Saludozos todos keridos. 3 semanas! Trez semanas ariento la gerra. Una gerra ke mo la prepararon i moz ovligaron a gerreyar. Pasamos los dias, rogando a Dios, pensando i agurando ke dara fuersa i salud a los soldados i los guadrara de todo mal. Tanbien a toda la famiya.
Los anyos ke bivimos, el servisio molitar ke tomimos parte; mos anbezo alivyanar el espanto. Ma esto no abasta, para kontunear la vida.
La kesyon sera; ke no todo el mundo se komporta en la mizma manera. Por maz, en una gerra semejante ke vino en supito, sin dengun devinir i aparejamiento. Anke el governo, no siempre puedera dar el servisio i el komporto ke se aspera de el. Siertoe el estado sera mas difisil: kuando los ke estan en posto; no tienen la eksperiansa i el poder de kumplir sus dover.
Lo ke mos kaye en parte; es dar mano kon mano, kon kerensia i provar ayudar a los menesterozos. Pensar bueno i kreer ke teneramoz un buen futuro.
Komo dizen? "La vida no es piknik". Ansi se save, ma nunkua fue i kreyo ke no va ser piknik tambien. Dios moz gadrara de to el mal, i moz aparejara diyas alegres kon todos djustos.
Pensava de eskrivir maz, ma en esta ora sinti el dicho de el direktor offisial de el primer ministro. Yo alevanto manos, por no tener kualo dizir a lo ke sinti!!!
Kon esperansa ke resiveramoz novedades buenas de todas las vandas.
Me enfasyi de kontar los diyas ke estamos en gerra. Esto preferando de rogar.
Ke todos los soldados tornaran a suz famiya, sanos i rezios, ke la armiya salera de esta gerra kon un grande sukseso, ke los feridos estaran saludozos,
los ke estan en mano de el enimigo, tornaran sanos a sus kazas i ke el governo savera komo komportar kon todo esto.
No se deke, ma akodri de un kuento, nombrando el governo. Trez personas se toparon ariento de un avion chiko partikular, en un volo a el eksterno. Uno de eyos, desido de pasar la ora kon el pilot, avlando de aki ide aya... pasando medya ora; el pilot lo kito afuera de su kabina, gritando; " Kon tu avla me mareyates i me kavzates azer un yerro". Un otro de los pasajeros, se alevanto dizyendo; "yo so enjenior, si me kontas lo ke izites te puedo ayudar." El pilot kon ingervos le torno " este me mareyo, i pizi a un boton yerrado. El avion no esta en mi kontrol.
" El ejenior entro a la kabin, izo por aki. Izo por aya. Nada. "El kavzo me pasa ami, no lo puide enderechar." Disho i se fue se asento. Se alevanto el treser pasajero dizyendo" yo so enjenior de elektrisidad, va provar yo. Paso diez puntos, salyo de la kabina dizyendo " no lo puedo enderechar, pardon" se fue se asento i el. El pilot, i los doz enjeniores
miraron en kara de el primer pasajero i demandaron. " "Tu, tu kualo pensas de azer?" Les respondio dizyendo; " yo so ministro en el governo, yo se avlar i tomar el meoyo de la djente. Yo no meti mano en nada, el yerro lo izo el pilot".
El dios moz dara vidas buenas, sanedad i algrias. I moz guadrara de echas de los ministros!!! Saludozos todos. (A kontunear)
Albert Anah
Del filmo “Amor En La Zınganerıa”
Saludozos todos. (A kontunear)
Albert ANAH
Comments