(Teksto-Audio)
(Yazarı sesli dinlemek için tıklayınız)
En mi çikes kuando viniya purim, era la novela ke ya esta vinyendo enverano. Mi nona kuando viniya purim mos merkava dulsuryas de purim, mavlachas, korasones i sestikos yenos de dulsuryas ke se vendiyan en medio la kaleja en la Kula, los vendedores gritavan: “por aki purim! Por aki purim!” Era otra alegria i se viya los moedes.
Kon esta pandemiya estamos mas muncho enkaza, por no tener keazer vo aziendo kachones. So bien ordenada ma lo maz ke me plaze es los almaryos ke tengo los textos de teatros. Puedeser ke vos vaja riyir, yo guadro unas kozas ke para otros es bavajadas ma para mi tyene muncha valor. Por egzempyo una letra de remersimyento, un papeliko eskrito por una amiga vieja u bien una karta de aniversaryo. El mas grande plazer miyo es, mirar las datas. Munchas vezes una eskriturya me aze riyir i munchas vezes me aze yorar. En metiendo kada koza a su luguar topi un texto, si no me yerro mo lo aviya dado İzzet Bana i lo teniyamos djugado un Purim en el lokal vyejo del Dostluk. El texto kontyene la estorya de Purim, eskrita en el anyo 1873, djugado de parte de los djudios de Salonik en el 1940. Mozos la djugimos en 1996 yo Ester a Malka i mi servidera era mi kerida amiga Soli Avigdor. La piesa empesava ansi.
ESTER---- Oh komo esto enkyeta por mi tiyo Mordehay
Mi alma me se apreta no lo vide tres dias ay
A Lea mi konfidente embiyi por saver del
Guardalo oh dyo potente dyo piadoso eternel
LEA------- Mi reyna! vengo de ver su tiyo Mordehay, estava vestido
de sako, triste i aziendo orasyon.
ESTER—Ma ke akontesyo?
LEA------ Yo le prunti por repuesta el mostro un orden del rey
ESTER—Diziendo?
LEA-------Ke todos los djudios deven de ser exterminados, el 13 adar ningun djudio deve kedar bivo
ESTER--- Dime Lea, ke se poede azer para kitar desta sekana nuestro puevlo?
LEA---- Mordehay dize, en ti tenemos la esperansa
ESTER—en mi! Ke puedo azer?
LEA------ va ande el rey Ahashverosh i demandale la salvasyon de tu puevlo
ESTER--- Lea ke dizes! Las leyes del palasyo son muy fuertes, ken tyene la ozadiya de ir ande el rey sin ser yamada… es kondanada a muerte.
LEA---- No pense su vida mi Reyna, del dyo se espanta u de un hombre? Su vida no es suya. Ken save si no es el dyo ke la izo reyna para ke akudga su puevlo… Ester! La salvasyon va vinir de eya… si no todos los djudios seremos desparesidos.
ESTER---- si Lea, Mi sakrifisio seya kapara por mi puevlo. Yo ire manyana ande mi rey Ahashverosh i le dire ke so djudia… djudia en el kuerpo i djudia en la alma
LEA----- koraje mi reyna koraje
ESTER--- Oh Dyo ayudame! Yo no tengo mas ke ti. Tu ke izites por nozotros tantas Nissim i niflaot no mos abandones ni esta ves.Te rogo de darme koraje i fuersa para savlar mi puevlo.
La pyesa kontinua kon la estorya de Purim ke la konosemos muy bien. Yo esto muy kontenta de tener un texto byen vyejo en el arshivo de mi kaza.
BUEN PURİM İ BUENOS ANYOS
Comments