Un proverbo muy djusto digamos proverbo yerrado no ay.
Tu bishvat mos anunsya ke ya vyene la primavera. Es kuryozo, dospues ke fyestamos tu bishvat, vemos ke los arvoles empesan a arebivirsen, a dar rozikas i lo mijor alargan los diyas.
Kon la vinida de la primavera dishe el moral ya se va enderechar un poko ma malorozamente de oyir las novelas no muy famosas, la karestiya, la situasyon del pais, sin kerer estamos entrando a una depresyon kada uno a su modo.
Komo dishe ariva kada uno mete la mano ande lerguele.
Para mi fin de mundo ke kedo la vida en la komunidad. No ay aktividades, no ay teatros de ovras no ay reunyones de sorte mos estamos aleshando de syertos amigos.
Agora vash a dizir otro mal ke no ayga, siguro ke la sanedad vyene enprimero, gerras ke no ayga, ma estamos afritos de un plazer ke es un buen divertimyento para mozos los djugadores amatores.
Lo mas ke me aze pena es, ver a los artistos profesyoneles de teatro, tristes de no pueder salir a la shena. Por no tener moneda para pagar los salones ke estan muy karos de no alkansar.
Siguro ke no me va konparar kon los profesyoneles ma i yo esto triste de no azer teatros ke es mi bueno. Por esto vo eskarvando en el google artikolos sovre el teatro i kuryozo, topo ermozas eskritas.
Una de eyas las vo partajar siguro ke eran en turko las traduizi.
La vida es komo un teatro, las personas negras se asentan en los mijores rangos, de sorte los djugadores de teatro, deven de djugar para los rangos de alkavo “ARİSTOFANES”
Los espantozos mueren mil vezes antes de murir, los korajosoz dizen una ves me va murir, por esto los djugadores ke salen a la shena kale ke seyan korajozos “SHAKESPEARE”
Las difikultades pujan la valor de la reushita, por esto a los djugadores kale ke les plazga el difisil “MOLİER”
El ke lucha no pyedre, el ke no lucha ya pyedro, por esto el djugador kale ke luche. “BRECHT”
El teatro es una eskola ke ambeza a yorar i a riyir, i es un tribunal independente, por esto el djugador kale ke seya djusto “LORCA”
Alguno si avla detras de vozos es ke estash adelantre de el, por esto el djugador kale ke seya pionero CHEHOV
Drama es egzajerar los sentimyentos, por esto el djugador kale ke seya vizyonaryo “İONESCO”
El pesimizmo es muncho mas negro del kanser, por esto el djugador kale ke seya optimisto “MUHSİN ERTUĞRUL” (fondador del teatro Turko)
Dezeo un mundo donde toda la djente ke aman el teatro, puedan eskrivir i djugar independente i todos los amantes del arte seyan valorados.
Comments