(Teksto-Audio)
(Yazarı sesli dinlemek için tıklayınız)
La kaye israeliana aspera kon grande esperanza i un poko de reselo los muevos dezvelopamientos politiko- sosyales del payis. Lo ke prime lo mas es ke las otoridades de informasyon, los diplomatos, los politisyanos i los akademisyenes nesesitan de topar muevos diskorsos para defender muestra lucha kontra Hamas, el Iran i mas, por ke la figura de Israel en el mundo oksidental komo oriental kambyo a su desfavor. El dalkavo konflikto kon Hamas en sus konsikuensas mos provan ke todo modo de konflikto israelo-arabo donde el ganador en el terreno siempre fue Israel deve ser kondanado por kerer matar inosentes siviles kuando sus peryitas son minimas. No emporta ken ampeso el konflikto, por ke razones Israel bombarda la banda de Gaza, lo ke importa es ke los arabos biviendo esta tyerra tienen sus razones de kerer azer la gerra a Israel.
Esta opinión inimiga no kritika la politika fondemantala de los dirijentes del Hamas ke keren destruyir Israel i echar a la mar a todos los djudyos. La konkesta de Israel kon sus realizasyones infrastrukturalas son sus derechos ke les reviene sovre la doktrina muzulmana fondementalista . La istorya se repeta oy diferamente Israel se izo Goliat i el Hamas David. Dezde la fin de la Segunda Gerra Mondiala la manera de ver los konfliktos militares en la opinión mondyala troko, el flako tiene siempre razón si mizmo es malo. El muevo governo ke sera enkavesado por Naftali Bennett, entremunchos otros sujetos urjentes devra okuparse seryozamente de la kestyon de la figura de Israel, espesialmente en la diaspora djudia i en la opinyón amerikana i araba.
Este muevo governo potpuri de 8 partidos vido el dia el 2 Junio, en el kual muestro amigo Isaac Herzog fue eskojido por los miembros de la Keneset a una grande majorita a ser el 11 Prezidente del Estado de Israel. Mansevo, avokado de formasyon, avlando linguas etranjeras, viejo prezidente del partido Avoda, prezidente aktual de la Ajensia Djudia ampesara el mes ke viene su misión de aunar a toda los israelianos. Dishiplo de su padre el sejen prezidente Haim Herzog esperamos ke el va ser un bueno reprezentante de Israel al seno de la komunidad mondiala.
De otro lado en estudyando la formasyon del muevo governo se ve ke una mueva manera de unyon se formo entre los partidos de la punta lechana de la derecha a la punta lechana de la siedra. Lideres ke ayer se avlavan solo para peleyarse oy están lado kon lado aparejando el muevo program politiko de la koalisyon. De prim a bordo esto parese estranyo por ke las diferensias de sus ideolojias no permeten un kompromizo en la manera de dirijar el payis, además por la primera ves en la istorya de Israel un partido arabo el Ram de obedensya fondamantalista muzulmana se ajunta a esta koalisyon kontra avantajes ke el muevo governo dará a la minorita araba, por la kuala egziste una grande deskonfiensa achakes de las matansinas ke tuvieron lugar en las sivdades mikstas komo Lod, Yaffo i Akko poko tiempo antes. Se entiende ke mizmo 100 anyos después de bivir en juntos las dos komunidades kedaron ajenas la una a la otra i ke en muestro tiempo no avra remedyo a esta indiferensya.
Estamos biviendo momentos ke simbolizan la tragedia de Binyamin Netanyahu. Un grande personaje de estado ke supo parvenir a azer grandes akumplimyentos, kon sus manyas de otoridad, fue kapachi a la fin de trayer en juntos politisyanos ideolojikamente i diametrikalmente kontra uno del otro por la sola razón de azerlo kayer del poder. Pekado para el de no kererse travarse en su tiempo kon gloria de la politika i okuparse solo de los juzgos ke le azen. En su futuro Netanyahu por seguro kedara el shef de la opozisyon i prezidente del Likud. Pokas son las probabilidades ke al seno de su partido se oyga bozes de deskontentes a su sujeto.
Entremientes Bennett kreando komo primer ministro un muevo governo va ser el primer a tener una kipa en la kavesa, un nombre rekor de ministras mujeres i un haver de governo arabo. La koalisyon kaleodoskop ke forma es lo ke el puevlo de Israel siempre kijo, ke una grande mayoriya de las kolores del spektrum politiko sean representadas. Es ke Bennett va reuchir a governar el payis durante dos anyos, esto es el grande risko ke toma. Si no, visto la chika reprezentasyon de su partido en la Keneset el riska de ser eliminado de la politika israeliana en la primera futura eleksyon.
Por su parte Yair Lapid ke va ser primer ministro en 2023 tiene intereso a ke esta koalisyon dure. Ademas la politika de opozisyon de Netanyahu va ayudar a ke Bennett, Lapid, Gideon Saar, Ganz i mizmo Merav Michaeli kedan enjuntos atados entre eyos, por ke en kavzo de despartisyon i de muevas eleksyones saven muy bien ke esto podera ser sus fin enfrente de un Likud ke se enfortesera muncho mas. La dilema es grande i las kondisyones de governar enfrente de las difikultades aktualas del payis van a ser terivles, ma kon meyuderiya el sukseso no es imposivle.
Comments