Grasias a el ke moz da salud i vidas, para renkontrarmos una otra vez.
Kaminando i avlando, las provas se adelantan. Arivamos ala semana de alkavo. Despues de siete dias, sin neder; suvimos a la shena.
La semana ke kada dia, devemos te arekojer i kompletar todas las faltas i falsas. Seguro ke ay programa de lavoro. En el primer renkontro de la semana; ay de akodrar las reglas prinsipal, komo komportar en shena, i de atras de la shena (la kulisa) … es verdad ke esta kesyon la lavorimos en los primeros renkontros. Ma! Siendo ke entreval de las provas; estuvimos; riendo i burlando. Es inportante de pasar una otra ves sovre las reglas.
En esta semana; ay ke aprovar las vistimientas i aksesuares, asta ke las puedemos azer; en la sesion de tiempo, el kual ke se desido, ke deven de ser. La mezura de tiempo es kon segondos. Por esta razon; los ayudantes estan siempre en muvimiento… todo deve estar aparejado en regla. Ansi; kuando le artista o el jugador, sale de la shena a la kulisa; tyene solo segondos kontados, para trokar kostum. Todos estan en una grande impresia, estan komo un panaris para eksplorar. Anke ya saven ke; los ayudantes ya se aparejaron i kontrolaron todo. Los ke deven de salir en shena, estan kon espanto. Kada uno se akodra de un aksesuar ke lo tiene menester en el jugo, empesa a bushkar i va demandando a kada uno si lo vido. No ayuda de el todo lo ke le diran para ke kalme.
La eksitasion ke konsiente el jugador en los dias de alkavo de las provas. Es un sintimiento; ke kale bivirlo, para entender.
No se a kuantos de los ke estan en koriente; le esta enteresando lo ke yo eskrivo. Ma en todo kavzo, va kontunear kon esto, asta ke……. Por la razon; ke kale deshar de atras de nozotros de nota, sovre todo lo ke perkurimoz; para konservar el Ladino. I kada uno, kon lo ke se akupo; en los anios pasados. Seguro ke al lado de las fraguas ke se fraguo en kamino sera chika, ma; personalmente, kreyo ke provi alkansar a adcustar; si sera solo una piedra en esta ovra.
Vendremos a la nuestra kesion; la semana pasada, enpesimoz kon las provas, de los dias de alkavo antes de salir en shena. Kontunearemos kon esto. En la prova de kostumes; siendo ke para las artistas del grupo, ke es la primera entrevista kon la shena. Unas de eyas, refuzan a vistir korse o kalsas entrras (kompletadas kon kulot). Le esta dando fatiga a las sinioras. Ma komo rejisor ke deve de pensar al gusto de ojo de el espektador. Deviya de esplikarles la razon de el ovligamiento. Me entienden? no!... auzar a un estado ke no se uza siempre; es difisil. El tino se va siempre a lo ke dezrepoza en el puerpo, ansi ke se olvidan lo ke tienen de azer o avlar…
En todo kavzo ay de kontunar kon las provas. Ansi se van a auzar a el estado… entre los jugadores el estado diferente; la eksitasion ke konsiente el jugador; jeneralmente prova de guadrar i no dar a konsintir a la dcente. I para kamuflar el estato; toma un poko de alkol. Este "un poko" no tiene mezura… te lo topas al jugador enfrente; bastante alegre, desha ke no se akodra el tekst de el jugo, no se entiende lo ke avla, en este estado. Ansi ke no keda remedio, si no de deshar la prova para el dia ke viene.
Saludozos i alegres, asta la semana ke viene.
(A kontunear)
Albert Anah
Commentaires