(Teksto-Odio)
(Yazarı sesli dinlemek için tıklayınız)
No ay duvda ke 2020 fue uno de los mas difisil anyos ke la umanidad entera bivyo en su estorya aktual. El mundo sufriyo la mas mala kriza sanitarya de los dalkavos anyos, ke kavzo trokamyentos fondementales en la vida de kada dia de los umanos i ke kito en medio la mankura de kolaborasyon internasyonala. Justo ke se dezveloparon diferentes vaksines kontra este maldicho virus Covid-19 kon los kualos vimos luz en la esperensa de salvarmos, espuntaron muevas transformasyones kontajyozas del virus ke lo rende mas peligroso de su forma primera. Se trata del virus Ingles, sud Afrikano i agora el muevo proviniendo del Brazil. Esta situasyon krea grande mirikiya al seno de las povlasyones mondialas i ke forsa a los estados de retornar a serrar las frontieras. Malgrado las vaksinasyones de milyones de djente no se aspera ke la pandemia se va kalmar durante 2021, porke es imposible de produizir tantos vaksines un kurto tiempo. Se entiende ainsi ke esta prosedura turara muncho tiempo i mizmo anyos! A esto ajustaremos ke munchos payizes en mayoriya proves no van a poder merkar el vaksin durante este anyo, koza ke pujara la epidemia ke fin oy en dia ya mato mas de milyon i medyo de djente, en mayoriya los ayedados. Espesialmente los payizes del sud del Sahara kedaran a las piadades de la Organizasyon Sanitarya del Mundo.
Ademas la pandemia del Covid-19 kavzo a ke las grandes potensias komo los Estados Unidos, la Rusya, i la China se topen en konflikto de entereso , koza ke dereglo la ekonomia i la vida sosyala del mundo. Espesialmente en las zonas de konflikto esta situasyon dyo la oportunidad a las organizasyones extremistas de reorganizarsen en tomando avantaje de las preokupasyones del mundo i ansi a empesar sus aktividades teroristas. El Medyo Oriente durante 2021 komo los anyos pasados resivera su parte del konflikto Israelo-palestiniano i la guerra ke egziste entre el Iran i Israel de una parte, el Hezbollah i el Hamas de la otra va kontinuar a ser dolor de kavesa para Israel.
Malgrado todo se pensa ke avra durante este anyo un mijor atmosfera politiko entre las grandes potensyas una ves ke la administrasyon del prezidente Biden ampesara su lavoro en la Kaza Blanka. Se aspera a ke la tansyon entre los Estados Unidos, la Rusya,i la China se amenguara dando la posibilita a una kooperasyon internasyonala ancha para produzir vaksines kontra la corona. Se aspera ke las tendensyas de fanatizmo, de ekstremizmo i de enemista sean kontroladas por los governos a la unanimidad.
Viendo el aspekto de lo ke mos aspera, en Israel el moral del puevlo esta basho. Kon esto diremos ke su governo enfrente de la pandemia tomo sus dechizyones en justo tiempo i se metyo deakordo kon la firma Pfizer para merkar las dozes neseseryas de vaksin para su pueblo. I kon una lojistika ekselente de la armada israeliana(Tsahal) a la kuala se demando de organizar la distribusyon del vaksin a traverso el payis dyo resultados onde todo el mundo kedo enkantado. El sistema de la lojistika fue de trayer el vaksin al pie del sivdadino i no komo en Evropa ke es el sivdadino ke deve ir onde se puede injektar el vaksin. Es ansi ke mas de 2 milyones i medio resivieron la doza fin oy en dia. Se aspera ke la povlasyon de Israel en totalidad resivera 2 injeksyones una de detrás de la otra antes la fin de Septembre de este anyo. Un rekordo mundial ke los payizes del oksidente mostran unanimamente kon admirasyon la fuerza de este payis chiko de saverse defenderse kontra todo modo de perikolo. La leson ke los dirigentes aktuales de Israel ambezan a sus kolegas evropeas es de arremenearse presto en merkando el vaksin antes los otros payizes. Durante las negosyasyones kon Pfizer para resivir las primeras dozas malgrado ke se dize ke kostaron 40% mas karo, Israel fue kapache de desidar presto i de merkar supito. El presyo kedando sekreto no se save si la nuvela ke Israel merko karo es verdadera. La distribusyon del produkto en todas las partes del payis es echa kon una prestez remarkavle. Demandar a los dirigentes mizmo de la mas chika lokalidad de dar a entender al sivdadino la importansa de injektarse el vaksin. Sin dinguna diferensya los haredis, los arabos, los druzes, los kristyanos, los cherkezes i mas resivieron i resiveran en sus sivdades i kazales el vaksin ke les es nesesaryo.
De otra lado no savemos si los payizes vizinos de Israel tomaran las mezuras demenesterozas para arankar del rayis este virus. Si no, el esforso de Israel será vano porke el virus trokando kada nada de aspekto pode revinir atras a traverso los kontaktos umanos . Eske Israel esta pronto a serar impenetravamente sus frontieras. Komo azer a ke los sien i sukuenta miles lavodadores palestinianos ke vienen kada dia a lavorar en Israel, no sean trayedores de la Covid-19. Israel en este kavzo devra ayudar la Otoridad Palestiniana en dándole vaksin a presyo eskontado. Lo ke kere dizir milyones de shekel de investimiento.
Entremientes los siantifikos israelianos lavoran desde del empesijo de la pandemia a krear un vaksin israeliano aktivo kontra este virus i ansi mirar de ser, komo payiz, independiente del merkado ekstranjero. En kavzo ke los testes ke se azen oy en dia serán pozitivos Israel sera mijor ekipado para ayudar el Medyo Oriente entero sin mirar diferensya ken es amigo o ken no es.
No se save si la ekonomia en el mundo se podera estabilizar en 2021. Ke va ser el korso del dólar i de las otras monedas fuertes, difisil de indevinar. Una de eyas siendo el shekel ay espanto ke verso la fin de 2021 su igualdad al dólar va suvir a 2.80 . Koza ke va danyar muncho las eksportasyones de bienes israelianos a la eksepsyon de los produktos ‘high-teck’ ke se negosyan solo en dólares. Vender ideas es mas fasil ke de vender produktos manufaktorados. Ademas el merkado de la enerjiya kon la pandemia ampeso a ser mas barato. Por echemplo el baril del petrol fina antes poko tiempo era vendido a dólares 30. Kon la deskurvierta del vaksin, esperando ke la ekonomia va ampesar a normalizarse el presyo ampeso a pujar , koza ke ayudara los payizes del golfo i la Arabia Seudita, i de ke no el gaz israeliano de ganar en valor.
De mi parte dire ke la anyada 2021 va pasar en partida kon difikultades en el mundo entero. Se kerara anyos para poder injektar todos los umanos de la tierra, ansi la pandemia va kontinuar. Pandemia kere dizir ekonomia basha, diferente modo de bivir la vida de kada dia, poko turizmo, pokas vijitas en las sosietades oksidentales , manko de divertimiento i de evenementos kulturales. Podeser ke el spor dechara la puerta avierta a las kompetisyones internasyonalas.
コメント