La barva es sembolo de maskulinidad i virilidad. En mismo tiempo uno ke tiene barva es konsiderado komo persona savio i onorable, siendo haham, imam, papaz o kualken ombre de relijyon. Ansi es ke muestros antepasados utilisaron munchas dichas i palavras kon “barva”. Vini konoseremos unos kuantos de estos:
· Al la eskola kon bavas, al fierrero kon barvas. La kreatura en su chikez i manseves deve de estudiar, i solo kuando se engrandese i toma su edukasyon deve de empesar a lavorar.
· A poka barva, poka verguensa. Las faltas i errores de los mansevos son akseptables i konsiderados kon mas toleransia.
· Barva kon barva se respektan. Los respektables se respektan entre eyos.
· El Dio da bervas al ke no tiene keshadas. El Dio da Buenos i rikezas a los ke no saven utilisar los. – Rebelyon sovre la injustisya del destino.
· El Dio ke te de lo ke le dyo a la kavra: kuernos i barva i una kola larga. Modo de maldisyon umoristika.
· El gato se vido kola, i el se vido barva. Se dize por persona non respectable, muevo riko o sin buenas maneras.
· El ombre, barvudo torno ma prenyado no. La natura del ombre no torna.
· Ken barvas ve, barvas onoran. Ken se engrandese i bive kon viejos, onora los viejos.
· Kitarlo de la barva, meterlo al mustachio. Meter en en otro lugar improprio.
· Kuando el molinero se sakuda la barva, le sale una bogacha. En estando kon persona rika se puede profitar, mismo si es un pokito.
· Mas vale rabino sin barva, ke barva sin rabino. El savio es respectable, mismo sin brava.
· Un pelo de kada kavra, se aze una barva. Chikas kozas en grande kuantidad obtienen presyo.
· Vites la barva del vizino kemar, mete la tuya a mojar. Toma tus prekosiones en egzemplio de los otros.
· En ke se le va al tiyo Moshon? En kitando i kakudiando la barva. En no aziendo nada… tiempo pasado en baldez i bavajadas.
· Si mi vava tenia barva, iva ser mi papu. Un chiko detalyo puede trocar todo.
· No te peleyes por la barva del vizino. No tomes pena de peleyar pos kavzas ke no son tuyas.
Dichas i ekspresyones:
* Arankarse los pelos de la barva. İnyervarse muncho
* Araparse a la barva de… Profitar de una persona.
* Entregrar la barva en manos ajenas.
* Golor de kemado, barva de tu kunyado.
* Ir asta la barva del rey. Aplikar asta la mas alta otoridad.
* Kitar la barva del lodo. Kitar de verguensa.
* Ya le kresyo la barva. Ya se engrandesyo.
* No tengo barvas para ke me sientas.
Comments