El Rav Moshe Feintein esta diziendo: “No ay nada de negro por el judio de divertirse i sosializarse la noche de Desembre 31. Espesialmente por los ke biven en la diaspora, es emportante de respektar sus amigos, klientes non judios. Ademas, la idea de mirar atras, i pensar sovre los eventos del anyo pasado es una idea judia”.
“Por algunos judios, la idea de selebrar el Anyo Muevo en el 31 de Desembre los aze sintirsen inkomodos. Por eyos, este diya aze parte de la tradision sekular, i no reflekta la tradision judiya. Pensan ke partisipar a esta noche es una traizion a la tradision judiya”.
“Deke estos judios tanto supsonan este diya ke el mundo entero esta selebrando? Deke semos tan obsesionados kon muestra propria singularidad? Deke no estamos viendo muestra koneksion kon el mundo entero? Si muestro objektivo es ser diferente, no vale la pena”.
“Ay ideas judiyas ke puedemos unir a esta okazion para azerla mas sinyifikativa”.
“El Anyo Muevo marka un momento ke la djente en todas las partes del mundo selebran, i lo ven komo una posibilidad de konstruir un mijor futuro. Este diya semboliza el dezeyo de la persona de apartar el pasado del futuro, lo viejo de lo muevo. La persona pensa ke tiene el poder de ayudar a kreer un mijor futuro. Tenemos el dezeyo de pueder empesar de muevo, i de no ser emprizonado en el pasado. Tenemos esperansa por muevas posibilidades en muestro futuro”.
“Estas son tambien ideas ‘judiyas’. Deke no inkorporar un poko de judaizmo en las rezolusyones del Anyo Muevo?”
“La tradision judiya selebra la kapasidad de la persona de kerer empesar de meuvo durante el anyo entero. En la vida judiya, todos los diyas, todas las semanas, i en todas las okaziones, tenemos la oportunidad de empesar de muevo”.
“Kada Shabat rekordamos el primer momento de la kreasion, i mos damos la oportunidad de empesar de muevo. Azer teshuva, i empesar de muevo es muy emportante en el judaizmo. Tomar rezolusyones para transformar muestra vida es lo ke aze el judio en kada orasion”.
“Seyga en Roshashana o en el 31 de Desembre, tomaremos buenas desiziones para el futuro, rogaremos al Dio ke mos de sanedad, pas, i diyas alegres. El 31 Desembre, lo veremos komo una otra okazion para tomar rezulosiones a transformar muestra vida por lo mijor”.
Comments