Anyos antes, kazamenteras organizavan una grande parte de los kazamyentos. Si una ija no se kazo fin diisyete anyos, esto era una veruensa para la famiya.
Los kazamyentos de un tyempo eran unyones par Propozisyon. Las kazamenteras ke konosiyan a las dos famiyas, organizavan una Entrevista. Los futuros kosuegros , i los futuros novyos viniyan a la entrevista. Si aviya alguna senteya (komo oy es moda de dizir elektrik) entre los mansevos, el mansevo demandava de salir unas kuantas vezes kon la muchacha.
Duspues de la entrevista, si todo kamino bueno, las famiyas desidavan de azer el Espozoryo. Ma, antes del espozoryo, los padres se arekojiyan para solver la famoza kestyon de Dota. Munchas vezes aviya un trato duro. Si el novyo no teniya una buena situasyon, a las vezes, allado de la dota se demandava Meza Franka. Meza franka es kuando los muevos kazados vana bivir kon la famiya de la novya, fin ke el novyo enderecha su situasyon.
El diya del espozoryo, los novyos se metiyan aniyos. El grande de la famiya les metiya los aniyos. Se komiya bonbones blankos i de kolor ke se yama badem şekeri en turko. Para adulsar los envitados, se serviya dulse echo en kaza en un tepsi; dulse de bimbriyo, de mansana o de rozas kon kupas de agua yelada, kon kucharas de plata allodo, i duspues viniya la sira del kafe turko kon kaymak.
Kuando se dava la desizyon de azer el kazamyento, se dava Gemer de Boda, i se tomava diya en la Sinagoga.
Antes de la boda, la madre de la novya envitava la kosuegra para Aparar el Ashugar. Akel diya, se envitava kunyadas, primas, tiyas, amigas, vizinas. Era komo una forma del Open House de oy.
El ashugar entero se enkolgava en el salon; de una parte se enkolgavan los manteles de meza, kaliya ke ayga unos kuantos manteles, el uno blanko, el otro bleu ciel, el treser rose bonbon. Todos los manteles eran brodados kon los ilos famozos de DEMSE ke no se topava syempre.
En el otro kanton del salon, se metiya los Naperones de kolor en kolor, brodados i todos kolaladeyados.
En el treser kanton, se enkolgava la lenjeri. Naylon no egzistiya akeyos diyas. Todo era en seda pura: chemise de nuit, robe de chambre, kombinezones.
En la pared denfrente, se atava una kuedra, i aya se enkolgavan los fostanes, las bluzas, los tayores.
La kosuegra estava tresalida: el ijo kayo en bueno.
Duspues viniya el diya de la Meri ke es el kazamyento sivil.
El banyo de novya, el Mikve, era una otra grande fyesta para las famiyas. Akel diya, se fyestava kon dulsuryas, kon muzika, en un banyo turko, en un Hamam.
El diya de la Boda, el novyo i los kosugros se vistiyan smokines ke eran alkilados. Los ombres se metiyan silendros en la kavesa, i todos teniyan la mezma kolor de gravata u papiyon.
Duspues de la boda, las dos famiyas se ivan a fotografeyarsen en un fotographchi, i a la noche la boda se fyestava en un Lokal.
En una famiya, el dover del ombre era de trayer paras a kaza, el dover de la mujer era de mantener la vida i la salud de la famiya i de okuparse de los ijos.
De syeklo en syeklo, munchas kozas de esta tradisyon trokaron muncho en Estanbol ma las kozas prensipal no trokan i las bodas estan kontinuando a azersen en las Sinagogas.
Comments