(Teksto-Audio)
(Yazarı sesli dinlemek için tıklayınız)
La enerjiya produzida a baza de petrol o gas natural es menesteroza, kaji indispensavle, en dia de oy, para la umanita. Los payizes ke los posedan se sientes poderosos por la simple razón ke estos produktos los renden fuertes en las shenas diplomatikas i espesialmente jeopolitikas. Ay otros payizes siendo tributaryos de esta enerjiya fosil, se kontentan por lo mas uzar peham(karvon), ke es mas barato, ma ke ensuzya la natura en kaytandola kon los gases ke libera. Para impedir a esta situasyon una mayoriya de paízes se sienten obligados a estar debasho de la egemonia de los payizes produktores de petrol i de gas i a sumeterse a sus kaprichos. Ansi se kreyo en el mundo dezde 100 anyos un jenero de monopol diktatoryal kon la formasyon de un ‘klub fiktivo’ de produktores ke todo no siendo atados los unos kon los otros, eyos se dan a antender sovre la politika de presyos ke empozan al resto del mundo. Entre eyos el líder siendo los Estados Unidos se pode mensyonar la Rusiya, los payizes arabos i muzulmanos los kualos formaron entre eyos el ‘kartel yamado OPEC’ i potensyas mas chikas komo la Ingletyerra, el Kanada, la Norvegya, el Venezuela, el Meksiko i mas.
Israel dezde su fondasyon durante 68 anyos fue el ke pago su enerjiya lo mas karo visto la inimista de los arabos ke nunka kijeron venderle petrol o gas i su lechor de los manadores non muzulmanos donde los patrones de los kualos se izyeron pagar sus produktos a presyos mas altos del merkado. Israel durante esta larga perioda empleyo en grande kuandidad peham importado de la Afrika del Sud i ensuzyo ansi su atmosfera. Kaji toda la elektrisita produzida en el payis proveniya de las santrales uzando peham.
Mirakolo si se pode dizir, en estos dalkavos anyos Israel topo en su mar teritoryala gas natural en abondansa ke sovre las estimasyones teknikas el podera abastaser un siglo para su konsomasyon lokala en enerjiya. Ademas Israel pode eksportar lo demaziya de gas una vez distilado i es lo ke afito poko tiempo antes, en vendiendolo al Ayifto i a la Jordaniya.
Es kon grande kontentes ke el puevlo israeliano se rende kuento, ke la agua i la elektrisita ke nesesita serán produzidas ekonomikamente a koste igual a los de las potensias del klub fiktivo. Ademas el israeliano a partir de 2025 respirara un ayre de kaji sinkuenta por sien mas limpyo en raporto al tiempo ke se empleyava el peham, visto ke la kontenensya del nitrojen oksid i del sulfur dioksit del gas natural son basho de meta. No ay duvda ke ansi el efekto ke kreye el ‘fenomeno de ‘serrá’ será manko. Malgrado esta ameliorasyon, Israel deve kontinuar a dezvelopar muevos manadores renovelavles ke no liberan gases. Ma por las oras, la elektrisita produzida kon los panos elektrovoltaik i los mulinos de ayre no depasa el 10 por sien de la konsomasyon.
Israel todo en respektando los akordos de Paris de 2016 sovre el kontrol klimatiko deve sin duvda profitar de su gas. El gas no solo le da una importante oportunidad de azerse una potensya rejyonal en el Medyo Oriente, ma visto la situasyon de la gerra Rusya/Ukranyana de estar en pozisyon de ser rogado de parte de los Evropeos. La Rusiya debasho del ambargo si no manda su gas a la Evropa ke depende a la altura de 45 por sien de su menester, eya es ovligada de bushkar otros manadores en el mundo. Oy Israel se pode azer un buen partener de eya i ansi ser vista en Bruksel kon un ojo diferente kon meno antisemitizmo i anti- israelizmo. De otra parte la Turkiya bate la puerta, aze su mea kulpa por sus inimista de los 13 anyos pasados, i mira de konvenser a Israel de krear un gasoduk entre los 2 payizes. La Turkiya oy nesesita el gas Ruso, Iranyano, Azerbaydjiano i por lo mas el Israeliano para su konsomasyon i para deklararse a la Evropa komo aktor inevitable de su transfer kon sus gasodukes. Komo la Rusiya i el Iran son deklarados por los evropeos ‘persona non grata’, le keda Israel i el Azerbaydjian.
Israel en el korso aktual opera 3 mayores pozos. Tamar ke fue el primer deskuvrido en 2009, es serka de 90 kilometros al oveste de Hayfa kon una kapachita estimada de 240 miliardas de metros kubikos (MMK)de reserva. Un anyo después el pozo Leviatan fue deskuvierto a 30 kilometros al oveste de Tamar en aguas profondas. Las analizes ke se izyeron sovre su kapachidad mos indikan ke la reserva es de 500 MMK. Esta rezerva fue la mas importante diskuvierta del anyo 2010 en el mundo. Muevas eksplorasyones fueron echas grasyas a las kualas se deskuvieron los pozos de Karish i de Tanin kon una kapasita serka de 100 MMK ke poderan ser metidos en servisyo fin de esta anyo.
La sosieta amerikana Chewron, sosyo del proyekto somete al governo Israeliano planos para mirar a deskuvrir muevos pozos en la mizma zona i ansi arivar a 1000 MMK de reserva. El konflikto teritoryal kon el Libano en el kual ay probabilitades de topar gas no esta para ser reglado en serka. El Hezbollah se opoza a todo modo de kompromiso en las negosyasyones Israel/Libano en pretendiendo ke todo el gas del este del mar Mediteraneo apartiene a los arabos i ke los djudyos se lo rovan. Al avizo de los komantatores politikos es ke esta deklarasyon desfavoriza el Libano i ke no derandja Israel del todo.
Comments