LA JUDERİYA DE TOLEDO

Unos kuantos antes estuvimos en Toledo. Toledo es situada enriva de una montanya, i es rodeada por el riyo Taho. En la Edad Media, kuando Espanya estava debasho del kontrol muzulmano, Toledo fue la sivdad de las tres relijyones, todos bivyendo endjuntos en pas i en armoniya. Oy, kada anyo, miles de turistos estan vinyendo para vijitar los monumentos i las estrukturas antiguas ke sovrebivyeron.

Seguramente, lo ke mos entereso lo mas, fue la Juderiya. Los tres diferentes kartyes de la tres relijyones empesan en la famoza Plaza de Zokodover, el sentro de la sivdad ke era el lugar de reunyon. Entrimos a las kayes estrechas de La Juderiya por la Puerta de Assulka, ke es serka del merkado de pulgas ande se vendiya azete, manteka, garvansos, lentejas i todo lo ke era menester por la vida kotidyena. La kaye prensipal se yama Kaye del Marmol i konekta la Juderiya kon el resto de la sivdad.

Ay otro merkado, ande ay lugares para orasyones, banyos publikos, ornos de pan, palasyos i una pared. Serka del riyo Tajo, aviya el Barrio del Degolyadero, yamado ansina porke aki se sakrifikavan las vakas kon el ritual judyo.

En el Barrio de Hamazelt, biviyan las famiyas judiyas las mas rikas, i en la kaye San Juan de Dios, biviya el judyo el mas konosido de Toledo: Samuel ha-Levi. El era el trezorero del rey Pedro de Castilla i le ordeno al rey de konstruir una grande sinagoga, Sinagoga de El Transito. Oy, esta Sinagoga es konservada komo muzeo sefaradi. Samuel Ha-Levi, era el proprietaryo de la kaza ke agora es el Muzeo del Greco. El nombre orijinal era la Sinagoga de Samuel ha-Levi. La chika Sinagoga, la Sinagoga de Yosef ben Shoshan, ke era el nombre orijinal de lo ke se konvertyo oy a la eglezia de Santa María la Blanka, se konstruyo debasho del reynado de Alfonso VIII. (Debasho del reynado de Alfonso VIII, todos biviyan en armoniya). Antes, todos los viernes, un rabino sonava tres vezes el shofar para anonsar el Shabat.

En akeyos diyas, aviyan dodje Sinagogas en la Juderiya i serka de kada Sinagoga aviya un banyo suterano yamado mikve. Los arkitektos muzulmanes konstruiyan las Sinagogas, las Eglizyas i las Mishkitas.

Entre las dos Sinagogas, puedesh ver la kaza de un judyo riko, el judyo Izak, ke finanso el viyaje de Kristof Kolomb. Izak aviya emprestado las paras a Izabel i Fernando por el viyaje. Los proprietaryos de las kazas judiyas teniyan mikves debasho sus kazas.

Kaminando por las kalejas de la Juderiya, enriva de las piedras de embasho, ay eskrituryas en ebreo. Disheron ke ay trezyentos sinyos enriva de estas piedras: la Menora, la Estraya de David, i Hay (el biervo ebreyo por Vida).

En los anyos 1486-1492, la Plaza de Zokodover en Toledo, fue el lugar de la engizisyon. Tomas de Torquemada, el Grande engizitor de Espanya, kon sus manos kemo kinyentos judyos en este lugar, i emprizono munchos otros.  En el Muzeo de la Tortura estan egzebitados los artefaktos de esta perioda obskura de Espanya.

Dora NİYEGO

Apretar al boton para ver todos los eskritos

Bağış/Donation/תרומה