OVLIGO DE DEFENDERSE

(Teksto-Audio)

(Yazarı sesli dinlemek için tıklayınız)

Estamos fin del mez de Septembre 2021, las fiestas se eskaparon i un anyo muevo empasa para los israelinos kon un muevo governo ke ya incho sus 3 mezes en poder. No podemos dizir ke los muevos dirijentes no reucheron o ke no purfiyaron a guadrar el kalmo en el payis. La mayoriya de sus okupasyones fue la pandemia del kovid 19 i de mirar a ke el ovligo de defender el payis de los inimigos palestinianos sea mantenido de una manera diferente del governo anteryor de Netanyahu. Para reuchir en estos temas, eyos fueron aktivos al interyor i a el eksteryor del payis sin arestarsen a vijitar o ser en kontakto kon los dirijentes de los payizes vizinos , de meterse en relasyon kon los responsavles de muestro aliado los Estados Unidos i mas.

Bien entendido la kompozisyon de este governo, no permete muncho al duo Bennett - Lapid de poder ovrar liberalmente sovre sus prensipyos. No es fasil de kontentar en mizmo tiempo los liberales, los konservatores i los diferentes sosyalistos sin ke ayga el espanto de azer kayer el governo visto las diferensyas de opinyones. Ademas la prezensya del partido Ram arabo al seno de este governo no fasilita las dechizyones ke poden ser importantes para el payis ma ke no konviene a la minoridad araba.

Israel a mi umilde opinión es un payis dubyozo onde la mentalidad ultra moderna i el atrazamyento kedado de los otomanos perduran sin ke esto sea trokado. De una parte somos kapaches de destruyir el sistema de produksyon del uranium del Iran kon un elemento sibernatiko , de la otra damos la impresyon de ser una republika de bananas por no saver komo impedir a teroristos sanginaryos de fuyirsen de una prizyon de alta seguridad. Mi ijo el bohor, ke se engrandesyo en Israel al kual le demandi sovre este estado sorprendente me respondyo en inglez: ” Well come to the Middle East”. (Bienvenido al Medyo Oriente). Lo ke kere dizir ke los israelianos no supieron eskabuyirsen después de 70 anyos de independensya, de la aplikasyon del sistema antigo turko ke rijyo la Palestina por 400 anyos i ke no es mas valivle. Dire ke ya vino tiempo de trokar sertas mentalidades viejas kaprichiozas en doktrinando las muevas jenerasyones a ser diferentes en sus komportos siviles i a ke seyan mas modernos.

En despartes, los dirijentes israelianos devran de ser atantivos durante este muevo anyo a lo siguente:

-Estar en buenas relasyones kon el puevlo amerikano i su administrasyon, el mas importante verdadero aliado de Israel. Kolaborar kon eya sovre el Iran a ke no pode dezvelopar su arma atomika, a mirar a ke la bomba atomika del Pakistan no kayga en manos de los teroristos muzulmanos después ke el Taliban vino al poder en Afganistan.

- Mirar de konvenser los lideres del mundo sovre la lucha justa i eroika de Israel por su independesya i su dezvelopamiento al seno de las nasyones oksidentalas, de konvenserlos de mirar de topar remedyos kontra el antisemitizmo pujando, de defender Israel al seno de las institusyones internasyonalas por lo mas koruptivlas en las kualas se toman dechizyones malas por el, sovre la presyon de los payizes inimigos del estado djudyo. Además luchar kon fuerza to modo de boykot sosyal i akademiko i sovre todo el del komersyo.

-Mirar de anchear el sirkolo de los akordos de Avraam, kon el ayudo de los Estados Unidos i kon la esperanza ke los payizes komo el Nijer, Oman, Indonesya i la Arabia Seudita serán deakordo a rekonoser de yure a Israel.

-Mirar a ke el Hamas i el Hezbollah no poden atakar de dinguna manera el payis, sovre todo topar los remedyos militaras justos para kombatirlos si nesesaryo. No permeter a ke los Iranyanos i sus proksis se aserken mas de 70 kilometros del Golan.

-Mirar de reglar la kestyon de modernizar el modo de enkarseramyento en las prizyones i establisir en la konsensya del puevlo de Israel la konfiyensa , a ke pas egziste en los korasones de todos los sivdadinos djudyos i arabos. Enkorajar a la polisia i a la Ajensia de Seguridad (Shin Bet) de arekojer las armas stokados en los kazales arabos de Israel afin de reglar la situasyon anarshista egzistente. Establesir las kondisyones demenesterozas para ke la sosiedad israeliana se dezvelope kon su volontarizmo i ansi sea entre los puevlos los mas altruistos del mundo. Dar el apoyo nesesaryo a las universidades del payis afin de dezvelopar la investigasyon siantifika ke azera adelantar kon fuersa la kalidad de la alta teknolojia del payis.

-Mirar a ke el sionizmo se dezvelope en las komunidades djudias a traverso el mundo kon la esperanza ke la aliya pujara mas. Dar a este sujeto el apoyo material i moral nesesaryo para ke el nasyonalizmo djudyo persiste. Mirar a ke la asimilasyon no se enfuerteska i ke la mayoriya de los djudyos keden atados a Israel, el uniki payis independiente djudyo.

-Enfin, mirar de poder enkorajar las reformas sovre la kasherut i el sistema de konversyon al djudaizmo proposadas por el governo a ke sean achetadas por la Keneset.

Bien entendido en esta lista miri de akodrar los sujetos los mas importantes ke Israel devra afrontar kon la esperenza de ver paz en los korasones de kada uno de mozotros i entre los puevlos de su rejyon.