En un video ke suıvi en el Internet, los sientifikos israelianos estan diskutando los faktores ke partisipan a las ınnovasyones.
Israel, en relasion a su populasion, es el pais ke partisipa lo mas, a la revolusion de la teknolojiya. En el Oriente Medio, Israel es el uniko pais de grandes meyoyos, i de enerjiya. Durante mas de setenta anyos, Israel estuvo en gerra, fue el objektivo de munchas atakas teroristas, i fue boykoteado por sus vizinos.
En mezmo tiempo, Israel reusho a fondar una nasion, kreo mirakolos de agrikultura de su tıerra infruktioza, i se transformo en uno de los paizes los mas teknolojikos del mundo. Komo puido Israel azer tantas innovasiones en la teknolojiya? Los pioneros ke fondaron Israel, son los empresarios ke riskaron muncho. Israel no teniya resorsas, tambien aviya amenasas del eksterior. Ma los pioneros tuvieron una grande vizion de fondar un pais tan reushido. La kultura i la relijion judiya mos permete de kestionar todo, i de azer diskusiones sovre todo. Por los sientifikos israelianos, lo ke es publikado deve de ser kestionado, i se deve de azer mas munchas investigasiones para topar mijor solusiones. Segun el eskritor i analisto, Dan Senor, kada soldado israeliano se ambeza en el kampo de gerra, a ser lider i a topar remedios por todo. A una edad muy temprana, los mansevos israelianos se azen fuertes, i ganan eksperiensas. Otro faktor en la reushita de la teknolojiya i de la ekonomiya de Israel, es la emigrasion kontinual a este pais. Israel gasta grandes montantes por la ekonomiya i por la emigrasion. Ay mas de setenta nasiones reprezantadas en Israel. La rapida entegrasion de los emigrantes duspues de asistir a un rapido programa de ebreo, prokura la partisipasion de estos emigrantes a las innovasiones del pais. Kon la emigrasion Sovietika, 750 000 emigrantes entraron a Israel. Miles de estos emigrantes tienen grados emportantes en matematika, i en siensia. Esta djente kon talentos teknolojikos krearon muevas innovasiones. El sektor de Hi-Tech va mano kon mano kon la emigrasion de meyoyos grandes. Munchas de las innovasiones ke salen de Israel trokan la vida de muncha djente en el mundo entero. Los diyas ke Israel eksportava naranjias kedo muy atras. Todo modo de innovasion en Israel es bazada en investigasion. El mundo tiene de ambezarse muncho de Israel, espesialmente en estos anyos ke ay grande menester de innovasiones bazadas en stratejias ekonomikas. Estas innovasiones no son solo por la prosperidad del puevlo de Israel, ma tambien por la prosperidad del mundo entero. Israel esta partisipando a la teknolojiya del mundo en munchas maneras. Israel es uno de los paises lideres en el kampo de la investigasion bioteknolojiya. Los israelianos transformaron este chiko pedaso de tierra a un oasis.
Comentarios