Djusto ke digo mas no tengo ke azer, el teatro del diya enternasyonal del ladino yasta pronto el program para la ovra Golden Age esta pronto, el teatro ke iva mos azer para İtahdut Yotsei Turkiya esta pronto, malorozamente estos todos tekstos estan asperando enriva la meza ke eskrivo asperando la ora del Dyo.
Dos anyos de pandemiya, el rash de Hatay Antakya, dishimos tantas almas muryo, mozos vamos azer teatro no es de djusto. La pandemiya eskapo, el dolyo del rash ya amaho, kon un guste mos arekojimos penimos i lazdrimos, djusto ke ya estavamos prontos para salir a la shena salyo la gerra ke mos izo a todos dariva abasho.
Ma yo so pansensyoza, tengo esperansa ke todo se va enderechar i vamos a tornar a los diyas de antes. Por esta razon estos tekstos estan asperando enriva la meza, no kideyi a meterlos al kashon de arshivos.
No me plaze estar vaziya, El dyo ya save lo ke aze me manda fin al pye syertas aktividades para ke no kede vaziya. Por esto syempre ago lores al Dyo.
Una demanyana en meldando novelas en Googl, meldi ke ay una kompetisyon de eskrivir teatros kurtos. De vista demandi si ay limit de anyos porke munchas vezes dizen fin los kuarenta, yo ya pasi un poko))).
Me disheron ke no ay limit de anyos. Bueno, de vista me asenti i eskrivi un chiko teatro i lo mandi al adreso ke me dyeron.
Fui akseptada, agora esto asperando el resultado ke va salir. En el mes de Mayo me disheron. El primer, el sigundo i el treser va ser djugado por artistos profesyonel.
Una demanyana tomi un telefon dizyendo ke ay un evento, de kontar konsejas en las linguas ke estan para peryer. Komo el Suryan, el Laz, el Çeçen i por siguro el Ladino. Me rogaron ke konte una konseja.
De vista me asenti i me meti a eskrivir una konseja. La mandi i esto fue akseptado ma el echo esta seryozo. Kale azer un pakto, ay reglas, fin el diya ke se va kontar no kale anrejistarla i kontarla en otros lugares, mas de vente puntos no va alargar i lo mas difisil no ay meldarla. Porke me
disheron konseja no se melda se konta.
Esto lavorando para kontarla de kavesa.
Una dicha dize:
” Ken no tyene ke azer kita los ojos de la mujer”
En este sujeto me vino al tino una anegdot.
Moiz i Rebeka ya kazaron a los ijos mas no tyenen responsabilita i ke azer. Moiz no lavora, de sorte ke estan diya entero endjuntos. Diya i noche le kome la kavesa de Rebeka. Aki tengo dolor, ayi mesta
endjidando, la kavesa, las pachas, la tripa.
Un diya Moiz se esperto, de ke se alevanto empeso a kesharse, ah el estomago vah el estomago, fin ke le disho la mujer vate al doktor. Se fue al doktor. El doktor ya lo konosiya, para kayarlo le disho:
“Este dolor de estomago te va pasar en mamando leche de una parida mueva”.
Moiz pensando komo va azer enkontra a su amigo Salamon
Salamon ---Ke tyenes Moiz estas tan triste koza afito??
Moiz- No demandes Salamon esto kon dolor de estomago
Salamon--- No te fuites al doktor ?
Moiz---- Si ya me fui
Salamon--- eee ke te disho?
Moiz---- Me disho ke la sola kura, es de mamar leche de una mujer ke
paryo mueva
Salamon--- No penses Moiz mi mujer paryo mueva vate a mi kaza i
mama de eya
Moiz---- siiiii? Estas siguro
Salamon --- siguro, ajenos semos.
Moiz se va a la kaza de Salamon, le konta a Rebeka lo ke se pasa, Rebeka aksepta i Moiz empesa a mamar.
Un poko dospues, Rebeka, le demanda:
Rebeka--- Moiz keres alguna otra koza
Moiz---- No Rebeka mersi no kero nada
Rebeka--- Moiz no te chekineyes si keres otra koza dizeme
Moiz---- No no kero hanum
Rebeka---- (ensiste) Moiz si keres te puedo dar
Moiz--- Kualo me puedes dar?
Rebeka--- Lo ke keres Moiz
Moiz----- Bueno, me puedes dar,
Rebeka--- Si Moiz lo ke keres
Moiz--- eh, bueno, si tyenes en kaza, dame dos biskochikos va bueno
kon la leche.
FORTİ BAROKAS
Siempre un plazer sintirte, Forti!😘