KALSADOS DE LUSTRİN

Esta semana dishe eskrivere un sujeto diferente ma no es posivle, porke en estantando la situasyon del pais seya ande vozos, seya ande mozos en este estado sin kerer estamos enklavados a la televizyon i a los haberes.

Ma komo dizen, la vida esta kontinuando.

Dospues de muncho tyempo, lores al dyo ya ayegimos a fyestar un Purim en la eskola djudiya. Ke desho la korona, ke tomo el rash de Hatay, dospues la gerra ke no mos desho gana de nada, atorgare ke ya mos vino kon muncho plazer.

Este anyo fue el 20.ten anyo de la kreasyon del koro “NES” i mezmo tyempo del koro de kriaturas “ESTREYİKAS D’ESTANBOL”.

De sorte el kreador de estos dos koros “İZET BANA”, arekojyo kaji 20 kriaturas de 7 a 10 anyos i empeso a ensenyar su lavoro sakro, ke es ambezar kantikas en ladino. Dospues dyo anunsyo al koro NES ke ya estavamos asperando a ojos a ojos, kijo aunarmos i fyestar este aniversaryo todos endjuntos.

Kantimos todos endjuntos kantikas de Purim los envitados mos akonpanyaron en syertas kantikas, estuvimos orozos de azer orozos.

En mi chikes, apenas eskapava Purim, en las kazas empesava un movimyento. Emprimero era enkalar la kaza i despues kon sira, azer kashones i kantones, lavar las mantas, dar los kolchones al hallach. Mi nona ya empesava azer planos del seder de pesah. Kuando se aserkava los diyas era majar la moez, pasar la prasa por el tropito, eskaldar espinakas, kuantos kilos tomava mi madre no se, me akodro en tres legenes blankos ke eran legenes de pesah, aviya tanta espinaka ke no topava de pensar kualo se va azer. Entrar al mupak era defendido no seya ke mesklemos el hamets al kacher. El haroset por siguro se azia en kaza komo todo lo ke se komiya. Fritadas de todas maneras porke en la kaye no se beviya ni agua. No aviya nada pronto ni cateringes ni nada.

Diya de kalhamira era kemar la migita del pan, aparejar la meza del seder de pesah ke aresiviyamos lo mas poko vente, vente i sinko almas, ir al banyo, vistir lo muevo ke mos merkaron i los kalsados de lustrin.

Koza kuryoza tanto penavan i no se kechavan de kanserya, Ke pekado ke las kriaturas de oy, no syenten esta emosyon, porke no ay menester ke venga moed ya tyenen todo en la mano kon su demaziya la ora ke keren, i kon tanto konfor no estan tanto orozos komo eramos mozos.

Mi madre teniya uzo de mandar gatos de pesah a los ke no puedian azer. İ por esto mi papa traiya a kaza kaji 150 guevos. Syempre lo digo, Kreygo ke en dinguna nasyon mas de mozos los djudyos, no egziste emplear 150 guevos en una semana.

Agora no ay ni majar la muez ni pasar la prasa por el tripito. Kon un robot no esta sureyando ni sinko puntos, el haroset, si no keres penar, kon un telefon te vyene fin la puerta de tu kaza, la espinaka no se kere dicho, ay paketos prontos, mundada i lavada, mas mijor ay un alay de cateringes ke te esta enbiyando todo fin al pye, mezmo los chinis, pirones, kuchiyos i kucharas.

Malorozamente agora no estrenar kalsados de lustrin.

Malgrado estos kolaylikes mas no ay pransos de trenta personas.

Alegres ke estesh

HAG PESAH SAMEAH.

Forti BAROKAS

Bağış/Donation/תרומה