Empesamos oy kon una pregunta!
Si una pregunta ke nesesita repuesta!
I aki la pregunta. " Albert, ay mezes ke eskrives, mos kontas i esplikas sovre el teatro. Komo azer, i kualas son las difikultades. Frankamente, no se a kuantos de los ke meldan les enteresa; komo aparejar i derijir un teatro!... Por mas; ke relasion, de lo ke tu eskrives, a la fin de el tratro Ladino?"
Esta es una pregunta djusta i singifikada! I devo de responder.
Empesare kon una dicha de "Mevlana" un savyo Turko; “Trez dias son; el diya de ayer ke ya paso i no va tornar nunkua. El diya de amanyana, ke no es seguro ke arivara. I el diya de oy, ke no se save la valor”!!!
Lo ke paso ya paso, no ay remedio o kamino de tornar atras para korijar los yerros! Anke no savemos si en el diya de amaniana, el sol va amaneser de nuevo, para darmos una opurtunidad a bivir un otro diya, entodo kavzo; bivimos ķon esperansa… vendremos a el diya de oy: si no notamos las difikultades i los yerros, ke kavzaron a trayer “El fin de el teatro Ladino” oy el diya. En el diya de amanyana ke amanesera i aklarara el sol: en ke manera se anbezaran de los yerros, i no kavzaran danios semejantes.
Si demandarash: kualos son loz yerros i ken los kavzo?... ay de kontunear a suivar lo ke eskrivo.
xxx
Dezeyava enpesar komo kada semana. Ma en el estado ke mos prepararon i mos ovligaron a entrar en el: Al pareser ke mos va tomar bastante tyempo.
A estos ke no tomaron parte a ser ben adem: Los keriya nombrar "kanibales" . Ma los kanibales, se komportan en esta manera; en ora ke no tienen kualo komer solo. Aki; izyeron lo ke izyeron, para satisficar sus almas. Amostrar a el mundo; ke tyenen el poder i toman plazer de lo ke azen.
No aviya, no ay i no avera eskuza, o pardonamiento a lo ke izyeron.
Verdad, ke uvo falta i mankura de preparasiones de el governo i la armiya. En una ora ke mos olvidimos ke; "La agua durma, el enimigo no "!... En todo kavzo; el ⁸estado no sera una razon proposionada; a la fuersa de el golpe ke resivimoz.
No fue la primera vez ke afito una koza semejanto. En la istorya el puevlo judio, fue aharvado en maneras diferentes, en lokasiones diferentes i en tiempos diferentes. Ma, kon apuyo de Dios, el pueblo judio; siempre reusho a alevantar, estar en pyes i adelantar mas ke todos. Esto seguro ke i esta vez; dando mano kon mano, kon union i amor; vamos alevatar, reushir i kontunear a adelantar.
Pasensya a las famiyas ke peryeron a sus keridos, saludozos todos los feridos, una buens fin a los arrevatados i una grande ventura i sukseso a nuestra armia, kon esperansa ke tornaran todos los soldados sanos i rezios de la gerra razonavle ke dan.
Saludozos todos. (A kontunear)
Albert ANAH