(Teksto-Audio)
(Yazarı sesli dinlemek için tıklayınız)
Me do a entender sovre el titolo de mi eskrita después ke vijiti este payis al bodre del Golfo Persiko poko antes. Istorikamente los Emirates se izyeron endependientes a la fin del protektorado inglez en el anyo 1971. En 50 anyos grasyas a la vizyon de su fondador Zayed bin Sultan Al Nayan este chiko payis de un milyon 400 mil abitantes se transformo en una potensya mundial. El fue kapache grasyas a la deskurvierta en los anyos entre 1940 i 1950 de las immensyas kuantidades de kombustivle fosilo ke fueron topadas en el teritoryo diziertiko de la península Araba, de azer un paradisyo ekonomiko i adelantado. Se kere ojas enteras para deskrivir la ermuzura de las izlas naturalas i artifisialas i mizmo de las fraguas echas en sima de eyas en muy kurto tiempo. Bien entendido no fue fasil del todo para parvenir a este rezultado i una mano de fierro se kijo para unir a estos beduinos sin edukasyon i alikodar mas de 8 milyones de ajenos ke biven komo ekspatriyados.
En el 2 de Desembre de este anyos eyos van a fiestar los 50 anyos de egzistensya independiente i de akodrarse kon umilita i tolerensya, komo lo disho esta savya persona, el Sultan Zayed, ke antes los anyos 1960 las trivyas dirijadas por los sheyhes ke se peleyavan por un si o por un no, bivian una vida medyevala i apenas si teniyan de kualo komer i agua para bever. Sino tenían el remedyo de peshkar i de arekojer las perlas del fondo de las lagunas estos eran kondanados a despareser. Ma la vinida de los Portuguezes antes 350 anyos los ayudo a ambezarsen a sobrevivir de la mar i de azer komesyo kon la Persya vizina.
Los emirates son 7, sin el Bahrein i el Katar los kualos refuzaron de unirse en 1971 kon esta federasyon monarka konstitusyonala, a saver el Abu Dhabi, el Al Ajman, el Dubai, el Al Fujayrah, el Ras Al Khayma, el Sharjah, el Umm Al Qaywayn. Komo superfisiya el mas grande de entre eyos es Abu Dhabi i el mas chiko Ajman. Abu Dhabi, kapitala del reynado, es el ke poseda lo mas de rezervas de petrol i dunke el mas riko. Lo siege Dubai ke no tiene ni gaz ni petrol ma la mas grande povlasyon del payis, kaji 3 milyones i mas de abitantes i es el sentro ekonomiko del payis. El resive la mayoriya de los turistos, 13 milyones en 2019, se asemeja a New York kon sus edifisyos, sus otopistas (High way) a 6 linyas, su ermuzura arkitekturala, su limpleza i la djentileza de sus habitantes por la mayoriya vinidos de los payizes sud asyatikos. En la kaye se pode renkontrar djente vinidos de diferentes payizes de la Asya, de Ingleterra, de las Filipinas kon una mayoriya de indianos i pakistanezos. Los mijores oteles del Medyo Oriente fueron fruagados en los emirates Abu Dhabi i Dubai. La mas grande tore del mundo Burj Khalifa kon sus 830 metros de altura se topa en esta sivdad i se vijita por milyones de djente. Ajustare ke en la kapitala el governo desidyo de fraguar una sinagoga al lado de una mishkita i de una iglezya simbol de las 3 relijiones monoteístas i de la tolerensya ke se deve en verso del umano.
No egziste frontieras internas entre los emirates, ma kada reynado tiene sus dirijentes, sus buchetos, sus reglas i su propio sistema juridiko. Siertos de eyos no tenyendo reservas de petrol son proves i en vijitando Sharjah me paresyo ke esto en Gaza o en un foburgo prove de Estambol. La distensya entre la henoza Dubai i Sharjah no era mas ke de 10 kilometros. Kale ver para kreyer.
Ademas malgrado todo este modernizmo no se pode pretender ke en los Emirates los derechos umanos son respektados. Ay diziendas ke por una nada los ekspatriyados se topan en prizyon o son ekspulzados. En el lavoro un emiratí es pagado 3 vezes mas de un ekspatriyado de mizmo nivel. Los emiratis biven aparte en foburgos ke les son reservados en villas i palasyos ke se fraguaron, no pagan dasyos i por lo mas lavoran en las institusyones de los governos o en las sosietades aparteniendo al estado federal o están en la armada. Ma en jeneral para todos los abitantes sin diferensya, las eskolas, los ospitales, las universidades son debaldes. La vida es kara, el alkiler alto, ma malgrado todo los ke vinieron a lavorar no se keshan muncho sovre esta situasyon.
Mi buto de la vijita fue de ver el Expo 2020. 193 payizes fueron reprezentados, imposible de verlos todos, ma los ke me enteresaron lo mas fueron el Israeliano, el Ruso, el Saudyano, el Turko (un poko povretiko), el Ejipsyano, el de los Emirates, el de Turkmenistan, el Japonezo i el Indiano. Mas o menos todos se asemejavan ma solo en el Ejipsyano apararon mumyas antikas. Durante los 10 diyas ke estuvi vijitando el payis lo ke me marko lo mas fue el respekto i la amabilita ke me amostraron los otoktonos savyendo ke so israeliano. Todos estavan al koriente de los akordos de Avram i me dicheron ke están muy kontentes de ver los turistos israelianos vinir a vijitar. Durante los enkontros kon los amiratis me ambezi ke justamente poko diyas antes, el governo federal dechizyo de liberar los kazamientos sekulares i de permeter la vendida de alkoles en el payis. Se ve ke a poko a poko estos payizes fundamentalmente muzulmanos adaptan las reglas duras del islam al dia de oy. Ademas me repetaron munchas vezes ke eyos keren bien a los djudyos i ke están viendo un buen avenir en las relasyones kon Israel por ke nesesitan ambezarse muncho del saverisyo, de la inovasyon i de la kreativita djudia. Ni una palavra no me fue dicha por los arabos palestinianos. I de mi perspektiva personal digo, los dirijentes israelianos deven de ambezarse de sus kolegos emiratis komo dezvelopar el urbanizmo i la manera de organizar una burokrasiya simple para ke todo kamine en su tiempo i sin intrompesos.
Комментарии