En bushkando un artiklo en el google, por koensidensya enkontri una vida de una mujer muy presyoza, una mujer dedikada u un echo muy duro, a los estudyos sereblares i el alzeimer. RİTA LEVİ MONTALCİNİ.
Rita nasyo en una famiya djudia tradisyonal kon su ermana buchuka Paola, el 22 avril 1909 en Turin İtalya.
El padre era enjenyor de elektrisita i la madre pintora.
En su chikes, le plaziya meldar livros de literatura i teniya dezeo de azerse una grande eskritora. Ma kuando muryo un serkano de su famiya de kanser, renonsyo de la literatura i se eskrivyo a la fakulta de medisina de la universita de Turin İtalya. Apenas teniya 20 anyos desido dedikarse a la siensya, malgrado ke su padre no keriya ke su ija lavore en este ofisyo. El padre keriya ke melde universita, ke se kaze i tenga kriaturas. Ma Rita no oyo a dingunos i kamino en su kamino.
Kuando se diplomo, empeso a lavorar komo asistente de Giussepe Levi en norosiensya. Estava sigura ke iva tomar una karyer akademika ma malorozamente Benito Mussolini defendyo las karyeras akademikas de los djudyos.
Rita no detuvo su lavoro i kontinuo su investigasyon en su kaza en su kamareta de echar ke la formo komo laboratuar, malgrado ke no era sufizente para lavorar.
Esto lo konto en una konferensya i remersyo a Mussolini porke la arebacho ke es djudia, ke es de una rasa inferior, este ensulto le dyo ambisyon de estudyar mas.
Rita, kon estas kondisyones empeso a estudyar las fibras nerviozas de los embriyones de las gayinas.
La gerra mondial estava kontinuando, i los djudyos estavan en perikolo. Para no ir a los kampos de konsantrasyon i kedar bivos, eya i su famiya, fueron ovligados de fuyirsen al sur de Floransa.
Rita ayi mezmo no kedo de lavorar, enstalo una laboratuar en su kamareta de echar. Dos anyos despues kuando ya eskapo la sigunda gerra mondial, torno a Turin i resivyo una envitasyon de la universita de Washington i empeso a lavorar kon el profesor Viktor Hamburger. Esta envitasyon era solo por un somestre, a su mazal kontinuo 30 anyos i realizo unas ovras muy emportantes, kon este lavoro, tomo el titolo de profesor.
Durante sus estudyos klinikos, Rita deskruvyo munchos medikamentos para dolores, para enflamasyones de meoyos, mezmo para syertos kanseres. Eya tuvo una vida muy eksitada seya en la polítika seya en la siensya.
En el anyo 2001, fue eskojida por senatora por el presidente italiano Carlo Ciampi.
Eya era ateista, a los 97 anyos, partisipo a la avyertura de las eleksyones del Senato i deklaro su apoyo al partido de syedra.
Por este movimyento fue kritikada por el patido de la derecha, i fue akuzada de tomar parte de un governo semejante .
Rita Levi-Montalcini fondyo el Instituto Europeo de Investigasyon de meoyos i fue la prezidente munchos anyos, resivyo el títro Honoris Causa de la Fakulta Biomedika de la Universida de Turín.
Rita, a los 100 anyos, mostro ke su meoyo fonksyono byen fuerte toda su vida, demostro ke ser retretado es asperar la muerte. Syempre disho ke las rugas de vejes son, solo en el puerpo i no en el meoyo. A estos anyos mezmo asisto a todas las konferensyas i kontinuo a partisipar a todos los seminarios sukursal.
Rita Levi Montalcini muryo el 30 Desembre en el anyo 2012 a los 103 anyos.
Comentários