(Teksto-Audio)
(Yazarı sesli dinlemek için tıklayınız)
A penas si el kalmo se establisyo en Israel i en la banda de Gaza, ke los espesialistos ampesan a espandir muevas ideas de gerra, de inimista, de konflikto politiko, de analizar las verdades i las mintiras de la lucha entre djudios i arabos en la medya sosyala; de sus partes, los sirkolos diplomatikos miran de negosyar treguas entre Israel i el Hamas i el Jihad islamiko en kijendo tomar el mijor profito del trato.
Siertos komo mi pensan ke la dalkavo batalya entre Hamas i Israel no va ser la dalkavo i ke dezde durante 16 anyos ke Israel se travo de esta banda de tyerra, sin mizmo dechar un solo israeliano, onde se repeto 6 gerras anchas sin ke se pueda topar una solusyon a arestar la inimista, se sienten un poko pesimistos de no poder presentar un plano de kayades ke durara entre las partidas sin mizmo rezolvar el problem de pas. El puevlo de Israel a la unanimita esta ves no kijo ke los atakes de Tsahal se areten antes ke el Hamas sea a noventa por sien destruyido. Ma lo ke vemos en realita no es ke la repetisyon de los konfliktos pasados. Hamas de una manera o otra keda en poder en Gaza i kontinua kon su politika a mirar de diktar sus kondisyones sea a Israel sea a la Otoridad Palestiniana de Abbas ke la konsidera i a eya inimiga.
No ay remedyo mizmo en partida de trokar de politika a los dirijentes de estos establisimientos terorostikos ke son indrokdinados kon las ideas de los Ermanos Muzulmanos las kualas en dinguna manera i kondisyon no achetan la egzistesya de Israel i ke en frente de la realidad aktuala se dizen vamos a asperar si es nesesaryo sientos de anyos fin al dia ke vamos ser kapaches de echar los djudyos de la Palestina. Dezde munchos anyos los palestinianos sovre las ideas del mas grande antisemit arabo Haci Emin el Huseyini no eskapan de ambezar en las eskolas en todas las partes del mundo arabo, ke matar djudyo no se konta pekado i ke eyos kolonizaron la Palestina i dunke son kondanados komo todos los kolonizadores evropeos de irsen atras de ande vinyeron. Tanto ke estos diskorsos kontinuan no devemos asperar trokamyentos en la mentalidad palestiniana i por dizir la pas kedara un eshuenyo.
Bien entendido uvo eksepsyones a esta mentalidad irrelistika ma la estorya moderna mos ambeza ke los lideres arabos ke kijeron o ke izyeron pas kon Israel fueron kaji sin eksepsyon matados. Los echemplos son varios. Vos dire unos kuantos de eyos. El primer fue el Rey Abdallah de Jordania ke fue matado en Yerushalayim sovre el malavladero de los dirijentes arabos de otros payizes del Medyo Oriente akuzandolo de kerer meterse de akordo kon Ben Gurion. Un sigundo fue el solo líder del PLO el kardiolog Isam Sartawi ke fue asasinado por el grupo Abu Nidal en el Portugal por aver achetado de negosyar una pas i la prezensya de Israel. Un treser fue Anwar Sadat ke fue abatido por sus propyos soldados en una revista militar en el Kayro, enjuntos kon 10 otros dirijentes. La razón era komo el se permetyo de azer la pas kon Begin el inimigo apuntado de la uma araba. Un kuatren fue el asasinato un anyo después del prezidente del Libano Bashir Gemayel, el kual estava pronto a azer la pas kon Israel en dialogando kon Menachem Begin. El i 26 otras personas muryeron durante un atentado en Beyrut.
Estas todas matansinas fueron kavzadas pormo de mirar de empidir todo modo de negosyasyones de pas entre Israel i los payizes arabos mizmo en estado de diskusyon endirekta.
Esta manera de golpes no seven mas, ma esto no kere dizir ke los lideres ke afirmaron los akordos de Avraam kon Israel, no son vizados por los teroristos islamistos palestinianos. Mizma situasyon prevale por el rey del Marok ke se konsidera amigo del judaizmo.
Una ves otra vemos en los dirijentes de Gaza el mizmo dezeyo de impedir muevos akordos al seno de Israel. Eyos se organizaron i reucheron kon un punyado de sus amigos arabos israelianos a organizar manifestasyones onde rompieron, derokaron butikas, mataron pasajeros , kemaron karos en Yerushalayim i en diversas sivdades mikstas del payis komo Yaffo, Akko i Lod onde djudyos i arabos biven enjuntos. Eyos fueron kapaches de dezunir las 2 komunidades justo en el momento ke Mansur Abbas kon Naftali Bennett estávan en diskusyones para formar por la primer ves en la istorya parlamentarya de Israel una koalisyon entre los partidos sionistos i los partidos arabos, lo ke keriya dizir la konfirmasyon de la demokrasiya israeliana nasyonalista. La dalkavo batalya yamada “La operasyon de los defendores de las enkasteyaduras” de 11 diyas mato este inisyativa mizmo antes ke veya el dia i fue metida al tavlado por los deputados arabos. Ansi Hamas parvino a su buto, mos demandamos dunke eske la pas en estas kondisyones pode sobrevivir?
La pena después de la batalya es mas grande entre los israelianos viendo los danyos ke fueron echos a las sinagogas, a las moradas i mas i sovre todo la muerte de 12 djudyos sin pekado entre los kualos un ijiko de 5 anyos. Muncho mas difisil va ser de topar el modo komo restabliser la konfiensa entre los sivdadinos djudyos i arabos después de lo ke se paso. Un grande lavoro de buena velunta será neseseryo para las dos partidas para kurar una yaga semejante ke se podiya evitar.
No mos alvidaremos ke mizmo ke Anwar Sadat fue matado la pas kon Misrayim konituna, i ke malgrado ke el Rey Abdallah fue asasinado la pas kon La Jordania perdura. Mozos djudyos siempre bivimos kon esperanza.
Comments