(Teksto-Audio)
Dezde un siglo el Medyo-Oriente rejyon grande del islam fue i es una shena de konfliktos ke no se eskapan. La uma araba de esta zona, en el 20en siglo no supo komo rejir los diferentes entre los payizes arabos ke se krearon despues de la eskabulisyon del yugo kolonialisto evropeo. Si ajustamos a esto las reservas de petrol i de gas de fueron dezvelopadas en la rejyon, entendemos mijor el interes de las grandes potensias las kualas no mankaron nunka de mesklarsen de los echos interiores de estos payizes por lo mas reynados i unas kuantas republikas ke no tienen la kapachedad de pueder defenderse individualmente i mizmo en grupandose. Los rejimen son diktatoryales i nunka se puede avlar de una demokrasiya mizma primitiva. Ademas la kreasyon del estado de Israel en esta jeografiya fue la sereza en sima de la torta, lo ke forso los arabos a no achetarlo i ke su destruksyon totala fue i es el solo buto komun ke siertos de entre eyos tienen dainda.
La razón de refuzar la egsistensya de Israel malgrado ke sus vizinos arabos peryeron sus gerras kontra el, es la enfluensa de los prensipyos del islam imperyalisto i las doktrinas de los ‘Ermanos Muzulmanos’. La kaye araba fue influensada de tala manera ke el antisemitizmo se dezvelopo en una inimista sin presedente. En Khartum en 1947 los miembros de la Union Araba deklararon ke nunka rekonoseran i establisaran una paz justa kon Israel.
Mas tadre, en 1999, los akordos de Oslo avyeron un muevo kamino de pas, ma Arafat refuzo munchas vezes de rekonoser Israel komo el payis de los djudyos en tyerra de sus antepasados. Es ansi ke la esperensa de bivir en paz kon los arabos palestinianos se desparesyo. Ademas, mos topamos despues de la ‘Gerra Friya’ entre los payizes bolshevikos i los del oksidente, en una mueva situasyon onde los payizes muzulmanos del dorredor del Medyo-Oriente komo la Turkiya, el Iran, las republikas turkanas de la Asia ampesan por diferentes razones jeopolitikas a mesklarsen a los echos de los payizes arabos. El Iran de los mollah se deklaro inimigo de Israel en yamando al cihad, kuando la Turkiya i los payizes turkanos asiatikos se ajuntan kon amista kon el. Entremientes, finalmente el Ayifto i la Jordaniya establisen una paz yelada kon Israel del espanto mayor de kayer en manos del El Kaida.
Tiempo pasando, el mizmo risko El Kaida pujando, en los payizes del norta de Afrika, en Irak, en la Siriya i en el Yemen los kualos vieron kon espanto el Afganistan kayer debasho del kontrol de los Talibanes, kon los kualos los Estados Unidos no salieron a bash i la reaksyon del Iran deklarandose inimigo de los sunnitos en jeneral abasto a ke las doktrinas de defensya ampesan a trokar en esta parte del mundo. Ansina una mueva rejionalizasyon inkluendo Israel se esta dezvelopando en el Medyo-Oriente.
El Iran purfia a dezvelopar un armamento sofistikado para pueder atakar a miles de kilómetros i akuistar la bomba atomika para dar espanto a la Arabia Seudita, a los Emirates i al resto del mundo sunnito. Los Estados Unidos aliado de estos payizes se ajunta a Israel para kombatir la inimista del Iran. Sovre esto, estos payizes arabos dechizaron de no asperar mas a achetar la prezensya de Israel en el Medyo-Oriente el kual poseda su bomba atomika i en kolaborando kon el a formar una fuersa militar valivle kontra el Iran. Es lo ke avyo kamino a los akordos de Avraam. Es rekonosido por el mundo entero ke la armada de defensya israeliana es una de la mijores de la jeografia onde se topa i ke eya fue la ke inisyo kon su teknolojiya la fabrikasyon de bombas atomikas en kolaborasyon kon la Fransya en los anyos 60. Kon pasensya Israel azera se espera akordos sea de pas, sea de rekonosimiento kon el resto de los payizes arabos mizmo lechanos achakes de la menasa Iraniana.
Keda agora el konflikto Israelo-Palestinyano en situasyon dramatika i para pueder entenderlo devremos entender lo ke reklama el OLP. Despues de 1947 la vieja eskola de dirijentes palestinianos desparesyo apoko apoko de la shena i la administarsyon ejipsyana en 1965 kreyo el OLP i nomo a su kavesa Ahmed Choukairi, un fonksyonaryo del payis. Su buto establisido por Nasser era de konkestar en un primo tiempo la Jordaniya en revokando al rey Hussein i de aya atakar Israel para destruyirlo. Para salir a kamino Georges Habache fondador del FPLP i miembro del OLP fue el ke miro de pushar la gerra kontra la Jordaniya en akuzando los jordanianos komo los seuditos de ser aliados tasit de Israel. Munchos palestinianos kristyanos sovre el fyasko de la tentativa de 1970 de konkistar la Jordaniya pensaron ke una revolusyon jeneral del puevlo arabo no se devia deshar solo en manos de los palestinianos.
1967 todas estas ideas kayeron al pozo i es ansi ke realmente el movemento palestiniano nasyo. Arafat kreyo el Farah (la patriya) ke se apatrono del OLP en juntos kon Habashe shef del FPLP. Alianza ke se asemejo a la de Lenin kon Trotski ke se dieron a entender bien i muy mal en mizmo tiempo. Habashe su buto fue alora de amenazar el ekilibro interno de todo payis arabo ke no se okupara seryozamente de la kestyon palestiniana. La Jordania fue atakada, ma sea Nasser sea La Rusia Sovyetika no permetyeron el soslevantamiento kontra el rey Hussein el kual parvino a obtenir la kapitulasyon de Arafat en bonbardando los kampos palestinianos de Amman. El bilancho fue de 25000 muertos.
Arafat i su banda se establisieron en el Libano i aya mizmo en atakando el norte de Israel fueron forsados por Israel a egzilarsen en 1982, a Tunisia. En el anyo 2000 kon la intifada Arafat kijo mostrar su fuersa durante las eleksyones israelianas onde Sharon fue elido, persona ke sovre los medyanos politikos reprezentava el refuzo de pas, koza ke salyo yerrada. Ansina malgrado los akordos de Oslo ke permetyo la kreasyon de la Otoridad Palestiniana sovre una partida de Yehuda i Shomron el refuzo de rekoneser Israel i de topar un remedyo para establisir la paz fueron vanos. El OLP kontinua a reklamar la destruksyon de Israel i no se save fin a kuando.
Comments