(Teksto-Odio)
(Yazarı sesli dinlemek için tıklayınız)
Estos 3 sujetos fueron los mas importantes ke preokuparon, la anyada pasada, los espritos de los israelianos. La pandemia dereglo la ekonomiya del payis i los budjetos de la mayoriya de las famiyas, en despartes de la panika ke kreyo al seno de la sosiedad. Lo ke no se asperava del todo i komo un mirakolo,, fue el rekonosimiento de Israel por 4 payizes arabos koza ke areboltoneo la politika del serkano i Medyo Oriente i avryo kamino a una paz duravle en esta jeografia. Enfin la politika interna se dereglo una ves mas onde la ideolojiya sionista se alevanto por las oras de en medyo para dechar la liberta a los politisyanos de derecha komo de siedra de mirar sus enteresos politikos antes de los del payis. Israel va votar por la kuatrena ves en 2 anyos, en el mez de Marso de este anyo, por mo de los egos de los dirijentes aktualos i de akeyos ke se sintieron abandonados por Benyamin Netanyahu. En 2021 los israelianos deven ser akavidodos porke los sujetos negativos kontinuaran a ser prezentes malgrado ke se aspera surprezas agreavles en el domenyo de las relasyones kon los arabos.
La pandemia del Kovid-19 la areyevimos durante la mayor partida del anyo pasado i kontinuaremos a azerle la guerra para ke despareska si possivle, por su puesto todo este anyo. Kon la introduksyon del vaksin se espera ke el mundo no va sufrir mas de este virus. Komo una simple ekuasyon, tomar una hazinura ajustarle un vaksin eya se desparese en poko tiempo. Esperaremos ke esta ekuasyon será aplikavle a muestra eksperiensa kolektiva de oy. Supito ke una mayoriya de la povlasyon va ser vaksinada no va ser mas nesesaryo de karantinas, de maskas i kesharmos de los deputados de la Keneset i de las regulasyones establisidas por el governo, kuando kedamos achunkados en kaza. Miles de artikolos i prezantasyones fueran echas por la media a este sujeto koza ke kreyo reaboltonamientos emosyonales en la povlasyon i ansi el stres dereglo la vida sosyal del payis. Este fenómeno fue kavzante sovre lo ke mos ambezimos de la media, de pujar a bastansa la violensa matrimoniala, las tantativas de matarse i krizas de depresyon. Kada uno de mozotros selon mi, miramos de kontrolar el stres ke es diferente sovre la persona kon sus efektos buenos u malos .
Ademas el sitadino se siente mal kuando se apersive ke las otoridades del payis no le aze konfiensa en ovligando a pagar multas por no yevar maskas o irse mas lechos de 1 kilometro de su morada. Esto establisyo un dedenyo sovre los dirijentes los kualos devrian entender ke Israel no es un payiz ke deve ser dirijado kon’ baston’.
Kuando se trata de la ekonomia se espera ke eya grasias al vaksin va ampesar a normalizarse en kurto tiempo por ke Israel tiene una ekonomia de “high tec” ke le da la posibilita de adaptarse fasilmente al merkado. El pursantaje del dezempleo se aspera ke se estabilizera a 7 por siento muncho mas basho del de anyo pasado ke era de 20 por siento, malgrado ke es superior al 4 per siento de antes de la pandemia. La sola koza buena ke devremos akodrarmos del Kovid-19 es ke ambezo a lavorar de kaza i no estar blokado 2 oras en el kamino de la ofisina i de dechar respirar la natura i las hayas.
2020 fue el anyo onde el tema de paz favorizo a Israel. No se asperava ke justo en el momento onde el prezidente Trump peryo las eleksyones 2 payizes del Golfo Persiko el Bahrain i los Emirates Arabos grasias a su politika i el ayudo de su yerno Jared ,buen djudio amigo de la medina, rekonosyeron ofisyalmente a Israel. Estos 2 payizes rikos i politikamente influentes en el mundo muzulmano dechizaron de dezvelopar kon Israel relasyones ekonomikas i defensivas. Del espanto de ser atakados por el inimigo komun kon Israel, el Iran ,demandarons ayudo de los Estados Unidos juntos kon la Arabia Seudita. El petrol siendo el faktor dechizivo de defensya del establesimiento amerikano, eya no peryo la okazion de perkurar a formar aliansas entre la peninsula araba i Israel.
En este akordo de paz yamado ”Akordos de Avraam” manka la Arabia Seudita la kuala esta debasho de presyon direkta del Iran i de sus proksis yemenitos. Espantandose de la kaye araba el rey no kere ofisyalizar las relasyones kon Israel, ma no esta kontra una diplomasiya kayada kon el. El akordo de los volos de los aviones israelianos a traverso el territoryo seudito pruva las relasyones egzistentes. La reuchita de este akordo avyo kamino politiko para ke el Sudan payis afrikano muzulmano achete kontra siertos avantajes akordados por Trump a rekonoser Israel.
Poko tiempo antes el rey del Maroko Mohammed VI rekonosyo a Israel publikamente para ofisyalizar las relasyones kayadas ma kaentes ke egzistiyan dezde su padre Hasan II, ansi aviendo el kamino a la Tunizia i a la Aljeria a azer lo mizmo. Ora vino a ke los payizes muzulmanos ke no rekonosieron dainda Israel ampesen a achetarlo i rekonoserlo sin atadijo al konflikto israelo-palestiniano. Benyamin Netanyahu i su ekipa tuvieron fin oy en dia bastante de azer i meresen un regransamiento de la nasyon djudia i se espera ke el muevo governo ke se formara despues de la eleksyones kontinuara en el mizmo kamino. No alvidar ke sin los Estados Unidos Israel no podiya realizar tantos akordos kon los payizes arabos. Paz es buena koza i poko emporta si es kon el ayudo de los republikanos o demokrates.
La Keneset desidyo a una kuatrena eleksyon en manko de 2 anyos. En realita las 3 dalkavos eleksyones se asemejan a un referandum por Netanyahu onde el rezultado fue negativo por la razon ke el primer ministro aktual no le gusta governar kon muncha djente en su doredor. El es komo un lovo solitaryo ke mira de kasar solo. Los rezultados positivos diplomatikos provaron este akto de bravura.
Los sujetos sosyales los mas importantes son bazados en Israel sovre la ideolojia de siedra o derecha. El konflikto palestiniano, la aneksyon de los territoryos disputados, kon los akordos Avraam no enteresa mas los politikos porke el sujeto se kito por las oras de la ajenda del governo. Ademas la siedra israeliana ke dirijo el payis fina 1977 no interessa mas la povlasyon ke kon la viktorya de Menachem Begin se abolto a ser mas liberal, mas independiente en su ekonomia, mas konservativa ke pujo en kantidad, kaji dublo su nombre dezde 1977, para arivar oy en dia a mas de 9 milyones de abitantes, kon una majoridad djudia de serka 7 miliones. Kere dizir ke aktualmente en estas kuatrenas eleksyones la lucha para ganarlas va ser entre partidos de la derecha.
Oy en Israel egziste partidos idealistos komo el Likud, Yesh Atid, Meretz, Shas i mas i partidos konjoktureles ke son establisidos por politikos ke no poden avansar en sus partidos inisyales ma ke se sientes kapaches de ser elijidos i governar a un alto nivel. El partido de Ganz Blu/Blanko, el de Saar, Tikva hadasha(esperansa mueva) azen partida de esta kategoria. Estos partidos tienen vidas kurtas a menos de no tener una ideolojia fuerte de siedra o derecha. Gideon Saar es salido del Likud, kon una ideolojia mas a la derecha de Benyamin Netanyahu, dunke la kompetisyon entre eyos va ser bazada sovre vinir al poder komo el slogan popular mos ambeza” kon Bibi o sin Bibi”. Mizma situasyon para el lider del partido Yemina, Bennett. En todo kavzo no se aspera trokamiyentos importantes en los mandates de los partidos relijiozos o de la siedra i en la lista de los kandidados arabos. Netanyahu deve ser muy atantivo durante la kampanya de las eleksyones i mizmo despues, al sujeto del juzgo ke lo aspera. Avigdor Liberman viejo kolega de Netanyahu ma konkorente konvensido no le va azer la vida fasil.
El puevlo de Israel aspera ke los elidos de kualker lado sean, de okuparsen seriozamente de la pandemia,de la prosedura de paz kon los arabos una vez el prezidente Beden en poder, i de mirar de reglar la ekonomiya de este payis chiko ma riko i fuerte.
Commenti