Muy buenos dias, moed alegre a todos los keridos.
Siendo ke ya estamos adelantando kon las provas. Desidimos de empesar aparejar biletos i provar de tomar de nota envitados. Mos mankava la enformasion, sovre la kantidad de envitados ke pueden arivar. La unika indikasion; puedia ser; la eksperiensa de Nisim Bueno (ganeden bueno tenga) el uniko, ke aparejava la gazeta "LA LUZ" i teniya la emprimeriya en Bat Yam. Para resivir su ayudo; deviyamos de; dar reklama en la gazeta. I ansi fue.
El potansiel era maksimum de 3000 personas avlantes el Ladino, i esta kantidad se trata por toda la medina... para inchir salon kon envitados; se nesesita de transportar dcente kon otobuses. I esto era un otro koste por kada siya en el salon. El salon fue serrado por dos noches kon opsion de nochada tresera.
Violet Bahar era la responsavle sovre los bilietos. Sana ke este, asta oy en dia, kontunea kon esta ovra, i kon un grande suksesso.
Si ya enpeso la vendidad de bilietos; devemos de adcustar el grupo kon ayudantes. Por eksempio; ayudantes de makiaj. Salir en shena, i estar debasho de tantas luzes ke aklaran la shena; si no egziste un buen makiaj, no keriash ver, komo se ve el artisto… no solo esto! En el grupo de artistas, la edad nominal era 45 anios. Teniamos menester de artistas muncho mas aedados, komo se nesesotava manseveria tanbien. El makiaj i los kostumes kon todo el aksesuar; mos dara la opsia de uzar artistas en pozisiones diferentes. No se si echatesh tino; al lado de makiozes, avia otros ayudantes, ke se okupavan kon el aksesuar… no no eskapimos kon los ayudantes…
Sanedad i alegria a todos los keridis. Oy estamos adcuntando la lista de ayudantes en el tiatro. Sigun fue eskrito en las semanas pasadas. Formar un Tiatro es una ovra, de un grupo bastante grande. Asta oy; tomimos de nota 1- Eskrivante, 2- artistas i jugadores, 3- Rejisor, 4-Muzikante, 5- ofisial ke apareja el dekor, 6- stailista ke se okupa de kostumes, 7- makioz, 8- ayudante ke se okupa de aksesuar. 9- responsable de los bilietos. Ainda manka ayudantes ke no notimos. Por egzempio: Ton maester, maestro ke se okupa de la musika ke deve dar a sintir en su tiempo durante el jugo los kantes o efektos, i kontrolar i regular los mikrofones sovre la shena. Ofisial ke aregla las luzes en shena. Ayudante ke se karga la ovra de ensender i amatar luzes sovre la shena. Suflor, ke ayuda a los jugadores ke se akodren el tekst. (en los anios de alkavo no se uzo ). Ayudandes ke aparejan i ayudan a vistir las artistas durante el jugo. Ayudante de rejisor, ke se okupa de aparejar las artistas i jugadores ke entraran en su tiempo en shena durante el jugo. Ayudantes ke se okupan de abasteser; komito i beveraje a todo el grupo. Ayudantes en la fuaye ke se okupan kon los envitados. Los partisipantes de la direksion de el klup ayudan a todos de mizmo.
En kurto, esto es una ovra de grupo serka de trenta para trenta i sinko personas. I todos voluntarios!
Kreyo ke poderash imajinar, kualo kere dizir ordenar una ovra semejante. Se nesesita ingervos de fierro, i pasensia sin fin. I munchas vezes, La pasensia no abasta, siertas vezes se sale afuera de los limitos.
La piyesa El Novyo Franko
Semana alegre a todos. Asta la semana ke viene.
Albert Anah
Al vermos kon sanedad i alegria. (A kontunear)
Albert ANAH.
Comments