SE LE AMENGUO EL SEMER
Djoha en su butika de la kaye Allenby en Tel Aviv vende para los ombres pantalones de todo modo de jinero. Una demanyada ve vinir un kliente viejo sinyor Mentesh kon su ijo chiko de 11 anyos. Djoha los aresive kon muncha galanteriya, le ofre te(chay) i pregunta al kliente la razón de su vijita. El kliente dize:” Kerido sinyor Djoha kero para mi ijo Jojo un pantalón de enverano.” Djoha responde:” Egzaktamente tengo lo ke demandas, mira este pantalón de kolor mavi justo lo ke keres, es de buena kalidad i no es del todo karo.” El kliente: “ kuanto demandas?” Djoha: “ Te dire ke el presyo es 600 shekeles, ma para ti te va azer un eskonto, dame solo 400 shekeles.” El kliente:” eske la ropa es resistente, en lavándo no se entrava?” Djoha:” Te lo juro, la ropa es de kalidad ekselente, garanti!” Enfin konvensido el kliente paga i se yeva el pantalón.
Pasa 3 semanas Mentesh kon su ijo Jojo vienen a la butika, el pantalón del ijiko si apenas le viene debasho los jinoyos. Esto ke ve Djoha se siente emplasmado enfrente de su kliente i se mete kon sonriza a dizir:” Ke ermozo ijiko, ke kadar se pudo engrandeser en tres semanas, seve ke se le amenguo el semer!”
***
DE MERKADA A RACHEL
Djoha mirikiyozo no parviene a durmir . Merkada le pregunta:” Kerido miyo ke se pasa de ke estas ansina enfasyado?” Djoha:” Kualo ke te diga Merkada, a manyana devo de pagar al vizino de enfrente 5000 shekeles, i no los tengo, pasi un mez muy yutch (difisil), no tuvi bastante klientes, no se kualo dizirle!” Enriva de esto Merkada se alevanta de la kama avre la ventana ke da al kurtijo i la yama a Rachel la mujer de Bohorachi el saraf el kual empresto el dinero a Djoha. Rachel kon surpreza avre su ventana i dize:” Hayrola Merkada ke keres?” Merkada:” Rachelika hanum dizele por favor al sinyor Bohorachi ke mi marido ke le deve 5000 shekeles, no va poder pagárselos a manyana por ke no los tiene, nochada buena kerida!” i ansina Merkada sin asperar repuesta serra la ventana i se entra a la kama i deklara a Djoha: “ Agora el ke no durma, tu durme!”
***
KEN OFRE MAS?
En un grande kombite el sinyor Sadik peryo su portofolyo i kuando se rendyo kuento tomo el mikrofon i dicho:” Sinyoras i sinyores vengo de pedrer mi portofolyo en el kual avia 5000 shekeles. Esto pronto a dar 300 shekeles al ken lo topara i me lo trayera.” Del fondo de la sala Djoha echa un grito en diziendo:” Yo esto pronto a dar 500 shekeles!”
***
DJOHA I SU AMIGO
Djoha i su amigo goy Ernst les plaziya kontar shakaikas. En el daklavo enkontro en la meza de raki Ernst le dize:” Djoha por favor ya basta estas shakas sovre los Levis i Kohenes no saves otras ke no son sovre los djudyos, por echemplo sovre los kinezos?” Djoha meneya la kavesa i dize:” Tienes razón. Justamente se una sovre los kinezos interesante. Shin Gou Minh i Lang Hun Tu se van en vijita ande el sovrino de Shin Gou Minh a la okazyon de su bar mitzva!”
***
REGALO DE ANIVERSARYO
Djoha entra en un magazín ke vende artikolos de lukso. Se adresa a la vendedora i le dize:” Mi mujer tiene su aniversario keria ofresirle la mijor echarpa ke tenesh.” La vendedora:” Entiendo esto va ser una ermoza sorpresa!” Djoha:”Justamente eya se aspera resivir una kolana de diamantes!”
Comments