Alegres ke estesh todos, kon sanedad. Esta semana arivimoz a el premier de el djugo. Al kavo de vente i kuatro oras de lavoro, tenemoz la shena pronta. Kon el dekor, los aksesuares, los kostumes, las luzes i mikrofones i todo lo ke se nesesita. Todas las artitas i artistos estan en la kulisa Kada uno de eyos, ye vijiito la tualet, ansi ke no tienen ande ir. Estan asperando la muzika ke prezentara el enpesijo de el djugo.
Los ke tomaron parte en la vendidad de lugares, estan kontentes. Todas las sias estan vendidas. Sierto ke avia i envitados tambien. Entre los envitados estavan: El onoravle Yitshak Navon sinken prezidente de medinat Israel. El Enbasador de la Espania, El kerido Moshe Shaul (estaran en ganeden) i muncho mas deputados i personajes ke estavan en ovras adelantadas kon Empresarios ke uzan apuyar en aktos kulturales.
Despues ke entro al salon, el onoravle Yitshak Navon i se asento, salyo a la shena el prezidente de el klob. A remersiar a los envitados, tambien a todos los espektadores. Ansi mezmo, a prezentar el djugo.
Se sintyo el kante de el enpesijo. Avagar avagar se enpesa a avrir la kortina (el perde) …… kayades de ora de amaneser. Si moshka bola se siente la boz…. el puevlo en el salon, aspera ke empese el djugo, i yo en la kulisa, provando de mandar a la artista ke enpese…. Ma ande, kedo enkantada, sele tomo todo. Si alguno la tokara, parese ke se va romper.
Esto sintiendo bozes de palmas ke vienen de el salon. Patron de el mundo, kualo se aze en este estado?!... pasi detras de la artista, la arondji sovre la shena. Pensi ke; mas malo de esto no pude ser, ansi ke ansi, si tadri unos kuantos segondos maz; vamoz a ser desonorados todos…. kualo afito?
No se deke, ma me gusta eskrivir; lo ke bivimos tantos anios, dentro la ovra tiatral, kon la lingua de mi jenerasion’ ke es el Ladino. Estar en shena, es komo una hazinura. El ke gosto la eksitasion sovre la shena, konsiente una adision en su vida. Ande vera una opurtunidad de suvir en shena, aze todo lo ke puede por aktualizarlo. Esto kontunea i despues de anios! Kuando vijita en un tiatro, para gozar de una piesa. A la fin de el djugo, se emosiona, komo ke el mizmo; partisipo en el djugo.
Oh, pardon! Me olvidi… deviya de acustar lo ke deshi la semana pasada en medio.
Ke avia dicho? Si, la arondji a la artista sovre la shena. Kualo afito despues?! Nada, nada no afito. Kuando se konsintio el empusho en la espalda; vino en si, i empeso el djugo.
A las vezes, se nesesita un chiko apuyo, de un otro. Para empesar a adelantar.
Komo pensi en la prova jeneral. El djugo se termino, kaji sin difikultades.
El puevlo kedo kontente; de el sujeto i de los kantes.
La ora ke arrivaron a felisitar, no topi biervos para responder.
Espesialmente; kuando vino el onoravle Yitshak Navon a felisitar; me akodro komo oy lo ke el me disho. "Asta oy en dia, me onorava ke yo fui el ke eskrivio piesa en Ladino, ma oy tengo la onor de felisitarte sovre lo ke tu eksitades. Lo ke tu izites, ez in tiatro en Ladino totalmente. Lo ke yo ize fue un tiatro en Ebreo kon una chika kantidad de palavras en Ladino, i seguro; los kantes en Ladino."
Me se seko el garon, me se apego la alguenga a el paladar. No puide kitar de mi boka, ni un mersi a lo ke me disho…
Alegria ke no manke de vuestra kaza. Kedarash saludozos asta el renkotro, a la semana ke viene. (A kontunear)
Albert Anah.
EL NOVYO FRANKO
Comments