Es difisil de darmos a entender mozotros djudyos, komo dezde miles de anyos no podimos eskabuyormos del antisemitizmo. Un mabul de livros se eskrivyeron a este sujeto, sienes de ombres djudyos de sensya purfiyaron de mirar a topar una solusyon a esta gangrena ke se arraygo en la memoria kristiana i muzulmana, sin poder tener resultado positivo. En el empesijo eya era relijioza, kon el tiempo se transformo en ekonomika, ansi sienes de anyos todo lo ke fue pensado i mirado de atakanar fue vano. El antisemitizmo tiene rayizes en la memoria de los puevlos en los kualos bivimos miles de anyos. Imposivle de poder eliminarla malgrado las prekosyones i la defensya juridika establisida en el mundo kristiano, eya es i será siempre prezente.
La istorya djudiya es yena de savyos ma para mi los mas 2 importantes son Moshe Rabino i Theodor Hertz, el primer mos dyo la kreensa en D., i el sigundo la idea mesianika de demandar al puevlo djudyo de eskabuyirse de la diaspora i de tornar a su tyerra prometida. Los djudyos sufriyimos i fuimos masakrados en lugares diferentes de la Evropa i de la Asia. En la península Iberika, en Rusiya, en la Alemanya, en la Polonya, en los Balkanes, en el Medyo Oriente i mas. Kualo era lo mas kolay para los tiranos, ke siempre tenyendo difikultades kon sus sujetos, de akuzar los djudyos sin defensya, de todas las sufriensas a las kualas eran sumitidos.
Dainda oy en dia ay kontra los djudyos violensa, rovos, matansinas, ke se dezvelopan en la memoria internasyonala, sujeto ke se mira de kontrolar grasias a leyes ke kastigan estos aktos. Ma malgrado esto la inimista del djudyo mizmo si no bive mas en una grande partida del mundo en eya egziste. En el mundo muzulmano siempre uvo antisemitizmo, ma kon el establisimiento de Israel eya pujo a unos grados sin semejansa kon los de la Shoa. En el 7 Octobre 2023 los palestinianos de Gazza debasho del rejim diktatoryal por el kual fueron endoktrinados a la idea terrorista ke matar, arevatar, violar las mujeres, kemar los kibutses i los moshaves del dorredor de la banda de Gazza onde eyos fueron anyos empleyados, mos prova el nivel de la kruelda a la kuala el puevlo djudyo en su tyerra mizmo fue akarado.
La doktrina de los Ermanos muzulmanos bazada sovre el Koran, glorifika el martiryo ansi los muzulmanos no dan importansa a la vida en este mundo por ke se kreen a una vida futura despues de la muerte, onde teneran derecho a 72 virjinas si se azen shahit en gerreyando el infiel, en este kavzo el djudyo. Penso ke este komporto no ayudara a la kavza palestiniana a tener libertad en un payis ke le apartiendra si un dia el vera el dia. Palestina libera no se fraguara kon malisya ma kon tratar de una pas para 2 puevlos biviendo uno al lado del otro. Kreyo ke los palestinianos despues de este dezastro ke provoko Israel a derokar Gazza en matando miles de los del Hamas se eskabuyeran kon el tiempo del terrorismo i biveran en armonía kon los djudyos vizinos.
De otra parte el mundo oksidental komo el mundo arabo deve de entender ke finalmente la violensa del Hamas empide a ke los arabos de Gazza bivan i se dezvelopan al bodre del Mediteraneo. Difisil de entender deke dezde 75 anyos los dirijentes de Gazza preferan la gerra a la pas en planifyando violensa i anarshiya lo ke trucho el dezastro del 7 Octobre. Eyos fueron i son kavzantes de las sufriensas de los israelianos i de los palestinianos de Gazza ke son empleados komo eskudo. Poko les importa si la povlasyon se muere achakes de los bombardamientos. Nada no les interesa ke mas sus komodita en Doha i los milyones de dólares ke se meten en sus aldikeras grasias a esta inimista de Israel.
El konflikto de Gazza se pode terminar en un supito, basta ke los arevatados sean liberados i si el Hamas acheta a deshar las armas. Si no, la gerra kontinuara malgrado ke el presyo a pagar de parte de los soldados israelianos será grande. Israel no tiene remedyo ke de defenderse kual ke sea las kondisyones negativas ke se kreeran al seno de la komunidad mondiala. El antisemitizmo aktual no lo devra detener de defenderse, 2 mil anyos asperimos para poder tener una armada ke mos defende. El djudyo en Israel i mizmo el ke se kedo en la diaspora no es el mizmo de akel djudyo de antes de la profesia de Hertzl, oy el se save defender grasias a su kreativida siantifika, industriala i militar.
Comments