(Teksto-Audio)
(Yazarı sesli dinlemek için tıklayınız)
Los dirijentes de los Emirates entendieron antes de todos los otros dirijentes arabos, ke lo keran bien o no, Israel es inevitable en el Medyo Oriente. Esta idea izo su kamino después de la konferensia organizada por la administrasyon Trump en Manama, la kapitala del Bahrain al sujeto de topar solusyon al konflikto israelo-palestiniano.
Avia afirmado en mi eskrita a este sujeto, ke después de este enkontro nada no va ser semejante entre las relasyones de Israel i de los payizes arabos kon los kualos Israel no tiene fronteras komunas i kon los kualos no tuvo konflikto militar direkto. Manama fue una buena okazyon a ke munchos de los payizes arabos se deklaren publikamente ke mantienen relasyones sekretas kon Israel i ke mizmo azen komersyo kon el endirektamente. Manama troko el paradigmo del rekonosimiento de Israel. Malgrado de miles de kilómetros de distensya el Sudan i el Marroko rekonosyeron de yure a Israel. En el kavzo de los Emirates ke son alechados por un grande dizierto de 3000 kilometros de Israel , juntos kon el Bahrain afirmaron el akordo de rekonosensya kon Israel en Washington el kual fue yamado “Akordo Avraam”.
Oy en dia la situasyon siendo diferente, visto ke la direksyon del estado kambyo sea en los Estados Unidos komo en Israel munchos manaderos politikos lokales se demandan kualo va ser el futuro de las relasyones entre los Emirates i Israel. Los Emirates antes de todo son importantes de punto de vista stratejika para Israel. Ademas eyos representan mizmos semejantes karakteristikas kon Israel, superfisia chika, en kada de uno de eyos biven kaji la mizma povlasyon de 9 milyones. Los 2 payizes nesesitan relasyones etranjeras para sovrebivir en sus rejiones. Kaji posedan el mizmo butcheto de 400 miliardas de dolares, el komesyo internasyonal i la ekonomiya en partikular son dos faktores inevitables en sus politikas stratejikas. Si se ajusta a esto la inimista del Iran se entiende mijor la razón de este aserkamiento.
Este paralelizmo los auna muncho mas de lo ke los alecha i por esta razón , la gerra kon Hamas la vinida de Biden al poder el los Estados Unidos i el kambiamento del governo Israeliano no influensa la diplomasiya ekonomika avansada entre las dos partidas. De otro lado los Emirates aseguran a los dirijentes palestinianos de Ramallah ke todo en pujando las relasyones ekonomikas i sosyalas kon Israel ke no se alvidan de eyos i ke purfiyan a ke un estado palestiniano independiente sea kreado.
Los Emirates son formados de una unyon de 7 diferentes emirates independientes sovre la soverenita de famiyas diferentes. Abu Dhabi siendo el prensipal emirat i la kapitala del payis tiene su boz en las dechizyones politikas. Todos los emirates no ven kon el mizmo ojo los akordos de Avraam, solo el 30 por sien de eyos se deklararon kerer tener buenas relasyones kon Israel, i ke el 70 por sien kedan akavidozos i menos favorables a esta relasyon. Bien entendido si eya trayera prosperidad las kozas trokaran.
Malgrado estos faktores kale achetar ke diferensyas egzisten entre lsrael i los Emirates. La ekonomiya israeliana es dominada por la teknolojia, la de los Emirates por el petrol i sus produktos i del dezvelopamiento de la propriedad immobiliara. Los israelianos vienen i dizen, mozotros tenemos la teknolojia i el saverisyo sientifiko, vozotros tenesh el dinero en abondansa vini mos ajuntaremos i mos enrikesyaremos en poko tiempo. Esta mentalidad no es apresiada del todo visto ke el arabo emiratí pensando al ‘despues’ del petrol kere tener bastante entradas para abasteser a su egzistensya. Pormo de esto están manko entresados en las start-up ma al kontraryo preferan kerer azer komersyo de produktos manufaktorados ke van a vender al todo el mundo.
En los emirates se establisieron zonas liberas de negosyo i industria, onde kada etranjero ke viene in kree su propria sosiedad no paga dasyos i es libero de yevarse a su payis de orijin toda su ganasya. Este sistem es muy konveniente para los israelis ke keraran vender en los payizes arabos i muzulmanos kon los kualos no tienen relasyones ofisialas sus produktos i mizmo sus teknolojias. Ansina los emiratis keren dezvelopar una relasyon ekonomika por un tiempo mas largo i en haveransa. Lo mas de entereso sovre Israel es una kolaborasyon en la enerjia vedre, teknolojiya siber, intelijiensya artifisyal, turismo i mas. Bien entendido siendo 2 payizes del Medyo Oriente eyos deven apresyar las relasyones ke se krean, todo en achetando ke los puntos de vista sosyo-ekonomikos de los dos ‘primos’ desendientes de Avraam son diferentes i ke van a kedar diferentes. Ma kon el tiempo las muevas jenerasyones de los dos payizes se konoseran muncho mas i esperaremos ke se darán a entender kon amista sensera i pas.
El turizmo siendo muy importante asperan a ke los israelianos vengan a vijitar i pasar vakansas en sus payis. A esta okazyon se frugua aktualmente una sinagoga en Abu Dhabi i ke el katering kasher es disponivle en los oteles i siertos restoranes de la grande sivdad. No ay dengun enkonviniente a kaminar en las kayes de las sivdades emiratis kon kipa i la eksperiensa pruvo ke los djudyos son resividos kon alegría. Avizo a los enteresados.
Comments