Esto kansado i ya me enfasyi de eskrivir todo lo mezmo. Yo preferava, el artikolo ke iva eskrivir esta semana, fuera sovre el misteryo de la vida en el fondo del Oseano. Ma no es posivle ni pensar ni eskrivir en nada mas, demanyana i tadre, kon los sonidos de los alarmes, koriendo a las kamaretas seguras u byen koryendo a los refugos de los bodrumes de las kazas. Si estas en la kaye i konduizando oto, deves de aretar i echarte enbasho de boka abasho (el alevantar otro problem para syertas personas).
En bivyendo esta manera i oyendo ke el mundo entero estan kontra mozotros, veramente es inposible de eskrivir otros sujetos.
El 7 Oktumbre 2023, la organizasyon terorista HAMAS, (ay 18 anyos ke esta dominando), pensando ke İsrael estava aflakado de aryento, atako İsrael desde Gazza. Este atako fue el mas grande atako dospues del olokosto.
No le abasto, fuyeron kaji 250 İsraelyanos, entre eyos aviya bebes muevos nasidos, kriaturas, mujeres, mansevos, vyejos, hazinos i los metyeron komo prizoneros en los tuneles de Gazza.
Israel para salvar sus rehenes organizo una operasyonen en Gazza.
En supito la organizasyon terorista Hezbollah en Libano, se alevanto i disho: “no desharemos solos a muestros ermanos de Gazza”
I empeso a echar roketes sin adjidearse. Ay mas de un anyo, kada diya syenes de roketes vyenen a los syelos de İsrael.
Ay tres mezes ke Hizbollah manda miles de roketes a muestras tyerras, mezmo a la kamareta de echar de muestro primer ministro.
En el norte ochenta mil kuidados, estan menasados, de sorte fueron ovligados de dechar sus kazas i moradas, estan bivyendo komo emigrantes en sus pais.
Sinyor J.Borell, responsable de la Union Eropea!
No testas averguensando de kondanar İsrael porke empeso a azer una operasyon kontra la organizasyon terorista Hizbollah?
(a pardon para vozotros Hizbollah no es organizasyon terorista).
Tu! Sinyor Guterres, amigo entimo de Arafat, sekretaryo jeneral de Nasyones Unidas, no te erguele la konsensya de dizir
“espiral de violensya”?
Tu! el aktor prensipal de esta avantura İRAN! En los ultimos sesh mezes en dos vezes, mandates kaji 500 fuzes i roketes.
Oye! todos!
El primo İran i los sinko ke yamamos el mundo ilustrado, el mundo oksidental komo Japon komo Australia me paresiya ke erash intelektual.
En verdad estash al koryente de lo ke sesta pasando?
Por egzemplo
Es por primera ves ke vemos, porke İsrael kijo salvar sus rehenes, un pais soverano, echa syenes de roketes a otro pais soverano i todos kedan ekspektadores. En las operasyones ke izo İsrael para salvar sus rehenes, Hamas utilizo sus sivdadinos komo eskudos siviles. Malorozamente la perdida de vidas fue byen alta. Pekado muy pekado.
La armada de Israel, izo sus esforsos para evitar la peryita de vidas entre los siviles de Gaza.
(esto ya lo afirmo no solo los İsraelyanos mezmo los eksperes militaros etranjeros)
Una ves mas se afirma ke unos de la organizasyon UNRWA son los asasinos ke mataron personalmente a munchos siviles İsraelyanos de la organizasyon HAMAS.
La organizasyon terorista HİZBOLLAH, espera en los tuneles para un atako a su vezino İsrael desde Libano.
Ay 18 anyos ke Hizbollah sestava preparando i deves en kuando akosando al norte de İsrael sin dingun achakes.
Ya estash al koryente ke la Fuersa de Pas (UNİFİL) kedo espektador???
(i por esto el ajan Hizbollah tomo este dover) ya estash al koryente??
Las elites politikas del Oksidente! la seguridad de las nasyones unidas! Hizbollah akosa Israel durante 18 anyos sin dinguna razon, kedatesh kayados. Kuando las fuersas de seguridad Israelyanas, anpesaron a atakar, para azer tornar a su puevlo del norte a sus kazas, empesatesh a kitar bozes indjustas, i topar la kulpa en Israel. Esta manera vos vash a lavar las manos i vash a tener razon?? Los derechos umanos egzisten solo para protejar a los teroristos?
Estash al koryente ke İran apoya direktamente u endirektamente el terorismo İslamiko, i por esta razon Israel gerreya para salvar vidas?.
Estash al koryente ke esta chika sivdad, aze una grande favor al mundo oksidental?
Estash a koryente? Israel en gerreando kontra la oskuridad, proteja vuestra kultura, vuestra sivilizasyon i vuestras valores. Vos olvidatesh ke los lideres teroristos mataron a vuestra djente? Ya estash al koryente ke si un dia Israel no esta, este bloke de terorizmo vos va komer la kavesa? Echa un ojiko al mundo! Por egzemplo en la Republika Afrikana en Seleka mira lo ke izyeron!
El mijor i verdadero amigo de Israel es LOS ESTADOS UNIDOS:
Es ke vos puedesh yerrar?
Por egzemplo muestro Primer Ministro (no so del todo admirator de el) dando orden “NO ENTRESH A RAFİYAH”, i solo por ke va aver las eleksyones, mezmo si es sin kerer, restinyaron de luchar kontra la organizasyon terorista, si no entravamos a Rafiyah es ke puediyamos tomar SİNWAR? No solo en Gazza mezmo en Oestejordania, la mayorita de los palestinyanos apoyan a Hamas i a la degrasya del 7 Oktubre.
Estash al koryente? Demandar solusyon de İsrael de “dos estados” no es demandar la fin de este pais. No es la mezma koza?
Vos olvidadesh, del diya ke se fondo Israel -mezmo oy- seya ARAFAT seya ABBAS en el ultimo minuto komo fuyeron del akordo? Komo anyos, refuzaron la propozisyon del Estado Palestinyano, vos olvidadesh?
Fin ke Los palestinyanos, se van a ezvachear de edukar sus kriyaturas kon aboresimyento i vengansa kontra Israel, la solusyon “de dos estados” es la fin de Israel. Estash al koryente?
La mayorita de los palestinyanos apoyan la dezgrasya del 7 Oktubre. El artikulo prensip al de los estados de Hamas es destrurir Israel. ¿No meldatesh?
Ke troke la edukasyon, la mueva jenerasyon ke bivan kon pas ke venga el Estado de Palestina. Ma no antes! (mira los Estados Arabes Unidos)
Paises ke definimos komo oksidentales: kon sus governos, kon sus administradores, el presidente Macron, akademisyenes i estudyantes kon sus universitades, tribunales i organizasyones internasyonalas, medyos de komunikasyon,
DESPERTAVOS! Ya vino la ora ya esta pasando mezmo la ora de estar al lado del korekto, allado del djusto.
NOTA: Vineremos a la ultima situasyon kon Iran; Israel kon el permeso de de los Estados Unidos se permetyo a mandar un mesaje kontenyendo la fuersa militar. Si Iran no responde, la gerra ke kontinua durante mas de13 mezes, topara fin. Israel si no ataka las enstalasyones nukleares, al futuro le puede vinir grandes echos a la kavesa. Ma no es difisil de entender, ke oy en diya es inposivle una operasyon semejante sin la aprovasyon de los Estados Unidos.
ESKRİTO POR : BONDİ ÇAKIM
TRADUKSYON: FORTİ BAROKAS
Comments