El eskrivano i ekonomisto amerikano George Gilder eskrivyo un livro intitolado ‘’The Israel Test’’ onde da a antender la superioridad de la intelijiensa djudiya. El es krediso en una famia onde el estudyo de la literatura i del arte fue ambezado de djeneransyo en djeneransyo. El no es djudyo i apartiene a los desendientes de amerikanos blankos de orijin evropea ke establisieron en la istoriya los fondamyentos del estado de los Estados Unidos.
El establisyo ke el IQ de 140 i superior a este shifro, es 6 vezes mas alto en el meyoyo djudyo ke del resto de los umanos. La uma djudiya no depasando el 1 % de la povlasyon mondiala, en el 21 siglo resivyo el 32 % de los primyos Nobel. La kavesa djudiya pensa a dezvelopar en jeneral muevos sujetos de lavoro i de inovasyon teknolojika koza ke da a Israel el rolo de ser el payis de kreativita el mas grande despues de los Estados Unidos, en konkerensya kon los ‘Goliates’ evropeos i asyatikos. Basta de ver el ‘index Nasdaq’ ke del anyo 2007 fina oy las sosiedades israelianas en kandidad depasan las kanadianas i las evropeas.
De mi punta de vista dire ke bien entendido ke en el mundo, sovre todo en Evropa, malgrado ke se remarka una admirasyon por el djudyo i por el sukseso de Israel onde la meta de la povlasyon djudiya mora oy en diya, el selo i el dezeyo puja el antisemitizmo a proposiones ke son difisil de mesurar tanto están altas en estos tiempos. No ay duvda ke la inimista de Israel en el mundo muzulmano de oy esta debasho de la influensa oksidentala. De munchas, de las ideas i de las echas malas Israel, este chiko payis, mira de protejarse kon fuerza por ke su puevlo save ke en el konflikto Israelo-palestiniano no ay aktualmente dinguna solusyon en vista. Los dirijentes arabos ironikamente en mayoriya dezvelopan la idea ke kale ke los djudyos se mueran para ke la Palestina araba biva. Munchos dirijentes evropeos sovre los de Bruksel kon ipokriziya alavan de una parte a Israel ma de la otra no mankan de dar razón a los arabos en sus luchas para destruyirlo.
Durante siglos el kastigo era el instrumento de reglar la vida i la prezensya djudiya en los payizes evropeos. El kastigo puidiya ser aplikado a individuales komo a grupos enteros de djudyos, ke no solo servia de maltratar a esta uma ma de okuparse a reglar las relasyones kon los otoktonos i sus governadores. A diferentes periodas los kastigos i las kondisyones difisil ke se aplikavan a los djudyos eran diferentes; komo los lugaros limitados en los kualos puediyan establisirsen, kuantas kreaturas las famiyas puedian tener, a kualas sivdades tenían el derecho de entrar i ke djenero de ofisyos puedian praktikar i lavorar.
Semejantes aktos politikos de maltretar se ven oy kontra siertos israelianos de Yehuda i Shomron por la administrasyon amerikana de Biden. Eyos son akuzados de atakar a los arabos de sus vizindados. Difisil de entender este komporto visto ke en Fransya, en Alemanya,en Ingletierra i mizmo en los Estados Unidos se ve una grande inimista kontra los muzulmanos onde uvo kavzos de atakos i mizmo de muerte sin ke seyan seryozamente kastigados. Por la primera ves el djudyo es kastigado desde de la Shoa por el oksidente, koza ke mostra ke la inimista del djudyo no esta para despareser. Milyones de dólares son investisidos para reglar esta kalamidad sin rezultado.
Ma de ke derecho los Estados Unidos i la Evropa Unida se permeten de mirar a kastigar israelianos kuando el governo Israeliano se okupa de mentenir la pas en los territoryos de Yehuda i Shomron i de impedir atakos de partikulares kontra los kazales arabos. Kual es el derecho internasyonal ke les da este derecho. Malorozamente no solo individualas, ma organizasyones de bienfezensya, lideres siviles i mizmo ofisiales elijidos i militares son akuzados de atakos kontra los arabos palestinianos.
Biden dize ‘la Amerika es una idea de libertad’, entonses de ke no la aplika a los djudyos i prefera establisir sistemas viejos evropeos de apartamyento. Esta kestyon merese una repuesta de la parte de la administrasyon amerikana i de su ministaryo del eksteryor prinsipalmente anti israeliano. Israel devra estar fuerte sovre este sujeto komo lo fue durante toda su istorya. El mundo enfin deve de entender ke el israeliano es diferente del djudyo de los siglos pasados, kon su intelijensya es kapache de afrontar todo modo de difikuldad i venser sus inimigos. Vino el tiempo de dizir BASTA.
Dr. Selim Salti
תגובות