'Dezinyar es la ekspresyon de ser mujer kon todos sus sentimientos i todos sus konfliktos' esta dizyendo la selebra dezinyatora Donna Karan.
En el anyo 1949, Donna Karan, ija de una famiya djudiya, nasyo en Queens, el sentro de la moda de New York. El padre de Donna, ke era un buen shastre muryo kuando Donna teniya tres anyos. Su madre era una manekena de 'show room' i una reprezantante de vendita. El padrasto de Donna, Harold Flaksman, tambien estava en el echo de moda. Por esta razon, Donna aparejo i prezento su primera koleksyon kuando eya dayinda era una eleva en el lise.
Komo Donna era una eleva muy reushida en la eskola Parson's Design, la selebra dezinyatora Anne Klein le propozo de lavorar kon eya un enverano entero. Esta propozisyon kavzo el trokamyento en la vida de Donna Karan. Donna lavoro komo dezinyatora al lado de Anne Klein tres anyos enteros. Kuando Anne Klein muryo de kanser, todos la estavan konsiderando komo la eredatora de Anne Klein. Kon el ayudo de Louis Dell'Olio (un amigo de klasa), Donna aparejo 'la koleksyon Anne Klein'.
Entremyentes, Donna se kazo kon Mark Karan i paryo una ijika, Gabriella. Ma esta alegriya no turo muncho, el kuplo se kitaron i Donna se kazo de muevo kon Stephan Weis, ke era su amor de chikes. Dyez anyos despues, kon el apoyo de Tokiyho, el muevo posedor de la kompaniya de Anne Klein, Donna kreyo su marka ke es la refleksyon de sus instinktos femininos .
En el otonyo del anyo 1985, eya kreyo la primera koleksyon, Donna Karan. La presa anonso al mundo el nasimyento de una mueva estreya. Kuando le demandan a Donna Karan, kualo es el sekreto de su reushita, eya responde 'Fasilitar la vida de las mujeres. Yo so una mujer, por esto me plaze ayudar a las mujeres. El esprito de artista ke tengo aryento, me esta esforsando a kreyar ermozuras por las mujeres'.
La koleksyon de Donna Karan, 'Seven Easy Pieces' (Siete Pedasos Fasiles) izo un grande sukse kuando salyo a la plasa. Estos syete pedasos son vistimyentas ke se pueden vistir invyerno i enverano en todas las okazyones. ' Akeyos diyas, mi ija Gabby i yo no estavamos pudyendo topar ke vistir. Mos estavamos emprestando los vistidos de una a la otra. No se estava topando un blue jean komo keriyamos. A la fin, pensi de kreyar una marka mueva. Ansina fue el nasimyento de DKNY’ esta dizyendo la selebra dezinyatora. 'Kuando me demandan "Deke DKNY?", les digo ke el NY ke esta emprimado enriva la etiketa sinyifika el rapido movimiento de New York. Por mi New York es una vyeja sivdad ke tyene un futuro briyante. Esta sivdad reprezenta el modernizmo endjuntos kon el klasisizmo. New York es el enkontro del pasado kon el futuro.'
La filozofiya de Donna Karan se puede rezumar en una fraz: 'Lo poko i lo propyo es lo ermozo'. El estilo ke kreyo Donna Karan, es enspirado de su talento ke vyene de nasimyento. Malgrado ke su lavoro estava tomando muncho tyempo, Donna tuvo tyempo para azer otros tres ijos. Por Donna Karan, la moda no es limitada kon vistimyentas. Para eya, la moda es una forma de bivir. Los aksesuares ke eya empleya en sus vistimyentas sembolizan el rapido muvimyento de New York.
Mas despues, kon el ayudo de su marido, la marka DKNY se establiso mezmo en el mundo de kozmetikos por ombres i mujeres. 'Todo es tokar i sentir' ke es el tema de DKNY Home Collection fue desinyado por Donna Karan. En el anyo 2001, Donna Karan peryo a su marido Stephan. Eya miro a olvidarse su tristesa kon su amor por su inyeto. Donna Karan resivyo numerozos premyos. Eya fue envitada al 'Council of Fashion Designers of America' sesh vezes. Karan fue lidera de munchas organizasyones sosyales i les ayudo en diversas maneras.
Despues de la muerte de su marido, Donna Karan vendyo su marka a la kompaniya Louis Vitton Moet Honnessy por milyones de dolares. Ma eya kontinuo a lavorar komo dezinyatora. Donna Karan dyo su nombre a mas de syen magazenes en el mundo entero. Eya selebro sus vente anyos de reushita kon su livro 'The Journey of a Woman-20 Years of Donna Karan'. Se desido a remeter el revenido de este livro a las organizasyones ke estan luchando kon el kanser. La selebra marka DKNY, fue el sembolo de la mujer enerjika ke se aze de mil pedasos en koryendo el diya entero entre su kaza i su echo ma sin neglijar su aparansya i su vistimyenta.
Donna Karan fue envitada a Israel de la parte del Segundo Primer Ministro, Ehud Olmert. Despues de esta entrevista, Donna Karan dyo una deklarasyon a los jurnalistos dizyendo ke Olmert le dyo enformasiones sovre el sujeto de los envestisimyentos etranjeros en Israel i le propozo de aparejar una produksyon mueva en Israel. Karan se entereso muncho en esta propozisyon i le prometyo a Ehud Olmert de kontaktar el Ministerio de Komerso de Israel sovre el sujeto de envestisimyentos i eksportasyon en Israel.
En el anyo 2007, Donna Karan se fue a Israel i de kada eleva del departamento de la eskola Textile Design, tomo un projekto para yevarselos a su kampaniya en New York.
En el anyo 2015, Donna Karan anonso ke va rezinyar de su karyera komo direktora de su kampaniya para sentrarse en su marka de estilo de vida,Urban Zen, ke eya aviya establisado en el anyo 2007.
Comments