La gerra en Gaza entro a su diezen mez, el diskorso publiko del diya de oy es sovre la dubya del puevlo israeliano komo será la situasyon una ves el konflikto terminado. Komo Gaza devra ser rejido sin la prezensya del Hamas politiko visto ke su fuersa militar esta vensida. Komo rejir las bandas mafyozas i los trivos familiales ke son kapaches de akaparar el poder anarchiko ke egzistera en Gaza. Dunke komo governar mas de 2 miliones de sivdadinos biviendo en ruinas i sin futuro de topar komo mantenerse.
Munchas ideas i formulas son propozadas, ma dingunas de eyas no son buenas. Ken dize, ke la armada israeliana devra rejir el lugar ke será dezarmado, koza ke del al avizo politiko en jeneral no será posivle, visto ke esto no es el rolo de una armada. Bien entendido komo es el kavzo de Yehuda i Shomron, Tsahal mirara si será demenester de impedir kon fuersa toda renovasyon de un terorizmo a la manera del Hamas i del Cihad islamiko.
Ken dize’ sovre la demanda del Konsilyo de Sekurita de l’UN, Los Estados Unidos kon la partisipasyon del Ayifto, de la Arabia Seudita i de los Emirates Arabos devran por una sierta larga peryoda dirijar la vida i la rekonstruksyon de Gaza. No vemos ke el Ayfito i la Arabia Seudita se entereseran a un tel proyekto del espanto de afrontar, dainda biva la ideolojiya Hamas, la kuala es bazada sovre los prensipyos de los Ermanos Musulmanos, koza ke no les konviene visto ke son kontra eyos. Ademas en frente de sus publikos no kererian mostrarse ke son aliados de Israel.
Otra idea es de dechar a la Administrasyon kosha de Ramallah de vinir i okuparse de sus korelijyonaryos i de purfiar a reunirsen entre eyos komo en el pasado i ansi poder krear un estado independiente. Koza ke parese lojik, ma difisil a realizar porke el arabo de los territoryos kon el de Gaza no se asemejan del todo en kestyones de politika, de lingua, i de kostumbres. Ademas los gazauis al kontraryo de la Administrasyon palestiniana no keren una independensya al lado de Israel, visto ke la doktrina Hamas es de derokar el estado djudyo.
Dunke sin falta, Israel de su parte devra topar kon insistensya los remedyos de luchar kontra la idolojiya Hamas. Aparejar kon pasensya un sistem semejante al de los Estados Unidos ke apliko kontra el nazizmo en Alemanya i kontra el fashizmo en el Japon. Dar el ayudo nesesaryo material komo el plano Marshall ke permetyo a los inimigos de ayer edifiar sus payizes ruinados i ke una administrasyon demokratika sea establisida al lugar del Hamas, leshos del diktat fashisto. Se ve el resultado positivo en la Alemanya i en el Japon, sus situasyones briyantes en las kualas sus puevlos oy se topan. La Alemanya ekonomikamente primer payis de la Evropa Unida i el Japon uno de los lideres mondial de la teknolojiya, todos los dos pasifikos i modeles de la demokrasiya oksidentala.
Esto no será una utopia, un miraje si Israel es suportado i ayudado por los Estados Unidos i otros payizes amigos ke keraran ver en pas dos puevlos en una mizma tyerra. Es lo ke traerá pas en el Medyo Oriente malgrado un Iran dirijado por djento relijioza fashista, ke del espanto de una pas entre djudyos i arabos puedera traer la fin del rejimen de los ayetollahes.
Mozotros djudyos ke retornimos a bivir en muestra tyerra prometida fuimos durante miles de anyos a dar a la umanita el mas grande livro de su egzistensya, la Tora, somos un puevlo líder en sensya, teknolojiya, kultura, filozofiya i ekonomiya, podemos en Israel topar solusyones i komo ayudar kon una edukasyon konforma a ambezar a las muevas jenerasyones de los abitantes de Gaza a bivir mijor en pas, a protejar la vida umana i no glorofikar la muerte. Darles la savor de bivir i enfloreser en dezvelopando la banda de Gaza tyerra en la kuala biven i biveran en juntos kon sus 2 prensipales vizinos el Ayifto i Israel.
En rezumen en Israel devemos ambezarmos no solo a defendermos, ma de azer el esforso nesesaryo kon modestiya i tolerensya a trokar los prensipyos de inimista de muestros inimigos. Ay ke diran esto no es posivle, yo dire si es posivle. La volonta egzistyendo muestra entelijensya i kreativita, kon pasensya i a la limit de muestra toleransya topara amigos entre los futuros dirijentes de Gaza ke miraran a establisir un rejim el kual ayudara al puevlo otoktono a dezveloparse i de ke no, a krear al bodre del Mediteraneo un esklave komo akel de Kaliningrad, enfloresido para sus abitantes. Es vedra, esto tomara muncho tiempo, muncho dinero ma es un remedyo ke devemos pensar mozos Israelianos kon muncha atansyon.
Kero adjustar, oy en dia, el nazizmo no fue totalmente destruyido del mundo, ma no es mas el sentro de la ideolojia alemana komo fue un tiempo. Al nazizmo no le kedo ni infrastruktura ni terrytoryo ke kontrola, dunke no representa mas un perikolo. Deke se pensa ke la ideolojiya Hamas sin terrytoryo puedra mas bivir malgrado ke no desparesera totalmente. No seremos pesimistos ma solo pasensyozos. Kon kalmo i atansyon devemos planifiar el futuro de Gaza en demandado a sus futuros dirijentes, ke formaremos, de pregonar la pas i la stabilitad sin el ideal destruyedor del Hamas.
Dr. Selim Salti
Commenti