Naftali Stern, un sovrebiviente del Olokosto, tres mezes antes de su muerte, vijito el Yad Vashem kon un sako yeno de ojas arazgadas. En estas ojas, estan eskritas las orasiones de Roshashana.
Naftali Stern biviya en Romanya antes del Olokosto. En el anyo 1944, Naftali, su mujer i sus kuatro ijos, fueron deportados a Auschwitz. Su mujer i sus ijos fueron asasinados en las kamaretas de gaz. Naftali, komo akeyos diyas era un mansevo forsudo de 34 anyos, fue deportado a Wolfsberg, un kampo de lavoros forsados en Alemanya.
El diya de Roshashana se estava aserkando. Naftali empeso a pensar komo ivan a pueder azer los servisios de Roshashana. A la fin, topo una solusion. Iva vender su rasion de pan para pueder obtener un kreyon i unos kuantos sakos de papel. I ansina fue. Naftali aranko los sakos de papel, los izo ojas una a uno, i empeso a eskrivir las orasiones de Roshashana enriva de los papeles.
Noche de Roshashana, el enkargado Nazi, les permetió de reunirsen, i de komer endjuntos sus rasiones de pan. Naftali ke era un kantor antes la gerra, distribuó las ojas, una a una, a sus amigos, i ansi, todos endjuntos meldando a boz alta i kon grande entuziazmo, akeya noche pudieron azer las orasyones del anyo muevo.
Los sovrebivientes dainda se akodran de este evenimiento komo un momento espesial en la vida del kampo.
Naftali guadró estos papeles en su puerpo, asta su liberasion. Asta el anyo 1978, kada Roshashana, en las orasiones de la fiesta, Naftali estuvo detenyendo estos papeles en la mano derecha, komo un artikolo muy presiozo.
En el anyo 1978, en prezentando estos papeles a Yad Vashem, Naftali Stern disho ke estos dokumentos son muy emportantes para las jenerasiones futuras, para ke veygan komo los judios, mezmo en los diyas terivles del Olokosto, mantenieron la identidad judia, i nunka no peryeron la esperansa.
Kada anyo, para tomar parte en la edukasion del Olokosto, el diya del Olokosto, mas de un milion de sovrebivientes en el mundo entero, vijitan el Yad Vashem.
En aziendo el tur del Muzeo del Olokosto, todos los vijitantes ven los papeles de Naftali Stern, tambien miles de otros dokumentos, kada uno de estos dokumentos, kontando la propria estoria de la viktima, kon su propria sinyifikasyon espesial.
Akel diya, kada judio sale del Yad Vashem, spiritualmente riko, i prometiendose de enforteser la komunidad judia, gerreyar kon el antisemitizmo, i la intolerensia.
Kada diya, el Yad Vashem reafirma su promesa a Naftali Stern, i a todos los otros sovrebivientes, de kompartir sus istorias kon el mundo entero.
Dora NİYEGO
Comments