La administrasion dirijada por los Kurdes en el nort-este(NE) de la Siriya (AANES) kontrola serka del 30 % del teritoryo siriano. Ansi este teritoryo kontiene la mayor parte del petrol i del gas ke este payiz poseda. Ademas la mijor tyerra agrikola i los manaderos de agua se topan en eya. La zona tiene en mizmo tiempo un karakter stratejiko.
Antes la kayida del rejimen politiko en Siriya, esta zona malgrado toda la amistad ke Asad teniya por los iranyanos, eya no les sirvyo para el transfer del armamiento a sus proksis shiitos del Libano i a el Hamas visto ke los dirijentes kurdes no los desharon pasar por sus teritoryos en mirando de ayudar a Israel. En desparte la milisya SDF ke reprezenta la fuersa militar del AANES kollabora kon las fuersas amerikanas kontra ISIS.
Dezde el mes de Desembre 2024 la administrasyon kurda i su milisya en supito se toparon enfrente de las milisyas sunnitas tal Hayat Tahtit al-Sham (HTS) ke oy en dia miran de dirijar la Siriya en okupando la kapitala Damas. Las relasyones entre estos dos elementos no son amigavles, basta de akodrar ke en el medyo del anyo 2013 los kurdes fueron atakos por las fuersas del HTS ke en akeya epoka se yamavan ‘Jabhat al Nusra’ en la lokalita Sere Kaniyeh/Ras al Ain. Los kurdes fueron kapaches de rezistir a ke los sunnitos djihadistos no puedan entrar en sus zonas.
Dezde poko tiempo el kapo del HTS Ahmed el-Shaara ke mira de trokar de figura fondamantalista a pro demokratika, se mostra komo un líder politiko ke dirijera el payiz en totalidad. El resive en Damas munchas delegasyones evropeas i de otras nasyones, spesialmente de Turkiya, ke lo enkorajan a ovrar para unir el payis entero sovre su otoridad en refuzando todo modo de posibilita de estableser un rejimen federal. El no kere ke el SDF sea una fuerza independiente, ma solo integrada en la futura armada nasyonala siriana ke se formara.
A esta situasyon kualo pensan los dirijentes kurdes? Kestyon ke fue pozada a la sinyora Ilham Ahmed ke es la ministra etranjera de la administrasyon kurda, persona influente en el payiz, konosida komo ser muy aktivista por la kavza kurda. Kuando se le demando sovre las diferentes vizyones del poder de Damas en la kuala los kurdes devran partisipar, eya respondyo i disho:
’De punta de vista administrativa i militara ay grandes diferensyas en Siriya. El NE del payis es dirijado por AANES. Las sivdades al bodre del Mediteraneo spesifikamente son kontroladas por los aluites. Los Druzes tienen sus propya administrasyon i su milisya para defender su rejyon. En Idlib i en otras rejyones los sunnitos se organizan de la mizma manera. En este kavzo si uno viene i dize ke kere aunar todos estos puevlos debasho un mizmo sistema, el avrira el kamino a una gerra sivil enterna. El HTS esta mirando de azer una unyon entre las partidas sovre su direksyon, debasho un solo poder sin dar dinguna shans a otros de partisipar. Konosemos bien el antepasado i la istorya del HTS.’
Ma el HTS insiste en su pretansyon ke el troko de su idelojiya djihadista. Es ke se puede tomar seryozamente en konsiderasyon esta pretansyon? Es muy demprano de tomar dechizyones sovre esta delikada deklarasyon visto ke no se save ke kon sinserita el HTS se despartyo del Al-Queda. La sinyora Ahmed repeta ke su administrasyon se opoza a ke las mezuras restriktivas tomadas sovre los de Damas no sean alevantadas imediatamente, ke kale asperar i dar al tiempo mas tiempo. Eya adjusta i dize:’ En kitando el HTS de la lista de terror i abandonando las mezuras de restriksyon ekonomikas tomadas fin oy en dia kontra la Siriya, esta situasyon avrira kamino a ke estos viejos fondamentalistos se apatronen del payis en establesyendo sus propryo sistem de governar en no trokando sus ideolojiyas djihadistas.’
En kavzo ke ayga en un serkano futuro una kriza entre el SDF i HTS, ke en el momento aktual no es probavle, el rolo de Los Estados Unidos es muy emportante. La prezensya amerikana al este del Eufrat reprezenta la garansiya para los kurdes de la posibilita de empidir a una envazyon de la Turkiya o de unos de sus aliados islamistos. Se pensa ke malgrado las dechizyones de Trump de travar su armada de la Siriya los kurdes están konvensidos ke los soldados amerikanos van a kontinuar a kedarsen.
No se pensa ke las diferensyas egzistientes entre el SDF i HTS podran ser komprometidas en serka, visto ke el primer kere una demokrasiya i el sigundo un rejim sentralisto administrado sovre las leyes de la Sharia. El SDF demanda desantralizsyon, sekularizmo i proteksyon de los derechos de la mujer, por kontra HTS un estado islamiko. Kualo va ser el futuro de la Siriya ke esta en las manos de Los Estados Unidos de una parte i de la Turkiya de la otra no esta klaro, ma en todo kavzo los kurdes siriyanos durante 14 anyos kon muncha difikulta establesyeron una armada regolar, por esto no van achetar fasilmente a adjuntarsen a un governo fondamentelisto.
Por el Dr. Selim Salti
Comments