(Teksto-Audio)
(Yazarı sesli dinlemek için tıklayınız)
El Libano aktualmente, sovre la deklarasyon del portaboz de la Banka Mondiala sufre de una grande kriza ekonomika istorikamente ineguala dezde las krizas finansialas de 1850. Los servisyos fondemantales del payis mas no lavoran i el 77 por sien de las famiyas libanezas no tienen paras(dinero) para poder merkar bastante a komer, sovre los raportos del UNICEF. La situasyon aktuala vino a un punto de risko de ambyertura. Sienes de kuras de prima nesesita mas no se topan i si se ajusta a esto la mankura de gas i de elektrisita la vida del sivdadino esta paralizada koza ke puja el nombre de mortalidad en esta kriza de Kovid-19. El UNICEF distribuya a famiyas de mas de 70000 libanezos, sirianos i palestinianos dinero kontante ke representan riskos ke poderan mandar a lavorar a sus kreaturas en edad de eskola o de vender sus ijikas para ser kazadas en sus chikas edades. Si se ajusta a esto los kaji 2 milyones de refujiados siryanos es imposivle de topar remedyo sin el ayudo de los otros payizes arabos i de la komunidad internasyonala, ke están lechos de kerer ayudar. La Arabia Seudita, Los Emirates i los Estados Unidos ke no están kontentes de la dominasyon iranyana travaron sus fondos depositados en la banka nasyonala libanesa. En despartes el Libano ke resiviya 4 miliardas de dólares de ayudo militar i esto fue anulado.
De otro lado la armada libaneza topándose en una grande estrechura kon mezadas bashas de serkas de 400 dolares al mes, ofresen a los turistos de darles tornos kon elikopter kontra una tarifa de 150 dolares por persona. Kada uno mira de topar remedyos urjentes a la kriza sin preokuparse del avenir del payis. La lira libaneza ya peryo 90 por sien de su valor en estos dalkavos dos anyos, i el sivdadino libanezo no tiene derecho de travar mas de 100 dolares por semana visto ke las reservas de devizes están a un nivel muy basho.
Bueno, kualo kavzo esta situasyon dezastroza? Kualos son los elementos ke tienen las kuedras de la politika de este payis ke antes 20 anyos miro a ser prospero, sentro bankaryo i turistiko del Medyo Oriente?
Despues de la gerra interna entre los kristyanos i los palestinianos ke kavzo grande danyo en el payis, la akalmiya establisida troko los rolos de los sunnites i de los shiites kom se vido en el resto del mundo arabo. En mayoriya el terorizmo sunnito disparesyo i desho su lugar al terorizmo shiito enkorajado i finansado por el Iran, donde el buto prinsipal es de derokar Israel. Ansi vemos en la shena del Medyo Oriente la organizasyon Hezbollah ke se dezvelopo al seno de la komunidad shiita libaneza de una manera fuerte ke pratikamente kontrola las institusyones governomentalas de este payis. El Hezbollah no esta interesado por el futuro del Libano, no le enkyeta la situasyon dezagradavle de las otras minoridades del payis, komo los kristyanos, sunnito i druzes. El Hezbollah kon su armada organizada i sus miles de misiles paralizo la vida ekonomika i sosyala del payis en siendo el primer ‘elemento’ de la kriza aktuala. Los miembros shiitos no se sienten sumitidos a las leyes demokratikas del payis. Eyos organizan i kontrolan komo les gusta los kaminos de la kontrabanda de los narkotikos i de las armas i ayudando a la Siria de Asad a vender sus narkotikos en Evropa, kontra armamento klandestino ke el resive.
El sigundo ‘elemento’ es konpozado de las minoridadaes kristyanas, sunnitas i druzes ke se gruparon en 2005 i se yamaron “ El Movemento de Marso 14” kreando la unyon egzemplara i fuerte ke forso a la Siria ke okupava el Libano a travarse sin kondisyon. En despartes, la filozofiya de este grupo es de ser serkano del oksidente de poder render el komersyo komo en el pasado i establisir la trankilidad. El muvemento enkavesado por el primer Saad Hariri opozado al Hezbollah, malorozamento en estos días no tendiendo un apoyo fuerte i en no podyendo realizar la trankilidad dyo su demisyon.
De punta de vista de Israel no ay muncho ke azer, ma solo de mirar de protejar la frontera del norte. Ademas visto la situasyon no ay ke de alarmarse ke el Iran i sus proksis se permetran de atakar Israel i aventurarse en una gerra ke les kostara muy karo kuando el Libano se topa en ora mala donde la ambyertura i su deskontento prevale al patriotizmo.
El punto prinsipal de la destruksyon lenta del Libano es la prezensya en su teritoryo de las fuersas revolusyonaras del rejim de los ayetollahes ke se apatronaron de la politika i de la armada del payis. El Libano es el primer payis arabo ke kayo en estado de desparesyon lenta, el kual reprezenta un buen echemplo a los otros payizes arabos ke se topan debasho de la influensa iranyana. La Siria , el Irak i el Yemen serán a sus tornos predas sin duvda del imperyalizmo del rejim totalitaryo del Iran.
Agora se entiende mijar los akordos de Abraham i sus konsikuensas en frente del kaos egzistente en esta jeografia. Ansi el governo Bennett se deklaro aviertamente ke Israel esta pronto a ayudar a los patriotos libanezos de mirar de eskabuyirse de la prezensya iranyana i de su proksi el Hezbullah, ma es ke este mesaje va ser oyida, no kreyo. En todo kavzo Israel da el sinyal al doredor arabo ke si una lucha avierta se deklarara kontra el Iran, ke menasa la zona entera kon su proyekto de fabrikar la bomba atomika, los payizes del golfo devran ajuntarsen a el .
Komentarze