En 1979, despues de la Revolusion Islamika en Iran, i kuando los mollas pasaron al poder, los dirijentes de la komunidad judia del pais kijeron reunirsen kon el muevo diktador, el ayatollah Humeini. Le izieron munchos regalos ma malorozamente ke no servyeron a nada. Una persona de los mas rikos i de los mas influyentes de la komunidad djudia, Habib Elghanian, en Mayo del anyo 1979 fue enforkado. Para munchos djudios iranyanos, esto fue el sinyal para abandonar el pais.
De las 100.000 personas ke aviya antes de la Revolusion Islamika, la grande majorita abandonaron el pais. Malgrado esto uvo djente ke preferaron kedarsen en Iran. Se esta estimando ke oy la povlasion de la komunidad judia esta entre 9.000 i 15.000 personas. La majoriya son ayedados ke avlan solo farsi i ke les viene difisil de abandonar el pais. Ma, la razon prensipala de kerer kedar en el pais, es la prosperidad ekonomika en la kuala se topan.
Israel resivyo serka 600 judios iranyanos en la primera dekada de 2000. Ma no uvo dinguna imigrasion verso el estado djudio durante de la sigunda dekada. Munchos komersantes, eksportadores o empresarios ke biven oy en Teheran, no estan guadrando sus orijenes, ma se estan espantando de avlar sovre la politika.
La majoriya de los djudios iranyanos son relijiozos, tienen una vida komunitaria, komo en munchos otros paises de la diaspora; tienen sinagogas (ay solo kinze sinagogas en Teheran), eskolas, selebran bodas i bar mitzvas, tienen mikves, produktos i restorantes kasher.
"No ay proteksion en las entradas de las sinagogas i eskolas komo es en Evropa", disho Yehuda Garami, Gran Rabino del Iran en 2020. En munchos aspektos, los djudios son tratados a egualitad kon la povlasion muzulmana del pais i tienen buenas relasiones kon eyos. Ma no se les permete de viajar a Israel. En realidad, no puedemos dizir ke egziste una verdareda igualita.
Segun el intelektual i eskritor iranyano, Ramin Parham ke bive en Fransia, los iranyanos estan inyegando de no ser igual, porke esta negasion esta viniendo de sus propios instinktos de supervivensia.
“Los mollas son antes de todo buenos komunikadores i ya saven muy bien ke la kredibilidad del rejimen en la shena enternasional depende de sus respekto en verso los djudios i las otras minoridades del pais. Sus entisiones son solo para salvar las “aparensias” dize Ramin Parham. Los djudios iranyanos para pueder bivir repozados, estan diziendo “Somos djudios, ma no tenemos dingun dariaver kon Israel”.
El rejimen iranyano tiene ojos i orejas en todas las partes del payis, koza ke nunka troka i se aplika a la povlasion djudia. Eya nunka se olvida el destino de los diez djudios iranyanos, ke fueron egzekutados en el anyo 2000, kondanados por aver espionado en favor de Israel.
Moshe bive en Israel dezde unos kuantos anyos i su famiya en Iran. No kere avlar de su famiya, porke se esta espantando de su seguridad. Esta aziendo grande atansion antes de kitar un biervo de la boka. El disho ke los djudios estan muy repozados en Iran i ke sus vizinos los respektan, en ajustando "No tienen dingun problema si estan lavorando i biviendo en sus kantones sin ser apersividos’’. Ademas ajusto ke se eskarinyo muncho de su famiya porke no puede ir a verla i eya no puede vinir a Israel. Ya se izo tres anyos ke no la ve.
En kavzo de una gerra kon Israel, no ay dubyo ke van a empleyar a los djudios komo moneda de kambio.
Comments