Dospues de pasar una puntada i una semana de ospital, baruh ashem ya esto en mi kaza. Ya me reuni kon el komputer i empesi a eskrivir.
Oy mos alevantimos kon una ermoza inyeve ke ay kuantos invyernos ke la dezeyavamos. La vista es muy ermoza ma diya entero no vamos a mirar por la ventana. En este tyempo ke se aze, se melda livro, se oye muzika, se mira filmos.
Komo ay kaji tres semanas ke estuve hazina i desfuersada todo se izo dariva abasho.
En enderechando los kashones me vino a la mano unos kuantos tekstos de teatros ke tengo djugado. Tengo un almaryo yeno de tekstos. 35 anyos no es poko, es una vida.
Los jurnalistos demandan a los profesyoneles
“Kual rolo es mas presiozo para vozos”
siempre responden la mezma repuesta:
“Todos los rolos son muestros ijos”
Yo no me va meter en grado de profesyoneles ma es verda. Kada rolo tyene su plazer. A mi syempre me plazyo djugar vidas reeles.
La vida de SARAH BERNHARD, me enfluenso muncho i la djugi kon grande plazer.
El perde se avriya kon efekto de palmas i empesava kon estas palavras:
“Una vida sin arte a kualo parese
El arte alarga la vida
Komer, bever i echar a durmir es vida?
Si es solo esto para kualo bivir largo
Si en la vida no ay arte, todo es vano muy vano”
Sara Bernhard nasyo, en 1844 en Fransya. Eya era la grande de tres ermanas nasidas de madre djudia i de padres diferentes dekonosidos.
La madre dospues de la paridura torno a su echo ke era asperar ombres en las kayes i la desho ande una mujer ke le de leche. Apenas tenia 3 anyos el balabay ande estava bivyendo se muryo. La mujer para mirar a sus 2 ijos i a Sara, fue ovligada de kazarse kon un borachon. El borachon la estava aharvando i maltratando a Sara, estava muy malaroza. Un dia ke vino la tant a verla, kijo irse kon eya ma i la tant lavorava en mizmo echo kon la madre no la tomo i se fue. Sara yoro grito i se echo de la ventana. Malorozamente esta kayidura le kosto muy kara i kedo por la vida entera kosha.
A los 11 anyos la madre la tomo de esta mujer ke mas no la keria i la yevo a un monasteryo en Versailles. Las söres de el monasteryo la izieron baptiz i le disheron de agora endelantre sos kristyana. Ma Sara siempre disho:
“Yo nasi de madre djudia so djudia”
Un dia un amante de la madre vino a vijitarla, le disho ke la va yevar al teatro. Sara dia entero aspero ke se aga denoche.
Kuando entro al teatro i vido la ermozura del perde kolorado, las luzes i los kostumes salyo de aya echizada. De vista se desido de meldar en el konservatuar. Komo tenia talente gano i lo eskapo antes de todos. Empeso a tomar rolos chikos i negros. Ma este ofisyo es muy kruel i sin piadad, primeros tyempos no estava muy reushida, vino noches ke se echo ambierta i desiluzyonada, se dyo a bever i a ir kada noche kon ombres.
Una noche ke estava en koma de bever, vino ALEXANDRE DUMAS la yevo a un ospital la suanyo i la salvo.
Dospues la yevo a Bruksel. En djugando en un teatro de Brüksel se rankontro kon un prens. Prens Henry de Danimarka i tuvo un ijo de el, MORİS.
Por siguro el prens la abandono, eya kedo sola kon el ijo ma no se demoralizo se dyo al lavoro porke tenia dos dezeos, uno de engrandeserlo a MORİS i otro de avrir un teatro a su nombre.
Dia i noche lavoro, unos de sus rolos HAMLET- AİGLON – LA DAMME AUX CAMELİAS – TOSCA.
A la fin parvino a avrir su teatro SARAH BERNHARD.
Los anyos pasaron, las dolores de la pacha le pujo, malgrado ke estava hazina i aedada tomo un rolo en un filmo de LEON ABRAMS ma el tyempo no le abasto para eskaparlo el filmo.
Sara muryo en el anyo 1923’a 79 anyos en Paris.
La pyesa eskapava kon estas palavras:
“YA VİNO LA FİN DE Mİ VİDA ME ESTO YEVANDO KON Mİ,
MİS AMORES, MİS AMARGURAS, MİS PEKADOS İ MİS YERROS.
YO SARAH BERNHARD, ARTİSTA DE TEATRO, SO DJUDİA PORKE SO NASİDA DE MADRE DJUDİA.vinyeron a sus kazas, rogamos todos los ke kedaron vengan sanos i rezyos a sus tyerras. Amen.
Forti BAROKAS
Comments