Un dia de Viernes otro ma; liberados i aklarados, de todos los pekados; despues de yom kipur. Kon esperansa; ke respektaremos a los derechos de kada uno i uno. Ansi ke a el anyo vinidero; ayegamos kon los “pekados sin intision” ke teneramos,
Una piesa nueva, es un enpesijo de todas las vandas. Las provas siempre enpesan kon meldar, i konoser los karakteres de el djugo. Esto es la parte mas fasil, en el enpesijo. En este periodo, el lavoro se adelanta, asentados en torno de la meza. Lo ke ay de azer; es meldar, korijar diksion, demandas i esplikamientos.
Afuera de las provas, ay de aparejar planos i kuentos, en ke manera se puedera aparejar la shena. A la fin, esta vez; aparejamos un djugo, ke ya se djugo kon artistas profesional. Por mas, kon un butcheto; ke de atras el teatro esta el governo. Nozotros, partikulares kada uno, voluntarios ke no tienen de adjustar mas ke el tiempo ke peryen. No tenemoz de ande abasteser un butchrto ke se puede aserkar, a lo ke izieron.
Ay ke pensar; de aparejar una dekorasion; ke no vamos tener menester de trokamientos. El djugo entero se djugara, kon la mizma dekorasion. Esto moz avansara, moneda, tiempo i manos ayudantes. Dekorasion; ke deve de kontener " la kaye, la kaza, el merkado, el kal" kurto todo...
En un djugo kualsiker, el ke deve de okuparse kon las luzes. Kale ke entre a las provas, kuando enpesan las provas kon muvimientos, kon las artistas.
Y Los ke tomaron parte en el primer djugo. Kedaron en el Klob Kultural. Ayi enpesaron aparejar un otro djugo, eskrito de mano de la siniora "Sara Bienveniste Benrey" ansi ke no avia esperansa de algun ayudo de parte de eyos.
Los kantes tambien eran problema bastante inportante. No teniamos la permision; a uzar playbeck "reprodusiones" ke se aparejaron partikularmente, para esta piesa. Ansi ke deviyamos de aparejar playbeck, enteramente diferente. Seguro i de rekordar kon bozes diferentes. "Guay de mi, de sovre mi."
Kon nombre de dios, salimoz a kamino. Kon intision de reushir sierto.
Saludozos asta la semana ke viene. (A kontunear)
Albert ANAH