LA TURKIYA EN EL MEDYO ORIENTE
- Dr.Selim SALTİ
- 9 saat önce
- 4 dakikada okunur
Malgrado la primavera araba ke kreyo la esperanza de una forma de demokrasiya en el mundo arabo, oy despues de kaji 20 anyos de su avenimyento se ve ke nada troko. La Fraternidad Muzulmana ke avia ganado el poder politiko en Ayifto, en Tunisiya i en Gaza en los anyos pasados se enfortesyo por un tiempo ma poko despues kayo de muevo a su nivel basho, todo en manteniendo su ideolojiya en Gaza. La mayoriya de los payizes arabos ke fueron kolonizados por los evropeyos en los siglos pasados despues del largo rejim Otomano nesesitaron siempre de tener un ermano grande para ke los protejen. Oy los Estados Unidos, la Rusiya i mas kontinuan kon difikulta de djugar este rolo, ma en estos dalkavos anyos deven de topar muevos kandidatos para remplasarlos.
Uno de eyos es el Iran. Malgrado los esforsos diplomatikos i las promesas ekonomikas ni los ayetollahes, espesialmente Homenei, ke fueron fervantes partizantes de la ideolijiya anti djudiya de la politika de la Fraternidad, no son vistos oy en dia en el mundo sunnito muzulmano kon buen ojo. I mizmo se pretende ke los shiites iranyanos i sus proksis aziendo partida ‘del kruasan shiito’ entre el Irak la Siriya i el Libanon son de mezmo mal vistos komo erezyos.
Un sigundo kandidado fue el Katar. El emirato kon su politika diplomatika ke toma la kaveso i ke es difisil de entenderla no fue kapache de konvenser los payizes komo la Siriya i el Lebanon a tomarlo seryozamente en frente. Las diktaturas arabas sempre se espantaron de la televisyon Al-Jazeera ke sin muncho asperar defendyeron sus emisiones eksplosivas. Koza ke kontinua dainda en muestro tiempo. Por esta razón el solo rolo ke le keda es ser el ‘djuzdan’ de estos payizes.
El treser kandidato es la Turkiya. Oy no ay payiz muzulmano onde no egziste antisemitizmo a la manera nazista. Bien entendido la Turkiya no falta a esta inimista malgrado su pasado amigavle kon Israel; de la boka de sus dirijentes, de la prensa kontrolada por el governo, de los miembros del partido politiko AKP en poder i mizmo de sus opozantes politikos no se oye ke mal sovre muestro payiz. La razón prinsipala a mi konosensya es el demenester del prezidente Tayyip Recep Erdogan de krear a traverso su politika defetista sovre Gaza de mirar de kontrolar la kaye araba i ansi apatronarse de la Siriya. Es ke va ser kapache, el futuro mo lo dira. No olvidar ke Israel le importa muncho ken va ser el muevo patron del payiz vizino de su norte.
La administrasyon aktuala de la Siriya mizmo ke troko de jaketa politika keda en prensipyo fundamentalista. No ay kreer en esta djente amenos ke su futuro patron turko no los ovliga a estar en buenos termos politikos kon Israel, semejante koza ke bivimos durante la peryoda dominatrisa rusa. Israel malgrado todo devra mirar a establiser la situasyon relativamente kalma del tiempo de Asad i no nesesita a ke pas ayga entre las 2 partidas a menos ke los Ermanos Muzulmanos Siryanos troken entremientes sus teorías de inimista.
La Turkiya, no es muevo, siempre penso a impozarse en la rejyon komo una potensya de primer plano. En estos dalkavos anyos sus konkerentes tal el Iran o el Katar tenían muncho mas pokas shanses de reushir enfrente de la Turkiya, ma la dezilusyon ke kreyo las deklarasyones de Erdogan en pretendiendo ke el model de governansa turko es laiko trusho la fin de una kooperasyon en Ayifto i en la Tunisiya kontrolada akel tiempo por la Fraternidad Muzulmana. Malgrado todo la Turkiya mira de apatronarse lo mas posivle de los payizes arabos despues del refuzo de la Evropa Unida de achetarla komo miembro de la unyon. Este golpe kavzo ke la stratejiya turka troke de direksyon visto ke el payiz no siendo achetado komo evropeo deke no ser un payiz muzulmano patron de los arabos? Mizmo ke el Imperio Otomano no avia deshado buenos rekuerdos no kale olvidar ke el fue el dalkavo Kalifat muzulmano.
Dezde 20 anyos los miembros islamistos del partido AKP a traverso la media miraron de azer propozisyones de partisipasyon en favor de la politika araba en el konflikto Israelo-palestiniano en rompiendo las relasyones politikas i komersialas kon Israel. El amigo de ayer se izo el inimigo de oy, mizma koza ke avia akontesido a Israel kuando los ayetollahes avian tomado el puder en el Iran. Ansi grasias a la medya la kaye araba ampeso a sintirse serkana de la Turkiya, de su modo republikano demokratiko muzulmano, situasyon mueva para los payizes arabos mirando de eskabuyirsen de los rejimes diktatoryales. A la Fraternidad Muzulmana le gusto muncho la senteza entre la relijyon i la demokrasiya sovre kualo ampeso a interesarse en la politika interna del AKP el kual fue kapache a dezvelopar el payiz i trayerlo al rango de 16 en potensya mondiala. Ademas los responsavles de la Fraternidad konsideraron a Tayyip Recep Erdogan komo un ermano suyos fina su deklarasyon ke izo durante su vijita del Septembre 2011 en la Tunisiya.
Durante su vijita komo una dush yelada el deklaro ke la Turkiya es un payiz republikano, demokratiko, laiko i de djustisya ansi leshos de ser una republika muzulmana semejante al model Iranyano, koza ke repeto mas despues en su vijita en el Ayifto. Ansina la Turkiya peryo la estima de los payizes del Magreb i indimas akel de la Fraternidad Muzulmana.
Visto el rejim laiko establesido por Ataturk, el AKP i su banda en el poder devra ser atentiva komo ayudar i kontrolar en Damas el governo provizoryo El-Sharaa visto ke el buto de este sinyor es de krear un payiz unido sovre una republika muzulmana bazada sovre la Sharia adaptada a las kondisyones del diya. Ay riziko ke lo ke akontesyo en el Magreb no se repete.
Por el Dr. Selim Salti
Comments