BOKERTOV LEKULAM
OY 26 DE JUNYO 2004
LA FAMOZA DAMMA DE İSRAEL, NASYONALİSTA, PATRİYOTA, POETA, KOMPOZİTORA, KERİDA DEL PUEVLO, NAOMİ SHEMER OY DEMANYANA MOS DESHO LA BUENA VİDA.
EL FUNERAL İ LA SEREMONİYA DE ENTERRAR SE VA AZER EN EL KİBUTZ KVUTSAT KINERET ANDE NASYO,
KON LA PARTİSİPASYON DE MOSHE KATSAV İ ARİEL SHARON. KE SU ALMA REPOZE EN GANEDEN.
Akea demanyana el puevlo de İsrael i su kerida ija İlanit (lali) se espertan kon esta mala novela.
Lali triste, yorando delantre de la tomba, un jurnalista vyene i le demanda:
- Lali mis kondolensyas, puedemos azer una entrevista sovre tu madre?
-una entrevista? Esto muy triste ma si, ya kero.
Esto triste porke tengo remorso ke no la kudyi komo se deve i no bivi komo dezeava eya.
- Alora primera demanda deke la enterrates en el kibutz
- Porke mi madre nasyo en este kibutz i kompozo munchas kantikas aki. Komo “Hurshat a okaliptus,” “omri yeshna eretz”. Este pais era el sento del mundo para eya.
- Empesaremos de kuando nasyo, ande i kuando nasyo?
- Mi madre Noemi Sapir nasyo en 1930 en este kibutz nombrado KVUTSAT KİNERET, mis nonos emigraron de Rusiya i fondaron este kibutz.
- Kontame un poko de tus antepasados
- Mi nono maternel, era myembro de la HAGANAH, mi nona keriya darle una buena edukasyon a mi madre i ensistyo de mandarla dospues de la eskola, a la akademiya de musika RUBİN en Yeruşalayim.
- Komo i kuando empeso tu madre a la musika?
- Asigun me kontava, kuando teniya 6 anyos el kibuts le izo regalo un pyano, i empeso a tomar lisyones de pyano. kada noche de shabat i en los moedes organizava reunyones. Kantavan kantikas en ruso i yiddish. Eya era ennamorada del pyano tanto lo keriya byen ke le kompozo kantika.
- Naomi Shemer kuando empeso a kompozar kantikas?
- Puedo dizir de muy chika edad. Komo era profesora de kriyaturas en el kibutz, les kantava kantikas de kriyaturas. Demanyana se alevantava demprano i en nasyendo el sol kayente de Yeruşalayim, oyiya la boz de la mishkita i el sonido de la kampana de la eglisya.
Dospues se fue volontarya a la armada i tomo parte en una komunidad musikal.
- Me puedes kontar un poko de tu padre
- Mi madre se kazo en 1956 kon mi padre GİDEON SHEMER. Yo nasi dospues de un anyo. Komo nasi en noche de tu bishvat me yamaron İlana.
- i dospues vos fuitesh a paris no?
- Si mos fuimos a Paris ma mi madre nunka se adapto i syempre dezeo de tornar a su pais. Una demanyana yo i mi madre tornimos a Yeruşalayim.
- Konta lali ke isitesh?
- Dospues ke tornimos a Yeruşalayim, en 1967 mi madre se kazo de muevo i tuvo un ijo de Mordehay Horowıtz. Mi ermaniko Daniel. Era el anyo de la gerra de 6 diyas
- Es en akel anyo ke la kompozo la kantika “yeruhalayim shel zahav”?
-Si, antes 6 mezes de la gerra, el munisipal de Yerushalayim TEDDY KOLEK, le disho a mi madre ke kere una kantika sovre Yerushalayim por un festival. Yerushalayim estava en doz. El puevlo estava triste ma mi madre korajoza kompozo una kantika de 2 kuples i la kanto en el festival. Tanto plazyo ke se izo primera.
- Bravo i dospues?
-Dospues de tres semanas del festival, una noche empeso la gerra de 6 diyas. Malorozamente peryimos munchas almas ma lo ganimos aYerushalayim. Un esfuenyo de mil anyos se realizo, de vista mi madre se asento, eskrivyo el resto de la poema.
Ansi nasyo la kantika “YERUSHALAYİM ŞEL ZAHAV”
- Por terminar kualo keres dizir
-Por terminar. Eskapare kon una palavra ke diziya mi madre:
“Mi vida es forma de un trianglo. Yerushalayim, Telaviv i Kineret. Kineret para mi es el lugar ande empesa i ekapa mi vida”.
Comments