(Teksto-Audio)
(Yazarı sesli dinlemek için tıklayınız)
Yo kuando era ijika chikitika, era apegada kon mi madre. Tanto la keriya bien ,kuando eya gizava en la kuzina kon la prostela,yo la abrasava i la bezava. Eya, kuando gizava en la kuzina ,yo siempre me estava al lado de eya i kantavamos en cuntos. Mi madre teniya una boz muy ermoza. İ yo aviya paresido a eya.
Me akodro kuando teniya 5-6 anyos, kantavamos kantikas en Espanyol i en Grego. Las kantikas no eran en Ladino. Eran en Espanyol kastilyano komo, La Paloma, La Violetera, Ke Sera Sera. Mi madre avlava en Grego perfektamente i saviya munchas kantikas en esta lingua. Me esto akodrando ke kantavamos kantikas Napolitanas, ma en Grergo. Yo me maraviyava komo las kantava estas kantikas, kaji komo un pashariko. Agora las palavras de “La Paloma” ,no me las esto akodrando.
Mi madre gizava komidas muy savrozas. Yo era una kreatura muy kaprichosa en sima de komer. Por esto mis manos no las metiya enriva de la meza. Mi madre me dava los bokados a mi boka. Yo kon mis manos lo tomava el piron ke solo kuando aviya koftikas, patatikas fritas i filikas kon kaşkaval. Las otras komidas me eran problemes grandes. Para ke koma fruta eya kitava el sumo de las frutas. Las uvas las pasava por el tropito, porke akel tiempo no aviya blenderes o robotes. Todo se aziya a la mano.
Ami me plazia solo peshkados chikos fritos. En kada semana se iva al charshi de Kadıkoy i merkava aparte de los peshkados grandes, istavrites (karapeos) i tekir (barbunya chika). Yo komiya solo de estos peshkados. En despartes me plazia la guevada del peshkado kalkan(turbot). En la sezon mi madre en kada diya me friyiva guevadas de kalkan.
Aparte de esto kuando era chikitika me plazia ravikos de espinaka. Yo si savia ke esto es echo de palos de espinaka por siguro ke lo i va refuzar, pormo de esto mi madre me diziya ke la komida se yamava “kome i kaya”.
Kuando arivi a los 10-11 anios ampesi a komer demi para mi. Ma siempre teniya manyas. Ma kuando lo pari a mi primer ijo Soni, a la edad de 22 anyos, ampesi a komer de todo modo de komidas, para ke koma i mi ijo. Entonses entendi ke pedri munchas savores del gizado de mi madre ke yo no konosi. Ma grasyas al Dyo, los ijikos miyos nunka no me izyeron kaprichos, i komyeron de todo.
Mi madre era reyna de la kuzina. Gizava muy bueno, aziya dulsuryas, kozas de pasteleria i tomatada kon kilos. Ensima de una ravanada de pan fresko, untava de la tomtada de mi madre i komiya. Kozas dulses no me plazian. Solo dulse de roza i dulse de igos me gustava. Eya azia dulses en kada sezon. Los biskochikos, los gatos , los maalebis no los metiya en boka. Agora me rendo kuento de las savores ke pedri. Me kayen las lagrimas i digo “ande estas mamika?”
Kuando estava en el liseo, los dias de shabat las eskolas eran avyertas fin a midi. Kuando tornava de la eskola,en suvyendo las eskaleras me veniya la golor de las berencenas fritas enpapeyadas kon kaldo de karne. En akeyos anyos eya era la komida favorita mia, i mi madre en kada shabat midi, la metia a la meza.
En enverano, mi padre, kuando salia del kal, de orasyon de shabat, tornava a kaza kon un buketo de flores para mi madre. Eya de su parte le aprontava borekas o bulamas de berencena, kon karpuz. Despues le ofresiya un kafe turko.
Mi ermana Venezya i yo, eramos ijikas orozas. Porke mozos en muestra kaza, nunka vimos pletos, traspasarmyentos o oyimos gritos. Nunka no mos davan una dada chika, ni echavan un grito grande. En kaza aviya respekto, pas i kerensya. Mis paryentes, nunka no se peleyaron delantre de mozotros. Kuando veniya a kaza un sesto yeno de rozas koloradas i ke mi madre lo resiviya kon sonriza, entendiyamos ke se avian aravyado. Mi padre para azer pas, mandava siempre las rozas a kaza antes de vinir.
Kuando mos asentavamos en el doredor de la meza, siempre se avlava de kozas buenas, de lo ke paso a kel dia. Mozos kontavamos kozas de la eskola, los paryentes se riivan. La vida de eyos se alegrava, kuando mozos eramos alegres.
Me esta paresyendo ke en akeos anyos el kazamiento i la famiya djudia eran mas sakros. Los viejos, los mansevos i las kriyaturas biviyan en juntos en mizma kaza, i todos sintiyan la valor de ser atados uno kon el otro, no aviya trespajos, pletos o keshadas. La vida era mas modesta, i mas sensera.
Agora las famiyas se estan azyendo kon grande hadras i luksos i munchas de eyas sin pasar un anyo se estan dezazyendo. Esto para mi es una grande katastrova. Parese ke kedi del tiempo de Antiyohos. Vos saludo i abraso kon todo mi korason.
- `
Comentários