sujeto tanto importante para Israel i para el Ayifto. Mizmo los de Washington se estuvieron kayados, portanto sin Los Estados Unidos de la epoka de Carter nunka seriya realizada esta paz entre los 2 payizes inimigos onde sus povlasyones malorozamente nunka se aserkaron la una de la otra.
Devemos de entender ke esta paz yelada no egziste entre los dos puevlos ma solo entre las 2 administrasyones governamentalas. Entonses dire ke sovre la doktrina de Los Ermanos Muzulmanos (E.M.) establisida por su líder el ejipsyano Sayyid Qutb, el kual dekreto publikamente la establizasyon de un Wakf (fundasyon relijioza) sovre la Palestina entera, esto sinyifika ke esta tyerra apartyene no solo a los palestinianos ma enteramente a la uma muzulmana. Mizmo los arabos palestinianos devran achetar sin falta ke azer pas kon Israel es un akto kontra la relijiyon muzulmana. Koza ke fue adaptada sin falta por el Hamas i el Djihat islamiko en Gaza. Por esta razón Anwar Sadat fue asasinado por uno de los ramos armados de la konfreriya E.M. Ni el islam ni el Koran no diktan un semejante diktat de krear una tala fundasyon, ma esto no empide a los inimigos de la paz de intosegar la kaye ejipsyana, la kuala siempre se topa sovre la presyon de la propaganda antisemita de los E.M.
Siertos analizadores politikos espesialistos del Medyo Oriente en Israel espulgaron miles de publikasyones sovre lo ke fue i es eskrito en la prensa ejipsyana espesialmente en el jurnal el mas popular del payis Al-Ahram i en el Al-Gomhuria ke apartiene al governo ejipsyano sovre Israel. Los estudyos ke fueron echos mostran ke los artikolos eskritos sovre Israel, el 85 % eran negativos i antisemitikos, no solo simplas kritikas politikas ma kontenyendo dichas antisemitas klasikas. Ke los djudyos son muy amorozos de dinero, en jeneral desleal, ke el djudaizmo es una relijyon falsa bazada sovre mitos i mas.
Aktualmente la situasyon en la frontiera entre el Ayifto i Gaza esta bastante delikada. Dezde ke Israel okupa la banda sud de Gaza, la armada ejipsyana, malgrado el akordo de pas, ampeso a akumular muncha fuersa militar del espanto ke Israel pushara a los de Gaza a pasar al Sinay. Komo savemos Trump avia demandado del Ayifto de alikodar los abitantes gazauis en kavzo ke kereran egzilarsen. Koza ke fue kategorikamente refuzada por el prezidente ejipsyano Abdel Fattah Al-Sissi. El no solo refuzo esta propozisyon, mizmo refuzo de ir a Washington a renkontrar el prezidente Trump. Ansi los manaderos politikos mondiales se demandan si Trump en kavzo de no achetar sus demandas le va kortar su ayudo ekonomiko en metyendolo en estrechura aryento del payis ke tiene oy mas de 100 miliyones de abitantes, por lo mas muy proves.
Anyos en Israel la paz echa por Begin i Sadat fue vista komo temporarya visto ke la inimista del puevlo israeliano fue muy grande despues de la gerra de Sinay. Mizmo los politikos los mas pasifistos se rezervaron de kerer tener relasyones serkanas kon los ejipsyanos. Nunka fue posivle de krear kontaktos de puevlo a puevlo i esto no fue i no es del todo bien para Israel. Mira el kontrasto ke egziste entre las relasyones de Israel kon los payizes ke sinyaron los akordos de paz Avraam i estas del Ayifto. En poko tiempo el turizmo, las relasyones ekonomikas, komersialas i siantifikas ke dezveloparon kon estos payizes son superyores a las ke fueron i son echas kon el Ayifto.
No ay menester de repetar ke la diplomasiya puede remplasar la gerra, basta ke ayga la voluntad de mantenerla. Ma oy malorozamento manka un dialogo entre las partidas ejiptyanas i israelianas de tener una kooperasyon para poder pratikar una diplomasiya publika al nivel de las povlasyones koza ke trokara pozitivamente la relasyon de vizindado tan importante. Ansi krear un dialogo de edukasyon ke nunka fue propozado. Esto permetera a ke la paz yelada dispareska al nivel de los puevlos i de sus governos.
La kestyon ke devemos apozar es komo el Ayifto i Israel pueden fraguar de muevo la konfiyensa de ser buenos vizinos. Bien entendido esto no va ser fasil. La kestyon de Gaza i la mankura de konfiyensa no dispareseran en poko tiempo, ma basta de tener la voluntad de no gerreyar para ke la amistad venga en frekuentandosen kon konfiyensa. No olvidar el rolo de los Estados Unidos el kual dará su apoyo para un entendimiento entre los partidos nesesaryo a este situasyon non agradavle en la kuala mos topamos. El ayudo de Los Estados Unidos es mas de importante si se kere ke los akordos de Camp David kontinuen entre inimigos ke avian dechizado de asentarsen en una mizma meza ay anyos para azer la pas. No olvidar la erensya ke mos desharon Begin i Sadat.
Por el Dr. Selim Salti
Comments